Vājasaneyi Saṃhitā (Śukla Yajurveda, as given on Wikisource) 25

शादं दद्भिर् अवकां दन्तमूलैर् मृदं बर्स्वैस् तेगान् दꣳष्ट्राभ्याꣳ सरस्वत्या ऽ अग्रजिह्वं जिह्वाया ऽ उत्सादम् अवक्रन्देन तालु वाजꣳ हनुभ्याम् अप ऽ आस्येन वृषणम् आण्डाभ्याम् आदित्याꣳ श्मश्रुभिः पन्थानं भ्रूभ्यां द्यावापृथिवी वर्तोभ्यां विद्युतं कनीनकाभ्याꣳ शुक्लाय स्वाहा कृष्णाय स्वाहा पार्याणि पक्ष्माण्य् अवार्या ऽ इक्षवो वार्याणि पक्ष्माणि पार्या ऽ इक्षवः ॥

śādaṃ dadbhir avakāṃ dantamūlair mṛdaṃ barsvais tegān dam̐ṣṭrābhyām̐ sarasvatyā ' agrajihvaṃ jihvāyā ' utsādam avakrandena tālu vājam̐ hanubhyām apa ' āsyena vṛṣaṇam āṇḍābhyām ādityām̐ śmaśrubhiḥ panthānaṃ bhrūbhyāṃ dyāvāpṛthivī vartobhyāṃ vidyutaṃ kanīnakābhyām̐ śuklāya svāhā kṛṣṇāya svāhā pāryāṇi pakṣmāṇy avāryā ' ikṣavo vāryāṇi pakṣmāṇi pāryā ' ikṣavaḥ ||

Sanskrit only: no published translation is held for this verse.

वातं प्राणेनापानेन नासिके ऽ उपयामम् अधरेणौष्ठेन सद् उत्तरेण प्रकाशेनान्तरम् अनूकाशेन बाह्यं निवेष्यं मूर्ध्ना स्तनयित्नुं निर्बाधेनाशनिं मस्तिष्केण विद्युतं कनीनकाभ्यां कर्णाभ्याꣳ श्रोत्रꣳ श्रोत्राभ्यां कर्णौ तेदनीम् अधरकण्ठेनापः शुष्ककण्ठेन चित्तं मन्याभिर् अदितिꣳ शीर्ष्णा निर्ऋतिं निर्जर्जल्पेन शीर्ष्णा संक्रोशैः प्राणान् रेष्माणꣳ स्तुपेन ॥

vātaṃ prāṇenāpānena nāsike ' upayāmam adhareṇauṣṭhena sad uttareṇa prakāśenāntaram anūkāśena bāhyaṃ niveṣyaṃ mūrdhnā stanayitnuṃ nirbādhenāśaniṃ mastiṣkeṇa vidyutaṃ kanīnakābhyāṃ karṇābhyām̐ śrotram̐ śrotrābhyāṃ karṇau tedanīm adharakaṇṭhenāpaḥ śuṣkakaṇṭhena cittaṃ manyābhir aditim̐ śīrṣṇā nirṛtiṃ nirjarjalpena śīrṣṇā saṃkrośaiḥ prāṇān reṣmāṇam̐ stupena ||

Sanskrit only: no published translation is held for this verse.

मशकान् केशैर् इन्द्रꣳ स्वपसा वहेन बृहस्पतिꣳ शकुनिसादेन कूर्माञ्छफैर् आक्रमणꣳ स्थूराभ्याम् ऋक्षलाभिः कपिञ्जलान् जवं जङ्घाभ्याम् अध्वानं बाहुभ्यां जाम्बीलेनारण्यम् अग्निम् अतिरुग्भ्यां पूषणं दोर्भ्याम् अश्विनाव् अꣳसाभ्याꣳ रुद्रꣳ रोराभ्याम् ॥

maśakān keśair indram̐ svapasā vahena bṛhaspatim̐ śakunisādena kūrmāñchaphair ākramaṇam̐ sthūrābhyām ṛkṣalābhiḥ kapiñjalān javaṃ jaṅghābhyām adhvānaṃ bāhubhyāṃ jāmbīlenāraṇyam agnim atirugbhyāṃ pūṣaṇaṃ dorbhyām aśvināv am̐sābhyām̐ rudram̐ rorābhyām ||

Sanskrit only: no published translation is held for this verse.

