बृहस्पतिर् अकामयत ब्रह्मवर्चसी स्याम् इति स एतम् अष्टरात्रम् अपश्यत् तम् आहरत् तेनायजत ततो वै स ब्रह्मवर्चस्य् अभवत् । य एवं विद्वान् अष्टरात्रेण यजते ब्रह्मवर्चस्य् एव भवति । अष्टरात्रो भवति । अष्टाक्षरा गायत्री गायत्री ब्रह्मवर्चसम् । गायत्रियैव ब्रह्मवर्चसम् अव रुन्द्धे । अष्टरात्रो भवति चतस्रो वै दिशः । चतस्रो ऽवान्तरदिशाः । दिग्भ्य एव ब्रह्मवर्चसम् अव रुन्द्धे ॥ त्रिवृद् अग्निष्टोमो भवति तेज एवाव रुन्द्धे पञ्चदशो भवति । इन्द्रियम् एवाव रुन्द्धे सप्तदशो भवत्य् अन्नाद्यस्यावरुद्ध्यै । अथो प्रैव तेन जायते । एकविꣳशो भवति प्रतिष्ठित्यै । अथो रुचम् एवात्मन् धत्ते त्रिणवो भवति विजित्यै त्रयस्त्रिꣳशो भवति प्रतिष्ठित्यै पञ्चविꣳशो ऽग्निष्टोमो भवति प्रजापतेर् आप्त्यै महाव्रतवान् अन्नाद्यस्यावरुद्ध्यै विश्वजित् सर्वपृष्ठो ऽतिरात्रो भवति सर्वस्याभिजित्यै ॥
bṛhaspatir akāmayata brahmavarcasī syām iti sa etam aṣṭarātram apaśyat tam āharat tenāyajata tato vai sa brahmavarcasy abhavat | ya evaṃ vidvān aṣṭarātreṇa yajate brahmavarcasy eva bhavati | aṣṭarātro bhavati | aṣṭākṣarā gāyatrī gāyatrī brahmavarcasam | gāyatriyaiva brahmavarcasam ava runddhe | aṣṭarātro bhavati catasro vai diśaḥ | catasro 'vāntaradiśāḥ | digbhya eva brahmavarcasam ava runddhe || trivṛd agniṣṭomo bhavati teja evāva runddhe pañcadaśo bhavati | indriyam evāva runddhe saptadaśo bhavaty annādyasyāvaruddhyai | atho praiva tena jāyate | ekavim̐śo bhavati pratiṣṭhityai | atho rucam evātman dhatte triṇavo bhavati vijityai trayastrim̐śo bhavati pratiṣṭhityai pañcavim̐śo 'gniṣṭomo bhavati prajāpater āptyai mahāvratavān annādyasyāvaruddhyai viśvajit sarvapṛṣṭho 'tirātro bhavati sarvasyābhijityai ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.