Vājasaneyi Saṃhitā (Śukla Yajurveda, as given on Wikisource) 23

हिरण्यगर्भः सम् अवर्तताग्रे भूतस्य जातः पतिर् एक ऽ आसीत् । स दाधार पृथिवीं द्याम् उतेमां कस्मै देवाय हविषा विधेम ॥

hiraṇyagarbhaḥ sam avartatāgre bhūtasya jātaḥ patir eka ' āsīt | sa dādhāra pṛthivīṃ dyām utemāṃ kasmai devāya haviṣā vidhema ||

उपयामगृहीतो ऽसि प्रजापतये त्वा जुष्टं गृह्णामि । एष ते योनिः सूर्यस् ते महिमा । यस् ते ऽहन्त् संवत्सरे महिमा संबभूव यस् ते वायाव् अन्तरिक्षे महिमा संबभूव यस् ते दिवि सूर्ये महिमा संबभूव तस्मै ते महिम्ने प्रजापतये स्वाहा देवेभ्यः ॥

upayāmagṛhīto 'si prajāpataye tvā juṣṭaṃ gṛhṇāmi | eṣa te yoniḥ sūryas te mahimā | yas te 'hant saṃvatsare mahimā saṃbabhūva yas te vāyāv antarikṣe mahimā saṃbabhūva yas te divi sūrye mahimā saṃbabhūva tasmai te mahimne prajāpataye svāhā devebhyaḥ ||

Sanskrit only: no published translation is held for this verse.

यः प्राणतो निमिषतो महित्वैक ऽ इद् राजा जगतो बभूव । य ऽ ईशे ऽ अस्य द्विपदश् चतुष्पदः कस्मै देवाय हविषा विधेम ॥

yaḥ prāṇato nimiṣato mahitvaika ' id rājā jagato babhūva | ya ' īśe ' asya dvipadaś catuṣpadaḥ kasmai devāya haviṣā vidhema ||

उपयामगृहीतो ऽसि प्रजापतये त्वा जुष्टं गृह्णामि । एष ते योनिश् चन्द्रस् ते महिमा । यस् ते रात्रौ संवत्सरे महिमा संबभूव यस् ते पृथिव्याम् अग्नौ महिमा संबभूव यस् ते नक्षत्रेषु चन्द्रमसि महिमा संबभूव तस्मै ते महिम्ने प्रजापतये देवेभ्यः स्वाहा ॥

upayāmagṛhīto 'si prajāpataye tvā juṣṭaṃ gṛhṇāmi | eṣa te yoniś candras te mahimā | yas te rātrau saṃvatsare mahimā saṃbabhūva yas te pṛthivyām agnau mahimā saṃbabhūva yas te nakṣatreṣu candramasi mahimā saṃbabhūva tasmai te mahimne prajāpataye devebhyaḥ svāhā ||

Sanskrit only: no published translation is held for this verse.

युञ्जन्ति ब्रध्नम् अरुषं चरन्तं परि तस्थुषः । रोचन्ते रोचना दिवि ॥

yuñjanti bradhnam aruṣaṃ carantaṃ pari tasthuṣaḥ | rocante rocanā divi ||

युञ्जन्त्य् अस्य काम्या हरी विपक्षसा रथे । शोणा धृष्णू नृवाहसा ॥

yuñjanty asya kāmyā harī vipakṣasā rathe | śoṇā dhṛṣṇū nṛvāhasā ||

यद् वातो ऽ अपो ऽ अगनीगन् प्रियाम् इन्द्रस्य तन्वम् । एतꣳ स्तोतर् अनेन पथा पुनर् अश्वम् आ वर्तयासि नः ॥

yad vāto ' apo ' aganīgan priyām indrasya tanvam | etam̐ stotar anena pathā punar aśvam ā vartayāsi naḥ ||

Sanskrit only: no published translation is held for this verse.

