संवत्सराय दीक्षिष्यमाणा एकाष्टकायां दीक्षेरन् । एषा वै संवत्सरस्य पत्नी यद् एकाष्टका । एतस्यां वा एष एताꣳ रात्रिं वसति साक्षाद् एव संवत्सरम् आरभ्य दीक्षन्ते । आर्तं वा एते संवत्सरस्याभि दीक्षन्ते य एकाष्टकायां दीक्षन्ते ऽन्तनामानाव् ऋतू भवतः । व्यस्तं वा एते संवत्सरस्याभि दीक्षन्ते य एकाष्टकायां दीक्षन्ते ऽन्तनामानाव् ऋतू भवतः फल्गुनीपूर्णमासे दीक्षेरन् मुखं वा एतत् संवत्सरस्य यत् फल्गुनीपूर्णमासः । मुखत एव संवत्सरम् आरभ्य दीक्षन्ते तस्यैकैव निर्या यत् साम्मेध्ये विषूवान्त् सम्पद्यते चित्रापूर्णमासे दीक्षेरन् मुखं वा एतत् संवत्सरस्य यच् चित्रापूर्णमासः । मुखत एव संवत्सरम् आरभ्य दीक्षन्ते तस्य न का चन निर्या भवति चतुरहे पुरस्तात् पौर्णमास्यै दीक्षेरन् तेषाम् एकाष्टकायां क्रयः सम् पद्यते तेनैकाष्टकां न छम्बट् कुर्वन्ति तेषाम् पूर्वपक्षे सुत्या सम् पद्यते पूर्वपक्षम् मासा अभि सम् पद्यन्ते ते पूर्वपक्ष उत् तिष्ठन्ति तान् उत्तिष्ठत ओषधयो वनस्पतयो ऽनूत् तिष्ठन्ति तान् कल्याणी कीर्तिर् अनूत् तिष्ठति । अरात्सुर् इमे यजमाना इति तद् अनु सर्वे राध्नुवन्ति ॥
saṃvatsarāya dīkṣiṣyamāṇā ekāṣṭakāyāṃ dīkṣeran | eṣā vai saṃvatsarasya patnī yad ekāṣṭakā | etasyāṃ vā eṣa etām̐ rātriṃ vasati sākṣād eva saṃvatsaram ārabhya dīkṣante | ārtaṃ vā ete saṃvatsarasyābhi dīkṣante ya ekāṣṭakāyāṃ dīkṣante 'ntanāmānāv ṛtū bhavataḥ | vyastaṃ vā ete saṃvatsarasyābhi dīkṣante ya ekāṣṭakāyāṃ dīkṣante 'ntanāmānāv ṛtū bhavataḥ phalgunīpūrṇamāse dīkṣeran mukhaṃ vā etat saṃvatsarasya yat phalgunīpūrṇamāsaḥ | mukhata eva saṃvatsaram ārabhya dīkṣante tasyaikaiva niryā yat sāmmedhye viṣūvānt sampadyate citrāpūrṇamāse dīkṣeran mukhaṃ vā etat saṃvatsarasya yac citrāpūrṇamāsaḥ | mukhata eva saṃvatsaram ārabhya dīkṣante tasya na kā cana niryā bhavati caturahe purastāt paurṇamāsyai dīkṣeran teṣām ekāṣṭakāyāṃ krayaḥ sam padyate tenaikāṣṭakāṃ na chambaṭ kurvanti teṣām pūrvapakṣe sutyā sam padyate pūrvapakṣam māsā abhi sam padyante te pūrvapakṣa ut tiṣṭhanti tān uttiṣṭhata oṣadhayo vanaspatayo 'nūt tiṣṭhanti tān kalyāṇī kīrtir anūt tiṣṭhati | arātsur ime yajamānā iti tad anu sarve rādhnuvanti ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.