अग्नेः पक्षतिर् वायोर् निपक्षतिर् इन्द्रस्य तृतीया सोमस्य चतुर्थ्य् अदित्यै पञ्चमीन्द्राण्यै षष्ठी मरुताꣳ सप्तमी बृहस्पतेर् अष्टम्य् अर्यम्णो नवमी धातुर् दशमीन्द्रस्यैकादशी वरुणस्य द्वादशी यमस्य त्रयोदशी ॥

agneḥ pakṣatir vāyor nipakṣatir indrasya tṛtīyā somasya caturthy adityai pañcamīndrāṇyai ṣaṣṭhī marutām̐ saptamī bṛhaspater aṣṭamy aryamṇo navamī dhātur daśamīndrasyaikādaśī varuṇasya dvādaśī yamasya trayodaśī ||

Sanskrit only: no published translation is held for this verse.

इन्द्राग्न्योः पक्षतिर् सरस्वत्यै निपक्षतिर् मित्रस्य तृतीयापां चतुर्थी निर्ऋत्यै पञ्चम्य् अग्नीषोमयोः षष्ठी सर्पाणाꣳ सप्तमी विष्णोर् अष्टमी पूष्णो नवमी त्वष्टुर् दशमीन्द्रस्यैकादशी वरुणस्य द्वादशी यम्यै त्रयोदशी द्यावापृथिव्योर् दक्षिणं पार्श्वं विश्वेषां देवानाम् उत्तरम् ॥

indrāgnyoḥ pakṣatir sarasvatyai nipakṣatir mitrasya tṛtīyāpāṃ caturthī nirṛtyai pañcamy agnīṣomayoḥ ṣaṣṭhī sarpāṇām̐ saptamī viṣṇor aṣṭamī pūṣṇo navamī tvaṣṭur daśamīndrasyaikādaśī varuṇasya dvādaśī yamyai trayodaśī dyāvāpṛthivyor dakṣiṇaṃ pārśvaṃ viśveṣāṃ devānām uttaram ||

Sanskrit only: no published translation is held for this verse.

मरुताꣳ स्कन्धा विश्वेषां देवानां प्रथमा कीकसा रुद्राणां द्वितीयादित्यानां तृतीया वायोः पुच्छम् अग्नीषोमयोर् भासदौ क्रुञ्चौ श्रोणिभ्याम् इन्द्राबृहस्पती ऽ ऊरुभ्यां मित्रावरुणाव् अल्गाभ्याम् आक्रमणꣳ स्थूराभ्यां बलं कुष्ठाभ्याम् ॥

marutām̐ skandhā viśveṣāṃ devānāṃ prathamā kīkasā rudrāṇāṃ dvitīyādityānāṃ tṛtīyā vāyoḥ puccham agnīṣomayor bhāsadau kruñcau śroṇibhyām indrābṛhaspatī ' ūrubhyāṃ mitrāvaruṇāv algābhyām ākramaṇam̐ sthūrābhyāṃ balaṃ kuṣṭhābhyām ||

Sanskrit only: no published translation is held for this verse.

पूषणं वनिष्ठुनान्धाहीन्त् स्थूलगुदया सर्पान् गुदाभिर् विह्रुत ऽ आन्त्रैर् अपो वस्तिना वृषणम् आण्डाभ्यां वाजिनꣳ शेपेन प्रजाꣳ रेतसा चाषान् पित्तेन प्रदरान् पायुना कूश्माञ्छकपिण्डैः ॥

pūṣaṇaṃ vaniṣṭhunāndhāhīnt sthūlagudayā sarpān gudābhir vihruta ' āntrair apo vastinā vṛṣaṇam āṇḍābhyāṃ vājinam̐ śepena prajām̐ retasā cāṣān pittena pradarān pāyunā kūśmāñchakapiṇḍaiḥ ||

Sanskrit only: no published translation is held for this verse.