वसवस् त्वाञ्जन्तु गायत्रेण छन्दसा । रुद्रास् त्वाञ्जन्तु त्रैष्टुभेन छन्दसा । आदित्यास् त्वाञ्जन्तु जागतेन छन्दसा । भूर् भुवः स्वर् लाजी3ञ् छाची3न् यव्ये गव्यऽ एतद् अन्नम् अत्त देवा ऽ एतद् अन्नम् अद्धि प्रजापते ॥

vasavas tvāñjantu gāyatreṇa chandasā | rudrās tvāñjantu traiṣṭubhena chandasā | ādityās tvāñjantu jāgatena chandasā | bhūr bhuvaḥ svar lājī3ñ chācī3n yavye gavya' etad annam atta devā ' etad annam addhi prajāpate ||

Sanskrit only: no published translation is held for this verse.

कः स्विद् एकाकी चरति क ऽ उ स्विज् जायते पुनः । किꣳ स्विद्धिमस्य भेषजं किम् व् आवपनं महत् ॥

kaḥ svid ekākī carati ka ' u svij jāyate punaḥ | kim̐ sviddhimasya bheṣajaṃ kim v āvapanaṃ mahat ||

Sanskrit only: no published translation is held for this verse.

सूर्य ऽ एकाकी चरति चन्द्रमा जायते पुनः । अग्निर् हिमस्य भेषजं भूमिर् आवपनं महत् ॥

sūrya ' ekākī carati candramā jāyate punaḥ | agnir himasya bheṣajaṃ bhūmir āvapanaṃ mahat ||

Sanskrit only: no published translation is held for this verse.

का स्विद् आसीत् पूर्वचित्तिः किꣳ स्विद् आसीद् बृहद् वयः । का स्विद् आसीत् पिलिप्पिला का स्विद् आसीत् पिशङ्गिला ॥

kā svid āsīt pūrvacittiḥ kim̐ svid āsīd bṛhad vayaḥ | kā svid āsīt pilippilā kā svid āsīt piśaṅgilā ||

Sanskrit only: no published translation is held for this verse.

द्यौर् आसीत् पूर्वचित्तिः अश्व ऽ आसीद् बृहद् वयः । अविर् आसीत् पिलिप्पिला रात्रिर् आसीत् पिशङ्गिला ॥

dyaur āsīt pūrvacittiḥ aśva ' āsīd bṛhad vayaḥ | avir āsīt pilippilā rātrir āsīt piśaṅgilā ||

Sanskrit only: no published translation is held for this verse.

वायुष् ट्वा पचतैर् अवतु । असितग्रीवश् छागैः । न्यग्रोधश् चमसैः । शल्मलिर् वृद्ध्या । एष स्य राथ्यो वृषा । पड्भिश् चतुर्भिर् एद् अगन् । ब्रह्माकृष्णश् च नो ऽवतु । नमो ऽग्नये ॥

vāyuṣ ṭvā pacatair avatu | asitagrīvaś chāgaiḥ | nyagrodhaś camasaiḥ | śalmalir vṛddhyā | eṣa sya rāthyo vṛṣā | paḍbhiś caturbhir ed agan | brahmākṛṣṇaś ca no 'vatu | namo 'gnaye ||

Sanskrit only: no published translation is held for this verse.

सꣳशितो रश्मिना रथः सꣳशितो रश्मिना हयः । सꣳशितो अप्स्व् अप्सुजा ब्रह्मा सोमपुरोगवः ॥

sam̐śito raśminā rathaḥ sam̐śito raśminā hayaḥ | sam̐śito apsv apsujā brahmā somapurogavaḥ ||

Sanskrit only: no published translation is held for this verse.

स्वयं वाजिꣳस् तन्वं कल्पयस्व स्वयं यजस्व स्वयं जुषस्व । महिमा ते ऽन्येन न संनशे ॥

svayaṃ vājim̐s tanvaṃ kalpayasva svayaṃ yajasva svayaṃ juṣasva | mahimā te 'nyena na saṃnaśe ||

Sanskrit only: no published translation is held for this verse.

