वसिष्ठो हतपुत्रो ऽकामयत विन्देय प्रजाम् अभि सौदासान् भवेयम् इति स एतम् एकस्मान्नपञ्चाशम् अपश्यत् तम् आहरत् तेनायजत ततो वै सो ऽविन्दत प्रजाम् अभि सौदासान् अभवत् । य एवं विद्वाꣳस एकस्मान्नपञ्चाशम् आसते विन्दन्ते प्रजाम् अभि भ्रातृव्यान् भवन्ति त्रयस् त्रिवृतो ऽग्निष्टोमा भवन्ति वज्रस्यैव मुखꣳ सꣳ श्यन्ति दश पञ्चदशा भवन्ति पञ्चदशो वज्रः ॥ वज्रम् एव भ्रातृव्येभ्यः प्र हरन्ति षोडशिमद् दशमम् अहर् भवति वज्र एव वीर्यं दधति द्वादश सप्तदशा भवन्ति । अन्नाद्यस्यावरुद्ध्यै । अथो प्रैव तैर् जायन्ते पृष्ठ्यः षडहो भवति षड् वा ऋतवः षट् पृष्ठानि पृष्ठैर् एवर्तून् अन्वारोहन्त्य् ऋतुभिः संवत्सरम् । ते संवत्सर एव प्रति तिष्ठन्ति द्वादशैकविꣳशा भवन्ति प्रतिष्ठित्यै । अथो रुचम् एवात्मन् दधते बहवः षोडशिनो भवन्ति विजित्यै षड् आश्विनानि भवन्ति षड् वा ऋतवः । ऋतुष्व् एव प्रति तिष्ठन्ति । ऊनातिरिक्ता वा एता रात्रयः । ऊनास् तद् यद् एकस्यै न पञ्चाशद् अतिरिक्तास् तद् यद् भूयसीर् अष्टाचत्वारिꣳशतः । ऊनाच् च खलु वा अतिरिक्ताच् च प्रजापतिः प्राजायत । ये प्रजाकामाः पशुकामाः स्युस् त एता आसीरन् प्रैव जायन्ते प्रजया पशुभिः । वैराजो वा एष यज्ञो यद् एकस्मान्नपञ्चाशः । य एवं विद्वाꣳस एकस्मान्नपञ्चाशम् आसते विराजम् एव गच्छन्त्य् अन्नादा भवन्ति । अतिरात्राव् अभितो भवतः । अन्नाद्यस्य परिगृहीत्यै ॥
vasiṣṭho hataputro 'kāmayata vindeya prajām abhi saudāsān bhaveyam iti sa etam ekasmānnapañcāśam apaśyat tam āharat tenāyajata tato vai so 'vindata prajām abhi saudāsān abhavat | ya evaṃ vidvām̐sa ekasmānnapañcāśam āsate vindante prajām abhi bhrātṛvyān bhavanti trayas trivṛto 'gniṣṭomā bhavanti vajrasyaiva mukham̐ sam̐ śyanti daśa pañcadaśā bhavanti pañcadaśo vajraḥ || vajram eva bhrātṛvyebhyaḥ pra haranti ṣoḍaśimad daśamam ahar bhavati vajra eva vīryaṃ dadhati dvādaśa saptadaśā bhavanti | annādyasyāvaruddhyai | atho praiva tair jāyante pṛṣṭhyaḥ ṣaḍaho bhavati ṣaḍ vā ṛtavaḥ ṣaṭ pṛṣṭhāni pṛṣṭhair evartūn anvārohanty ṛtubhiḥ saṃvatsaram | te saṃvatsara eva prati tiṣṭhanti dvādaśaikavim̐śā bhavanti pratiṣṭhityai | atho rucam evātman dadhate bahavaḥ ṣoḍaśino bhavanti vijityai ṣaḍ āśvināni bhavanti ṣaḍ vā ṛtavaḥ | ṛtuṣv eva prati tiṣṭhanti | ūnātiriktā vā etā rātrayaḥ | ūnās tad yad ekasyai na pañcāśad atiriktās tad yad bhūyasīr aṣṭācatvārim̐śataḥ | ūnāc ca khalu vā atiriktāc ca prajāpatiḥ prājāyata | ye prajākāmāḥ paśukāmāḥ syus ta etā āsīran praiva jāyante prajayā paśubhiḥ | vairājo vā eṣa yajño yad ekasmānnapañcāśaḥ | ya evaṃ vidvām̐sa ekasmānnapañcāśam āsate virājam eva gacchanty annādā bhavanti | atirātrāv abhito bhavataḥ | annādyasya parigṛhītyai ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.