इन्द्रो मरुद्भिः सांविद्येन माध्यंदिने सवने वृत्रम् अहन् यन् माध्यंदिने सवने मरुत्वतीया गृह्यन्ते वार्त्रघ्ना एव ते यजमानस्य गृह्यन्ते तस्य वृत्रं जघ्नुष ऋतवो ऽमुह्यन्त् स ऋतुपात्रेण मरुत्वतीयान् अगृह्णात् ततो वै स ऋतून् प्राजानात् । यद् ऋतुपात्रेण मरुत्वतीया गृह्यन्त ऋतूनाम् प्रज्ञात्यै वज्रं वा एतं यजमानो भ्रातृव्याय प्र हरति यन् मरुत्वतीया उद् एव प्रथमेन यच्छति प्र हरति द्वितीयेन स्तृणुते तृतीयेन । आयुधं वा एतद् यजमानः सꣳस् कुरुते यन् मरुत्वतीया धनुर् एव प्रथमो ज्या द्वितीय इषुस् तृतीयः प्रत्य् एव प्रथमेन धत्ते वि सृजति द्वितीयेन विध्यति तृतीयेन । इन्द्रो वृत्रꣳ हत्वा पराम् परावतम् अगच्छत् । अपाराधम् इति मन्यमानः स हरितो ऽभवत् स एतान् मरुत्वतीयान् आत्मस्परणान् अपश्यत् तान् अगृह्णीत । प्राणम् एव प्रथमेनास्पृणुतापानं द्वितीयेनाऽऽत्मानं तृतीयेनात्मस्परणा वा एते यजमानस्य गृह्यन्ते यन् मरुत्वतीयाः प्राणम् एव प्रथमेन स्पृणुते ऽपानं द्वितीयेनाऽऽत्मानं तृतीयेन । इन्द्रो वृत्रम् अहन् तं देवा अब्रुवन् महान् वा अयम् अभूद् यो वृत्रम् अवधीद् इति तन् महेन्द्रस्य महेन्द्रत्वम् । स एतम् महेन्द्रम् उद्धारम् उद् अहरत वृत्रꣳ हत्वान्यासु देवतास्व् अधि यन् महेन्द्रो गृह्यत उद्धारम् एव तं यजमान उद् धरते ऽन्यासु प्रजास्व् अधि शुक्रपात्रेण गृह्णाति यजमानदेवत्यो वै महेन्द्रस् तेजः शुक्रो यन् माहेन्द्रꣳ शुक्रपात्रेण गृह्णाति यजमान एव तेजो दधाति ॥
indro marudbhiḥ sāṃvidyena mādhyaṃdine savane vṛtram ahan yan mādhyaṃdine savane marutvatīyā gṛhyante vārtraghnā eva te yajamānasya gṛhyante tasya vṛtraṃ jaghnuṣa ṛtavo 'muhyant sa ṛtupātreṇa marutvatīyān agṛhṇāt tato vai sa ṛtūn prājānāt | yad ṛtupātreṇa marutvatīyā gṛhyanta ṛtūnām prajñātyai vajraṃ vā etaṃ yajamāno bhrātṛvyāya pra harati yan marutvatīyā ud eva prathamena yacchati pra harati dvitīyena stṛṇute tṛtīyena | āyudhaṃ vā etad yajamānaḥ sam̐s kurute yan marutvatīyā dhanur eva prathamo jyā dvitīya iṣus tṛtīyaḥ praty eva prathamena dhatte vi sṛjati dvitīyena vidhyati tṛtīyena | indro vṛtram̐ hatvā parām parāvatam agacchat | apārādham iti manyamānaḥ sa harito 'bhavat sa etān marutvatīyān ātmasparaṇān apaśyat tān agṛhṇīta | prāṇam eva prathamenāspṛṇutāpānaṃ dvitīyenā''tmānaṃ tṛtīyenātmasparaṇā vā ete yajamānasya gṛhyante yan marutvatīyāḥ prāṇam eva prathamena spṛṇute 'pānaṃ dvitīyenā''tmānaṃ tṛtīyena | indro vṛtram ahan taṃ devā abruvan mahān vā ayam abhūd yo vṛtram avadhīd iti tan mahendrasya mahendratvam | sa etam mahendram uddhāram ud aharata vṛtram̐ hatvānyāsu devatāsv adhi yan mahendro gṛhyata uddhāram eva taṃ yajamāna ud dharate 'nyāsu prajāsv adhi śukrapātreṇa gṛhṇāti yajamānadevatyo vai mahendras tejaḥ śukro yan māhendram̐ śukrapātreṇa gṛhṇāti yajamāna eva tejo dadhāti ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.