न वा ऽ उ ऽ एतन् म्रियसे न रिष्यसि देवाꣳ२ऽ इद् एषि पथिभिः सुगेभिः । यत्रासते सुकृतो यत्र ते ययुस् तत्र त्वा देवः सविता दधातु ॥

na vā ' u ' etan mriyase na riṣyasi devām̐2' id eṣi pathibhiḥ sugebhiḥ | yatrāsate sukṛto yatra te yayus tatra tvā devaḥ savitā dadhātu ||

Sanskrit only: no published translation is held for this verse.

अग्निः पशुर् आसीत् तेनायजन्त स ऽ एतं लोकम् अजयद् यस्मिन्न् अग्निः स ते लोको भविष्यति तं जेष्यसि पिबैता ऽ अपः । वायुः पशुर् आसीत् तेनायजन्त स ऽ एतं लोकम् अजयद् यस्मिन् वायुः स ते लोको भविष्यति तं जेष्यसि पिबैता ऽ अपः । सूर्यः पशुर् आसीत् तेनायजन्त स ऽ एतं लोकम् अजयद् यस्मिन्त् सूर्यः स ते लोको भविष्यति तं जेष्यसि पिबैता ऽ अपः ॥

agniḥ paśur āsīt tenāyajanta sa ' etaṃ lokam ajayad yasminn agniḥ sa te loko bhaviṣyati taṃ jeṣyasi pibaitā ' apaḥ | vāyuḥ paśur āsīt tenāyajanta sa ' etaṃ lokam ajayad yasmin vāyuḥ sa te loko bhaviṣyati taṃ jeṣyasi pibaitā ' apaḥ | sūryaḥ paśur āsīt tenāyajanta sa ' etaṃ lokam ajayad yasmint sūryaḥ sa te loko bhaviṣyati taṃ jeṣyasi pibaitā ' apaḥ ||

Sanskrit only: no published translation is held for this verse.

प्राणाय स्वाहा । अपानाय स्वाहा । व्यानाय स्वाहा अम्बे ऽ अम्बिके ऽम्बालिके न मा नयति कश् चन । ससस्त्य् अश्वकः सुभद्रिकां काम्पीलवासिनीम् ॥

prāṇāya svāhā | apānāya svāhā | vyānāya svāhā ambe ' ambike 'mbālike na mā nayati kaś cana | sasasty aśvakaḥ subhadrikāṃ kāmpīlavāsinīm ||

Sanskrit only: no published translation is held for this verse.

गणानां त्वा गणपतिꣳ हवामहे प्रियाणां त्वा प्रियपतिꣳ हवामहे निधीनां त्वा निधिपतिꣳ हवामहे वसो मम । आहम् अजानि गर्भधम् आ त्वम् अजासि गर्भधम् ॥

gaṇānāṃ tvā gaṇapatim̐ havāmahe priyāṇāṃ tvā priyapatim̐ havāmahe nidhīnāṃ tvā nidhipatim̐ havāmahe vaso mama | āham ajāni garbhadham ā tvam ajāsi garbhadham ||

Sanskrit only: no published translation is held for this verse.

ता ऽ उभौ चतुरः पदः सम्प्र सारयाव स्वर्गे लोके प्रोर्णुवाथां वृषा वाजी रेतोधा रेतो दधातु ॥

tā ' ubhau caturaḥ padaḥ sampra sārayāva svarge loke prorṇuvāthāṃ vṛṣā vājī retodhā reto dadhātu ||

Sanskrit only: no published translation is held for this verse.

उत्सक्थ्या ऽ अव गुदं धेहि सम् अञ्जिं चारया वृषन् । य स्त्रीणां जीवभोजनः ॥

utsakthyā ' ava gudaṃ dhehi sam añjiṃ cārayā vṛṣan | ya strīṇāṃ jīvabhojanaḥ ||

Sanskrit only: no published translation is held for this verse.