इन्द्रस्य क्रोडो ऽदित्यै पाजस्यं दिशां जत्रवो ऽदित्यै भसज् जीमूतान् हृदयौपशेनान्तरिक्षं पुरीतता नभ ऽ उदर्येण चक्रवाकौ मतस्नाभ्यां दिवं वृक्काभ्यां गिरीन् प्लाशिभिर् उपलान् प्लीह्ना वल्मीकान् क्लोमभिर् ग्लौभिर् गुल्मान् हिराभिः स्रवन्तीर् ह्रदान् कुक्षिभ्याꣳ समुद्रम् उदरेण वैश्वानरं भस्मना ॥

indrasya kroḍo 'dityai pājasyaṃ diśāṃ jatravo 'dityai bhasaj jīmūtān hṛdayaupaśenāntarikṣaṃ purītatā nabha ' udaryeṇa cakravākau matasnābhyāṃ divaṃ vṛkkābhyāṃ girīn plāśibhir upalān plīhnā valmīkān klomabhir glaubhir gulmān hirābhiḥ sravantīr hradān kukṣibhyām̐ samudram udareṇa vaiśvānaraṃ bhasmanā ||

Sanskrit only: no published translation is held for this verse.

विधृतिं नाभ्या धृतꣳ रसेनापो यूष्णा मरीचीर् विप्रुड्भिर् नीहारमूष्मणा शीनं वसया प्रुष्वा ऽ अश्रुभिर् ह्रादुनीर् दूषीकाभिर् अस्ना रक्षाꣳसि चित्राण्य् अङ्गैर् नक्षत्राणि रूपेण पृथिवीं त्वचा जुम्बकाय स्वाहा ॥

vidhṛtiṃ nābhyā dhṛtam̐ rasenāpo yūṣṇā marīcīr vipruḍbhir nīhāramūṣmaṇā śīnaṃ vasayā pruṣvā ' aśrubhir hrādunīr dūṣīkābhir asnā rakṣām̐si citrāṇy aṅgair nakṣatrāṇi rūpeṇa pṛthivīṃ tvacā jumbakāya svāhā ||

Sanskrit only: no published translation is held for this verse.

हिरण्यगर्भः सम् अवर्तताग्रे भूतस्य जातः पतिर् एक ऽ आसीत् । स दाधार पृथिवीं द्याम् उतेमां कस्मै देवाय हविषा विधेम ॥

hiraṇyagarbhaḥ sam avartatāgre bhūtasya jātaḥ patir eka ' āsīt | sa dādhāra pṛthivīṃ dyām utemāṃ kasmai devāya haviṣā vidhema ||

यः प्राणतो निमिषतो महित्वैक ऽ इद् राजा जगतो बभूव । य ऽ ईशे ऽ अस्य द्विपदश् चतुष्पदः कस्मै देवाय हविषा विधेम ॥

yaḥ prāṇato nimiṣato mahitvaika ' id rājā jagato babhūva | ya ' īśe ' asya dvipadaś catuṣpadaḥ kasmai devāya haviṣā vidhema ||

यस्येमे हिमवन्तो महित्वा यस्य समुद्रꣳ रसया सहाहुः । यस्येमाः प्रदिशो यस्य बाहू कस्मै देवाय हविषा विधेम ॥

yasyeme himavanto mahitvā yasya samudram̐ rasayā sahāhuḥ | yasyemāḥ pradiśo yasya bāhū kasmai devāya haviṣā vidhema ||

य ऽ आत्मदा बलदा यस्य विश्व ऽ उपासते प्रशिषं यस्य देवाः । यस्य छायामृतं यस्य मृत्युः कस्मै देवाय हविषा विधेम ॥

ya ' ātmadā baladā yasya viśva ' upāsate praśiṣaṃ yasya devāḥ | yasya chāyāmṛtaṃ yasya mṛtyuḥ kasmai devāya haviṣā vidhema ||

आ नो भद्राः क्रतवो यन्तु विश्वतो दब्धासो ऽ अपरीतास ऽ उद्भिदः । देवा नो यथा सदम् इद् वृधे ऽ असन्न् अप्रायुवो रक्षितारो दिवे-दिवे ॥

ā no bhadrāḥ kratavo yantu viśvato dabdhāso ' aparītāsa ' udbhidaḥ | devā no yathā sadam id vṛdhe ' asann aprāyuvo rakṣitāro dive-dive ||

