देवा वै प्रबाहुग् ग्रहान् अगृह्णत स एतम् प्रजापतिर् अꣳशुम् अपश्यत् तम् अगृह्णीत तेन वै स आर्ध्नोत् । यस्यैवं विदुषो ऽꣳशुर् गृह्यत ऋध्नोत्य् एव सकृदभिषुतस्य गृह्णाति सकृद् धि स तेनार्ध्नोत् । मनसा गृह्णाति मन इव हि प्रजापतिः प्रजापतेर् आप्त्यै । औदुम्बरेण गृह्णाति । ऊर्ग् वा उदुम्बरः । ऊर्जम् एवाव रुन्द्धे चतुःस्रक्ति भवति दिक्षु एव प्रति तिष्ठति यो वा अꣳशोर् आयतनं वेदायतनवान् भवति वामदेव्यम् इति साम तद् वा अस्यायतनम् मनसा गायमानो गृह्णाति । आयतनवान् एव भवति यद् अध्वर्युर् अꣳशुं गृह्णन् नार्धयेद् उभाभ्यां नर्ध्येताध्वर्यवे च यजमानाय च यद् अर्धयेद् उभाभ्याम् ऋध्येत । अनवानं गृह्णाति सैवास्यर्द्धिः । हिरण्यम् अभि व्यनिति । अमृतं वै हिरण्यम् आयुः प्राण आयुषैवामृतम् अभि धिनोति शतमानम् भवति शतायुः पुरुषः शतेन्द्रियः । आयुष्य् एवेन्द्रिये प्रति तिष्ठति ॥
devā vai prabāhug grahān agṛhṇata sa etam prajāpatir am̐śum apaśyat tam agṛhṇīta tena vai sa ārdhnot | yasyaivaṃ viduṣo 'm̐śur gṛhyata ṛdhnoty eva sakṛdabhiṣutasya gṛhṇāti sakṛd dhi sa tenārdhnot | manasā gṛhṇāti mana iva hi prajāpatiḥ prajāpater āptyai | audumbareṇa gṛhṇāti | ūrg vā udumbaraḥ | ūrjam evāva runddhe catuḥsrakti bhavati dikṣu eva prati tiṣṭhati yo vā am̐śor āyatanaṃ vedāyatanavān bhavati vāmadevyam iti sāma tad vā asyāyatanam manasā gāyamāno gṛhṇāti | āyatanavān eva bhavati yad adhvaryur am̐śuṃ gṛhṇan nārdhayed ubhābhyāṃ nardhyetādhvaryave ca yajamānāya ca yad ardhayed ubhābhyām ṛdhyeta | anavānaṃ gṛhṇāti saivāsyarddhiḥ | hiraṇyam abhi vyaniti | amṛtaṃ vai hiraṇyam āyuḥ prāṇa āyuṣaivāmṛtam abhi dhinoti śatamānam bhavati śatāyuḥ puruṣaḥ śatendriyaḥ | āyuṣy evendriye prati tiṣṭhati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.