यकासकौ शकुन्तिकाहलग् इति वञ्चति । आ हन्ति गभे पसो निगल्गलीति धारका ॥

yakāsakau śakuntikāhalag iti vañcati | ā hanti gabhe paso nigalgalīti dhārakā ||

Sanskrit only: no published translation is held for this verse.

यको ऽसकौ शकुन्तक ऽ आहलग् इति वञ्चति । विवक्षत ऽ इव ते मुखम् अध्वर्यो मा नस् त्वम् अभि भाषथाः ॥

yako 'sakau śakuntaka ' āhalag iti vañcati | vivakṣata ' iva te mukham adhvaryo mā nas tvam abhi bhāṣathāḥ ||

Sanskrit only: no published translation is held for this verse.

माता च ते पिता च ते ऽग्रं वृक्षस्य रोहतः । प्रतिलामीति ते पिता गभे मुष्टिम् अतꣳसयत् ॥

mātā ca te pitā ca te 'graṃ vṛkṣasya rohataḥ | pratilāmīti te pitā gabhe muṣṭim atam̐sayat ||

Sanskrit only: no published translation is held for this verse.

माता च ते पिता च ते ऽग्रे वृक्षस्य क्रीडतः । विवक्षत ऽइव ते मुखं ब्रह्मन् मा नस् त्वं वदो बहु ॥

mātā ca te pitā ca te 'gre vṛkṣasya krīḍataḥ | vivakṣata 'iva te mukhaṃ brahman mā nas tvaṃ vado bahu ||

Sanskrit only: no published translation is held for this verse.

ऊर्ध्वम् एनाम् उच्छ्रापय गिरौ भारꣳ हरन्न् इव । अथास्यै मध्यम् एधताꣳ शीते वाते पुनन्न् इव ॥

ūrdhvam enām ucchrāpaya girau bhāram̐ harann iva | athāsyai madhyam edhatām̐ śīte vāte punann iva ||

Sanskrit only: no published translation is held for this verse.

ऊर्ध्वम् एनम् उच्छ्रापय गिरौ भारꣳ हरन्न् इव । अथास्य मध्यम् एजतु शीते वाते पुनन्न् इव ॥

ūrdhvam enam ucchrāpaya girau bhāram̐ harann iva | athāsya madhyam ejatu śīte vāte punann iva ||

Sanskrit only: no published translation is held for this verse.

यद् अस्या ऽ अꣳहुभेद्याः कृधु स्थूलम् उपातसत् । मुष्काविदस्या ऽ एजतो गोशफे शकुलाव् इव ॥

yad asyā ' am̐hubhedyāḥ kṛdhu sthūlam upātasat | muṣkāvidasyā ' ejato gośaphe śakulāv iva ||

Sanskrit only: no published translation is held for this verse.

यद् देवासो ललामगुं प्र विष्टीमिनम् आविषुः । सक्थ्ना देदिश्यते नारी सत्यस्याक्षिभुवो यथा ॥

yad devāso lalāmaguṃ pra viṣṭīminam āviṣuḥ | sakthnā dediśyate nārī satyasyākṣibhuvo yathā ||

Sanskrit only: no published translation is held for this verse.

यद्धरिणो यवम् अत्ति न पुष्टं पशु मन्यते । शूद्रा यद् अर्यजारा न पोषाय धनायति ॥

yaddhariṇo yavam atti na puṣṭaṃ paśu manyate | śūdrā yad aryajārā na poṣāya dhanāyati ||

Sanskrit only: no published translation is held for this verse.

यद्धरिणो यवम् अत्ति न पुष्टं बहु मन्यते । शूद्रो यद् अर्यायै जारो न पोषम् अनु मन्यते ॥

yaddhariṇo yavam atti na puṣṭaṃ bahu manyate | śūdro yad aryāyai jāro na poṣam anu manyate ||

Sanskrit only: no published translation is held for this verse.