देवानां भद्रा सुमतिर् ऋजूयतां देवानाꣳ रातिर् अभि नो नि वर्तताम् । देवानाꣳ सख्यम् उप सेदिमा वयं देवा न ऽ आयुः प्र तिरन्तु जीवसे ॥

devānāṃ bhadrā sumatir ṛjūyatāṃ devānām̐ rātir abhi no ni vartatām | devānām̐ sakhyam upa sedimā vayaṃ devā na ' āyuḥ pra tirantu jīvase ||

तान् पूर्वया निविदा हूमहे वयं भगं मित्रम् अदितिं दक्षम् अस्रिधम् । अर्यमणं वरुणꣳ सोमम् अश्विना सरस्वती नः सुभगा मयस् करत् ॥

tān pūrvayā nividā hūmahe vayaṃ bhagaṃ mitram aditiṃ dakṣam asridham | aryamaṇaṃ varuṇam̐ somam aśvinā sarasvatī naḥ subhagā mayas karat ||

तन् नो वातो मयोभु वातु भेषजं तन् माता पृथिवी तत् पिता द्यौः । तद् ग्रावाणः सोमसुतो मयोभुवस् तद् अश्विना शृणुतं धिष्ण्या युवम् ॥

tan no vāto mayobhu vātu bheṣajaṃ tan mātā pṛthivī tat pitā dyauḥ | tad grāvāṇaḥ somasuto mayobhuvas tad aśvinā śṛṇutaṃ dhiṣṇyā yuvam ||

तम् ईशानं जगतस् तस्थुषस् पतिं धियंजिन्वम् अवसे हूमहे वयम् । पूषा नो यथा वेदसाम् असद् वृधे रक्षिता पायुर् अदब्धः स्वस्तये ॥

tam īśānaṃ jagatas tasthuṣas patiṃ dhiyaṃjinvam avase hūmahe vayam | pūṣā no yathā vedasām asad vṛdhe rakṣitā pāyur adabdhaḥ svastaye ||

स्वस्ति न ऽ इन्द्रो वृद्धश्रवाः स्वस्ति नः पूषा विश्ववेदाः । स्वस्ति नस् तार्क्ष्यो ऽ अरिष्टनेमिः स्वस्ति नो बृहस्पतिर् दधातु ॥

svasti na ' indro vṛddhaśravāḥ svasti naḥ pūṣā viśvavedāḥ | svasti nas tārkṣyo ' ariṣṭanemiḥ svasti no bṛhaspatir dadhātu ||

पृषदश्वा मरुतः पृश्निमातरः शुभंयावानो विदथेषु जग्मयः । अग्निजिह्वा मनवः सूरचक्षसो विश्वे नो देवा ऽ अवसा गमन्न् इह ॥

pṛṣadaśvā marutaḥ pṛśnimātaraḥ śubhaṃyāvāno vidatheṣu jagmayaḥ | agnijihvā manavaḥ sūracakṣaso viśve no devā ' avasā gamann iha ||

भद्रं कर्णेभिः शृणुयाम देवा भद्रं पश्येमाक्षभिर् यजत्राः । स्थिरैर् अङ्गैस् तुष्टुवाꣳसस् तनूभिर् व्यशेमहि देवहितं यद् आयुः ॥

bhadraṃ karṇebhiḥ śṛṇuyāma devā bhadraṃ paśyemākṣabhir yajatrāḥ | sthirair aṅgais tuṣṭuvām̐sas tanūbhir vyaśemahi devahitaṃ yad āyuḥ ||

शतम् इन् नु शरदो ऽ अन्ति देवा यत्रा नश् चक्रा जरसं तनूनाम् । पुत्रासो यत्र पितरो भवन्ति मा नो मध्या रीरिषतायुर् गन्तोः ॥

śatam in nu śarado ' anti devā yatrā naś cakrā jarasaṃ tanūnām | putrāso yatra pitaro bhavanti mā no madhyā rīriṣatāyur gantoḥ ||

अदितिर् द्यौर् अदितिर् अन्तरिक्षम् अदितिर् माता स पिता स पुत्रः । विश्वे देवा ऽ अदितिः पञ्च जना ऽ अदितिर् जातम् अदितिर् जनित्वम् ॥

aditir dyaur aditir antarikṣam aditir mātā sa pitā sa putraḥ | viśve devā ' aditiḥ pañca janā ' aditir jātam aditir janitvam ||