दधिक्राव्णो ऽ अकारिषं जिष्णोर् अश्वस्य वाजिनः । सुरभि नो मुखा करत् प्र ण ऽ आयूꣳषि तारिषत् ॥

dadhikrāvṇo ' akāriṣaṃ jiṣṇor aśvasya vājinaḥ | surabhi no mukhā karat pra ṇa ' āyūm̐ṣi tāriṣat ||

गायत्री त्रिष्टुब् जगत्य् अनुष्टुप् पङ्क्त्या सह । बृहत्य् उष्णिहा ककुप् सूचीभिः शम्यन्तु त्वा ॥

gāyatrī triṣṭub jagaty anuṣṭup paṅktyā saha | bṛhaty uṣṇihā kakup sūcībhiḥ śamyantu tvā ||

Sanskrit only: no published translation is held for this verse.

द्विपदा याश् चतुष्पदास् त्रिपदा याश् च षट्पदाः । विच्छन्दा याश् च सच्छन्दाः सूचीभिः शम्यन्तु त्वा ॥

dvipadā yāś catuṣpadās tripadā yāś ca ṣaṭpadāḥ | vicchandā yāś ca sacchandāḥ sūcībhiḥ śamyantu tvā ||

Sanskrit only: no published translation is held for this verse.

महानाम्न्यो रेवत्यो विश्वा आशाः प्रभूवरीः । मैघीर् विद्युतो वाचः सूचीभिः शम्यन्तु त्वा ॥

mahānāmnyo revatyo viśvā āśāḥ prabhūvarīḥ | maighīr vidyuto vācaḥ sūcībhiḥ śamyantu tvā ||

Sanskrit only: no published translation is held for this verse.

नार्यस् ते पत्न्यो लोम विचिन्वन्तु मनीषया । देवानां पत्न्यो दिशः सूचीभिः शम्यन्तु त्वा ॥

nāryas te patnyo loma vicinvantu manīṣayā | devānāṃ patnyo diśaḥ sūcībhiḥ śamyantu tvā ||

Sanskrit only: no published translation is held for this verse.

रजता हरिणीः सीसा युजो युज्यन्ते कर्मभिः । अश्वस्य वाजिनस् त्वचि सिमाः शम्यन्तु शम्यन्तीः ॥

rajatā hariṇīḥ sīsā yujo yujyante karmabhiḥ | aśvasya vājinas tvaci simāḥ śamyantu śamyantīḥ ||

Sanskrit only: no published translation is held for this verse.

कुविद् अङ्ग यवमन्तो यवं चिद् यथा दान्त्य् अनुपूर्वं वियूय । इहेहैषां कृणुहि भोजनानि ये बर्हिषो नम ऽ उक्तिं यजन्ति ॥

kuvid aṅga yavamanto yavaṃ cid yathā dānty anupūrvaṃ viyūya | ihehaiṣāṃ kṛṇuhi bhojanāni ye barhiṣo nama ' uktiṃ yajanti ||

कस् त्वा छ्यति कस् त्वा वि शास्ति कस् ते गात्राणि शम्यति । क ऽ उ ते शमिता कविः ॥

kas tvā chyati kas tvā vi śāsti kas te gātrāṇi śamyati | ka ' u te śamitā kaviḥ ||

Sanskrit only: no published translation is held for this verse.

ऋतवस्त ऽ ऋतुथा पर्व शमितारो वि शासतु । संवत्सरस्य तेजसा शमीभिः शम्यन्तु त्वा ॥

ṛtavasta ' ṛtuthā parva śamitāro vi śāsatu | saṃvatsarasya tejasā śamībhiḥ śamyantu tvā ||

Sanskrit only: no published translation is held for this verse.

अर्धमासाः परूꣳषि ते मासा ऽ आ च्छ्यन्तु शम्यन्तः । अहोरात्राणि मरुतो विलिष्टꣳ सूदयन्तु ते ॥

ardhamāsāḥ parūm̐ṣi te māsā ' ā cchyantu śamyantaḥ | ahorātrāṇi maruto viliṣṭam̐ sūdayantu te ||

Sanskrit only: no published translation is held for this verse.

दैव्या ऽ अध्वर्यवस् त्वा छ्यन्तु वि च आसतु । गात्राणि पर्वशस् ते सिमाः कृण्वन्तु शम्यन्तीः ॥

daivyā ' adhvaryavas tvā chyantu vi ca āsatu | gātrāṇi parvaśas te simāḥ kṛṇvantu śamyantīḥ ||

Sanskrit only: no published translation is held for this verse.

द्यौस् ते पृथिव्यन्तरिक्षं वायुश् छिद्रं पृणातु ते । सूयस् ते नक्षत्रैः सह लोकं कृणोतु साधुया ॥

dyaus te pṛthivyantarikṣaṃ vāyuś chidraṃ pṛṇātu te | sūyas te nakṣatraiḥ saha lokaṃ kṛṇotu sādhuyā ||

Sanskrit only: no published translation is held for this verse.

शं ते परेभ्यो गात्रेभ्यः शम् अस्त्व् अवरेभ्यः । शम् अस्थभ्यो मज्जभ्यः शम् व् अस्तु तन्वै तव ॥

śaṃ te parebhyo gātrebhyaḥ śam astv avarebhyaḥ | śam asthabhyo majjabhyaḥ śam v astu tanvai tava ||

Sanskrit only: no published translation is held for this verse.

कः स्विद् एकाकी चरति क ऽ उ स्विज् जायते पुनः । किꣳ स्विद्धिमस्य भेषजं किम् व् आवपनं महत् ॥

kaḥ svid ekākī carati ka ' u svij jāyate punaḥ | kim̐ sviddhimasya bheṣajaṃ kim v āvapanaṃ mahat ||

Sanskrit only: no published translation is held for this verse.

सूर्य ऽ एकाकी चरति चन्द्रमा जायते पुनः । अग्निर् हिमस्य भेषजं भूमिर् आवपनं महत् ॥

sūrya ' ekākī carati candramā jāyate punaḥ | agnir himasya bheṣajaṃ bhūmir āvapanaṃ mahat ||

Sanskrit only: no published translation is held for this verse.

किꣳ स्वित् सूर्यसमं ज्योतिः किꣳ समुद्रसमꣳ सरः । किꣳ स्वित् पृथिव्यै वर्षीयः कस्य मात्रा न विद्यते ॥

kim̐ svit sūryasamaṃ jyotiḥ kim̐ samudrasamam̐ saraḥ | kim̐ svit pṛthivyai varṣīyaḥ kasya mātrā na vidyate ||

Sanskrit only: no published translation is held for this verse.

ब्रह्म सूर्यसमं ज्योतिर् द्यौः समुद्रसमꣳ सरः । इन्द्रः पृथिव्यै वर्षीयान् गोस् तु मात्रा न विद्यते ॥

brahma sūryasamaṃ jyotir dyauḥ samudrasamam̐ saraḥ | indraḥ pṛthivyai varṣīyān gos tu mātrā na vidyate ||

Sanskrit only: no published translation is held for this verse.

पृच्छामि त्वा चितये देवसख यदि त्वम् अत्र मनसा जगन्थ । येषु विष्णुस् त्रिषु पदेष्व् एष्टस् तेषु विश्वं भुवनम् आ विवेशाꣳ३ऽ ॥

pṛcchāmi tvā citaye devasakha yadi tvam atra manasā jagantha | yeṣu viṣṇus triṣu padeṣv eṣṭas teṣu viśvaṃ bhuvanam ā viveśām̐3' ||

Sanskrit only: no published translation is held for this verse.