मा नो मित्रो वरुणो ऽ अर्यमायुर् इन्द्र ऽ ऋभुक्षा मरुतः परि ख्यन् । यद् वाजिनो देवजातस्य सप्तेः प्रवक्ष्यामो विदथे वीर्याणि ॥

mā no mitro varuṇo ' aryamāyur indra ' ṛbhukṣā marutaḥ pari khyan | yad vājino devajātasya sapteḥ pravakṣyāmo vidathe vīryāṇi ||

यन् निर्णिजा रेक्णसा प्रावृतस्य रातिं गृभीतां मुखतो नयन्ति । सुप्राङ् अजो मेम्यद् विश्वरूप ऽ इन्द्रापूष्णोः प्रियम् अप्य् एति पाथः ॥

yan nirṇijā rekṇasā prāvṛtasya rātiṃ gṛbhītāṃ mukhato nayanti | suprāṅ ajo memyad viśvarūpa ' indrāpūṣṇoḥ priyam apy eti pāthaḥ ||

एष छागः पुरो ऽ अश्वेन वाजिना पूष्णो भागो नीयते विश्वदेव्यः । अभिप्रियं यत् पुरोडाशम् अर्वता त्वष्टेद् एनꣳ सौश्रवसाय जिन्वति ॥

eṣa chāgaḥ puro ' aśvena vājinā pūṣṇo bhāgo nīyate viśvadevyaḥ | abhipriyaṃ yat puroḍāśam arvatā tvaṣṭed enam̐ sauśravasāya jinvati ||

यद्धविष्यम् ऋतुशो देवयानं त्रिर् मानुषाः पर्य् अश्वं नयन्ति । अत्रा पूष्णः प्रथमो भाग ऽ एति यज्ञं देवेभ्यः प्रतिवेदयन्न् अजः ॥

yaddhaviṣyam ṛtuśo devayānaṃ trir mānuṣāḥ pary aśvaṃ nayanti | atrā pūṣṇaḥ prathamo bhāga ' eti yajñaṃ devebhyaḥ prativedayann ajaḥ ||

होताध्वर्युर् आवया ऽ अग्निमिन्धो ग्रावग्राभ ऽ उत शꣳस्ता सुविप्रः । तेन यज्ञेन स्वरंकृतेन स्विष्टेन वक्षणा आ पृणध्वम् ॥

hotādhvaryur āvayā ' agnimindho grāvagrābha ' uta śam̐stā suvipraḥ | tena yajñena svaraṃkṛtena sviṣṭena vakṣaṇā ā pṛṇadhvam ||

यूपव्रस्का ऽ उत ये यूपवाहाश् चषालं ये ऽ अश्वयूपाय तक्षति । ये चार्वते पचनꣳ सम्भरन्त्य् उतो तेषाम् अभिगूर्तिर् न ऽ इन्वतु ॥

yūpavraskā ' uta ye yūpavāhāś caṣālaṃ ye ' aśvayūpāya takṣati | ye cārvate pacanam̐ sambharanty uto teṣām abhigūrtir na ' invatu ||

उप प्रागात् सुमन् मे धायि मन्म देवानाम् आशा ऽ उप वीतपृष्ठः । अन्व् एनं विप्रा ऽ ऋषयो मदन्ति देवानां पुष्टे चकृमा सुबन्धुम् ॥

upa prāgāt suman me dhāyi manma devānām āśā ' upa vītapṛṣṭhaḥ | anv enaṃ viprā ' ṛṣayo madanti devānāṃ puṣṭe cakṛmā subandhum ||

यद् वाजिनो दाम संदानम् अर्वतो या शीर्षण्या रशना रज्जुर् अस्य । यद् वा घास्य प्रभृतम् आस्ये तृणꣳ सर्वा ता ते ऽ अपि देवेष्व् अस्तु ॥

yad vājino dāma saṃdānam arvato yā śīrṣaṇyā raśanā rajjur asya | yad vā ghāsya prabhṛtam āsye tṛṇam̐ sarvā tā te ' api deveṣv astu ||