अपि तेषु त्रिषु पदेष्व् अस्मि येषु विश्वं भुवनम् आविवेश । सद्यः पर्य् एमि पृथिवीम् उत द्याम् एकेनाङ्गेन दिवो ऽ अस्य पृष्ठम् ॥

api teṣu triṣu padeṣv asmi yeṣu viśvaṃ bhuvanam āviveśa | sadyaḥ pary emi pṛthivīm uta dyām ekenāṅgena divo ' asya pṛṣṭham ||

Sanskrit only: no published translation is held for this verse.

केष्व् अन्तः पुरुष ऽ आ विवेश कान्य् अन्तः पुरुषे ऽ अर्पितानि । एतद् ब्रह्मन्न् उपवल्हामसि त्वा किꣳ स्विन् नः प्रति वोचास्य् अत्र ॥

keṣv antaḥ puruṣa ' ā viveśa kāny antaḥ puruṣe ' arpitāni | etad brahmann upavalhāmasi tvā kim̐ svin naḥ prati vocāsy atra ||

Sanskrit only: no published translation is held for this verse.

पञ्चस्व् अन्तः पुरुष ऽ आ विवेश तान्य् अन्तः पुरुषे ऽ अर्पितानि । एतत् त्वात्र प्रतिमन्वानो ऽ अस्मि न मायया भवस्य् उत्तरो मत् ॥

pañcasv antaḥ puruṣa ' ā viveśa tāny antaḥ puruṣe ' arpitāni | etat tvātra pratimanvāno ' asmi na māyayā bhavasy uttaro mat ||

Sanskrit only: no published translation is held for this verse.

का स्विद् आसीत् पूर्वचित्तिः किꣳ स्विद् आसीद् बृहद् वयः । का स्विद् आसीत् पिलिप्पिला का स्विद् आसीत् पिशङ्गिला ॥

kā svid āsīt pūrvacittiḥ kim̐ svid āsīd bṛhad vayaḥ | kā svid āsīt pilippilā kā svid āsīt piśaṅgilā ||

Sanskrit only: no published translation is held for this verse.

द्यौर् आसीत् पूर्वचित्तिः अश्वऽ आसीद् बृहद् वयः । अविर् आसीत् पिलिप्पिला रात्रिर् आसीत् पिशङ्गिला ॥

dyaur āsīt pūrvacittiḥ aśva' āsīd bṛhad vayaḥ | avir āsīt pilippilā rātrir āsīt piśaṅgilā ||

Sanskrit only: no published translation is held for this verse.

का ऽ ईमरे पिशंगिला का ऽ ईं कुरुपिशंगिला । क ऽ ईम् आस्कन्दम् अर्षति क ऽ ईं पन्थां वि सर्पति ॥

kā ' īmare piśaṃgilā kā ' īṃ kurupiśaṃgilā | ka ' īm āskandam arṣati ka ' īṃ panthāṃ vi sarpati ||

Sanskrit only: no published translation is held for this verse.

अजारे पिशंगिला श्वावित् कुरुपिशंगिला । शश आस्कन्दम् अर्षत्य् अहिः पन्थां वि सर्पति ॥

ajāre piśaṃgilā śvāvit kurupiśaṃgilā | śaśa āskandam arṣaty ahiḥ panthāṃ vi sarpati ||

Sanskrit only: no published translation is held for this verse.

कत्य् अस्य विष्ठाः कत्य् अक्षराणि कति होमासः कतिधा समिद्धः । यज्ञस्य त्वा विदथा पृच्छम् अत्र कति होतार ऽ ऋतुशो यजन्ति ॥

katy asya viṣṭhāḥ katy akṣarāṇi kati homāsaḥ katidhā samiddhaḥ | yajñasya tvā vidathā pṛccham atra kati hotāra ' ṛtuśo yajanti ||

Sanskrit only: no published translation is held for this verse.