यद् अश्वस्य क्रविषो मक्षिकाश यद् वा स्वरौ स्वधितौ रिप्तम् अस्ति । यद्धस्तयोः शमितुर् यन् नखेषु सर्वा ता ते ऽ अपि देवेष्व् अस्तु ॥

yad aśvasya kraviṣo makṣikāśa yad vā svarau svadhitau riptam asti | yaddhastayoḥ śamitur yan nakheṣu sarvā tā te ' api deveṣv astu ||

यद् ऊवध्यम् उदरस्यापवाति य ऽ आमस्य क्रविषो गन्धो ऽ अस्ति । सुकृता तच्छमितारः कृण्वन्तूत मेधꣳ शृतपाकं पचन्तु ॥

yad ūvadhyam udarasyāpavāti ya ' āmasya kraviṣo gandho ' asti | sukṛtā tacchamitāraḥ kṛṇvantūta medham̐ śṛtapākaṃ pacantu ||

यत् ते गात्राद् अग्निना पच्यमानाद् अभि शूलं निहतस्यावधावति । मा तद् भूम्याम् आ श्रिषन् मा तृणेषु देवेभ्यस् तद् उशद्भ्यो रातम् अस्तु ॥

yat te gātrād agninā pacyamānād abhi śūlaṃ nihatasyāvadhāvati | mā tad bhūmyām ā śriṣan mā tṛṇeṣu devebhyas tad uśadbhyo rātam astu ||

ये वाजिनं परिपश्यन्ति पक्वं य ऽ ईम् आहुः सुरभिर् निर् हरेति । ये चार्वतो माꣳसभिक्षाम् उपासत ऽ उतो तेषाम् अभिगूर्तिर् न ऽ इन्वतु ॥

ye vājinaṃ paripaśyanti pakvaṃ ya ' īm āhuḥ surabhir nir hareti | ye cārvato mām̐sabhikṣām upāsata ' uto teṣām abhigūrtir na ' invatu ||

यन्नीक्षणं माꣳस्पचन्या उखाया या पात्राणि यूष्ण ऽ आसेचनानि । ऊष्मण्यापिधाना चरूणाम् अङ्काः सूनाः परि भूषन्त्य् अश्वम् ॥

yannīkṣaṇaṃ mām̐spacanyā ukhāyā yā pātrāṇi yūṣṇa ' āsecanāni | ūṣmaṇyāpidhānā carūṇām aṅkāḥ sūnāḥ pari bhūṣanty aśvam ||

मा त्वाग्निर् ध्वनयीद् धूमगन्धिर् मोखा भ्राजन्त्य् अभि विक्त जघ्रिः । इष्टं वीतम् अभिगूर्तं वषट्कृतं तं देवासः प्रति गृभ्णन्त्यश्वम् ॥

mā tvāgnir dhvanayīd dhūmagandhir mokhā bhrājanty abhi vikta jaghriḥ | iṣṭaṃ vītam abhigūrtaṃ vaṣaṭkṛtaṃ taṃ devāsaḥ prati gṛbhṇantyaśvam ||

निक्रमणं निषदनं विवर्तनं यच् च पड्वीशम् अर्वतः । यच् च पपौ यच् च घासिं जघास सर्वा ता ते ऽ अपि देवेष्व् अस्तु ॥

nikramaṇaṃ niṣadanaṃ vivartanaṃ yac ca paḍvīśam arvataḥ | yac ca papau yac ca ghāsiṃ jaghāsa sarvā tā te ' api deveṣv astu ||

यद् अश्वाय वास ऽ उपस्तृणन्त्य् अधीवासं या हिरण्यान्य् अस्मै । संदानम् अर्वन्तं पड्वीशं प्रिया देवेष्व् आ यामयन्ति ॥

yad aśvāya vāsa ' upastṛṇanty adhīvāsaṃ yā hiraṇyāny asmai | saṃdānam arvantaṃ paḍvīśaṃ priyā deveṣv ā yāmayanti ||

यत् ते सादे महसा शूकृतस्य पार्ष्ण्या वा कशया वा तुतोद । स्रुचेव ता हविषो ऽ अध्वरेषु सर्वा ता ते ब्रह्मणा सूदयामि ॥

yat te sāde mahasā śūkṛtasya pārṣṇyā vā kaśayā vā tutoda | sruceva tā haviṣo ' adhvareṣu sarvā tā te brahmaṇā sūdayāmi ||