षड् अस्य विष्ठाः शतम् अक्षराण्य् अशीतिर् होमाः समिधो ह तिस्रः । यज्ञस्य ते विदथा प्र ब्रवीमि सप्त होतार ऋतुशो यजन्ति ॥

ṣaḍ asya viṣṭhāḥ śatam akṣarāṇy aśītir homāḥ samidho ha tisraḥ | yajñasya te vidathā pra bravīmi sapta hotāra ṛtuśo yajanti ||

Sanskrit only: no published translation is held for this verse.

को ऽ अस्य वेद भुवनस्य नाभिं को द्यावापृथिवी ऽ अन्तरिक्षम् । कः सूर्यस्य वेद बृहतो जनित्रं को वेद चन्द्रमसं यतोजाः ॥

ko ' asya veda bhuvanasya nābhiṃ ko dyāvāpṛthivī ' antarikṣam | kaḥ sūryasya veda bṛhato janitraṃ ko veda candramasaṃ yatojāḥ ||

Sanskrit only: no published translation is held for this verse.

वेदाहम् अस्य भुवनस्य नाभिं वेद द्यावापृथिवी ऽ अन्तरिक्षम् । वेद सूर्यस्य बृहतो जनित्रं अथो वेद चन्द्रमसं यतोजाः ॥

vedāham asya bhuvanasya nābhiṃ veda dyāvāpṛthivī ' antarikṣam | veda sūryasya bṛhato janitraṃ atho veda candramasaṃ yatojāḥ ||

Sanskrit only: no published translation is held for this verse.

पृच्छामि त्वा परम् अन्तं पृथिव्याः पृच्छामि यत्र भुवनस्य नाभिः । पृच्छामि त्वा वृष्णो ऽ अश्वस्य रेतः पृच्छामि वाचः परमं व्योम ॥

pṛcchāmi tvā param antaṃ pṛthivyāḥ pṛcchāmi yatra bhuvanasya nābhiḥ | pṛcchāmi tvā vṛṣṇo ' aśvasya retaḥ pṛcchāmi vācaḥ paramaṃ vyoma ||

इयं वेदिः परो ऽ अन्तः पृथिव्या ऽ अयं यज्ञो यत्र भुवनस्य नाभिः । अयꣳ सोमो वृष्णो ऽ अश्वस्य रेतः ब्रह्मायं वाचः परमं व्योम ॥

iyaṃ vediḥ paro ' antaḥ pṛthivyā ' ayaṃ yajño yatra bhuvanasya nābhiḥ | ayam̐ somo vṛṣṇo ' aśvasya retaḥ brahmāyaṃ vācaḥ paramaṃ vyoma ||

सुभूः स्वयम्भूः प्रथमो ऽन्तर् महत्य् अर्णवे । दधे ह गर्भम् ऋत्वियं यतो जातः प्रजापतिः ॥

subhūḥ svayambhūḥ prathamo 'ntar mahaty arṇave | dadhe ha garbham ṛtviyaṃ yato jātaḥ prajāpatiḥ ||

Sanskrit only: no published translation is held for this verse.

होता यक्षत् प्रजापतिꣳ सोमस्य महिम्नः । जुषतां पिबतु सोमꣳ होतर् यज ॥

hotā yakṣat prajāpatim̐ somasya mahimnaḥ | juṣatāṃ pibatu somam̐ hotar yaja ||

Sanskrit only: no published translation is held for this verse.

प्रजापते न त्वद् एतान्य् अन्यो विश्वा रूपाणि परि ता बभूव । यत्कामास् ते जुहुमस् तन् नो ऽ अस्तु । वयꣳ स्याम पतयो रयीणाम्॥

prajāpate na tvad etāny anyo viśvā rūpāṇi pari tā babhūva | yatkāmās te juhumas tan no ' astu | vayam̐ syāma patayo rayīṇām||