चतुस्त्रिꣳशद् वाजिनो देवबन्धोर् वङ्क्रीर् अश्वस्य स्वधितिः सम् एति । अच्छिद्रा गात्रा वयुना कृणोत परुष्-परुर् अनुघुष्या वि शस्त ॥

catustrim̐śad vājino devabandhor vaṅkrīr aśvasya svadhitiḥ sam eti | acchidrā gātrā vayunā kṛṇota paruṣ-parur anughuṣyā vi śasta ||

एकस् त्वष्टुर् अश्वस्या विशस्ता द्वा यन्तारा भवतस् तथ ऽ ऋतुः । या ते गात्राणाम् ऋतुथा कृणोमि ता-ता पिण्डानां प्र जुहोम्य् अग्नौ ॥

ekas tvaṣṭur aśvasyā viśastā dvā yantārā bhavatas tatha ' ṛtuḥ | yā te gātrāṇām ṛtuthā kṛṇomi tā-tā piṇḍānāṃ pra juhomy agnau ||

मा त्वा तपत् प्रिय ऽ आत्मापियन्तं मा स्वधितिस् तन्व ऽआ तिष्ठिपत् ते । मा ते गृध्नुर् अविशस्तातिहाय छिद्रा गात्राण्य् असिना मिथू कः ॥

mā tvā tapat priya ' ātmāpiyantaṃ mā svadhitis tanva 'ā tiṣṭhipat te | mā te gṛdhnur aviśastātihāya chidrā gātrāṇy asinā mithū kaḥ ||

न वा ऽ उ ऽ एतन् म्रियसे न रिष्यसि देवाꣳ२ऽ इद् एषि पथिभिः सुगेभिः । हरी ते युञ्जा पृषती ऽ अभूताम् उपास्थाद् वाजी धुरि रासभस्य ॥

na vā ' u ' etan mriyase na riṣyasi devām̐2' id eṣi pathibhiḥ sugebhiḥ | harī te yuñjā pṛṣatī ' abhūtām upāsthād vājī dhuri rāsabhasya ||

सुगव्यं नो वाजी स्वश्व्यं पुꣳसः पुत्राꣳ२ऽ उत विश्वापुषꣳ रयिम् । अनागास्त्वं नो ऽ अदितिः कृणोतु क्षत्रं नो ऽ अश्वो वनताꣳ हविष्मान् ॥

sugavyaṃ no vājī svaśvyaṃ pum̐saḥ putrām̐2' uta viśvāpuṣam̐ rayim | anāgāstvaṃ no ' aditiḥ kṛṇotu kṣatraṃ no ' aśvo vanatām̐ haviṣmān ||

इमा नु कं भुवना सीषधामेन्द्रश् च विश्वे च देवाः । आदित्यैर् इन्द्रः सगणो मरुद्भिर् अस्मभ्यं भेषजा करत् । यज्ञं च नस् तन्वं च प्रजां चादित्यैर् इन्द्रः सह सीषधाति ॥

imā nu kaṃ bhuvanā sīṣadhāmendraś ca viśve ca devāḥ | ādityair indraḥ sagaṇo marudbhir asmabhyaṃ bheṣajā karat | yajñaṃ ca nas tanvaṃ ca prajāṃ cādityair indraḥ saha sīṣadhāti ||

Sanskrit only: no published translation is held for this verse.

अग्ने त्वं नो ऽ अन्तम ऽ उत त्राता शिवो भव वरूथ्यः । वसुर् अग्निर् वसुश्रवा ऽ अच्छा नक्षि द्युमत्तमꣳ रयिं दाः । तं त्वा शोचिष्ठ दीदिवः सुम्नाय नूनम् ईमहे सखिभ्यः ॥

agne tvaṃ no ' antama ' uta trātā śivo bhava varūthyaḥ | vasur agnir vasuśravā ' acchā nakṣi dyumattamam̐ rayiṃ dāḥ | taṃ tvā śociṣṭha dīdivaḥ sumnāya nūnam īmahe sakhibhyaḥ ||

Sanskrit only: no published translation is held for this verse.