Vājasaneyi Saṃhitā (Śukla Yajurveda, as given on Wikisource) 8

उपयामगृहीतो ऽसि । आदित्येभ्यस् त्वा । विष्ण ऽ उरुगायैष ते सोमस् तꣳ रक्षस्व मा त्वा दभन् ॥

upayāmagṛhīto 'si | ādityebhyas tvā | viṣṇa ' urugāyaiṣa te somas tam̐ rakṣasva mā tvā dabhan ||

Sanskrit only: no published translation is held for this verse.

कदा चन स्तरीर् असि नेन्द्र सश्चसि दाशुषे । उपोपेन् नु मघवन् भूय ऽ इन् नु ते दानं देवस्य पृच्यते ऽ । आदित्येभ्यस् त्वा ॥

kadā cana starīr asi nendra saścasi dāśuṣe | upopen nu maghavan bhūya ' in nu te dānaṃ devasya pṛcyate ' | ādityebhyas tvā ||

Sanskrit only: no published translation is held for this verse.

कदा चन प्र युच्छस्य् उभे नि पासि जन्मनी । तुरीयादित्य सवनं त ऽ इन्द्रियम् आ तस्थाव् अमृतं दिवि । आदित्येभ्यस् त्वा ॥

kadā cana pra yucchasy ubhe ni pāsi janmanī | turīyāditya savanaṃ ta ' indriyam ā tasthāv amṛtaṃ divi | ādityebhyas tvā ||

Sanskrit only: no published translation is held for this verse.

यज्ञो देवानां प्रत्य् एति सुम्नम् आदित्यासो भवता मृडयन्तः । आ वोऽर्वाची सुमतिर् ववृत्याद् अꣳहोश् चिद् या वरिवोवित्तरासत् । आदित्येभ्यस् त्वा ॥

yajño devānāṃ praty eti sumnam ādityāso bhavatā mṛḍayantaḥ | ā vo'rvācī sumatir vavṛtyād am̐hoś cid yā varivovittarāsat | ādityebhyas tvā ||

Sanskrit only: no published translation is held for this verse.

विवस्वन्न् आदित्यैष ते सोमपीथस् तस्मिन् मत्स्व । श्रद् अस्मै नरो वचसे दधातन यद् आशीर्दा दम्पती वामम् अश्नुतः । पुमान् पुत्रो जायते विन्दते वस्व् अधा विश्वाहार् अप ऽ एधते गृहे ॥

vivasvann ādityaiṣa te somapīthas tasmin matsva | śrad asmai naro vacase dadhātana yad āśīrdā dampatī vāmam aśnutaḥ | pumān putro jāyate vindate vasv adhā viśvāhār apa ' edhate gṛhe ||

Sanskrit only: no published translation is held for this verse.

वामम् अद्य सवितर् वामम् उ श्वो दिवे-दिवे वामम् अस्मभ्यꣳ सावीः । वामस्य हि क्षयस्य देव भूरेर् अया धिया वामभाजः स्याम ॥

vāmam adya savitar vāmam u śvo dive-dive vāmam asmabhyam̐ sāvīḥ | vāmasya hi kṣayasya deva bhūrer ayā dhiyā vāmabhājaḥ syāma ||

उपयामगृहीतोऽसि सावित्रोऽसि चनोधाश् चनोधा ऽ असि चनो मयि धेहि । जिन्व यज्ञं जिन्व यज्ञपतिं भगाय देवाय त्वा सवित्रे ॥

upayāmagṛhīto'si sāvitro'si canodhāś canodhā ' asi cano mayi dhehi | jinva yajñaṃ jinva yajñapatiṃ bhagāya devāya tvā savitre ||

Sanskrit only: no published translation is held for this verse.

उपयामगृहीतोऽसि सुशर्मासि सुप्रतिष्ठानो बृहदुक्षाय नमः । विश्वेभ्यस् त्वा देवेभ्यः ऽ। एष ते योनिर् विश्वेभ्यस् त्वा देवेभ्यः ॥

upayāmagṛhīto'si suśarmāsi supratiṣṭhāno bṛhadukṣāya namaḥ | viśvebhyas tvā devebhyaḥ '| eṣa te yonir viśvebhyas tvā devebhyaḥ ||

Sanskrit only: no published translation is held for this verse.

उपयामगृहीतो ऽसि बृहस्पतिसुतस्य देव सोम त ऽ इन्दोर् इन्द्रियावतं पत्नीवतो ग्रहाँ२ ऽ ऋध्यासम् । अहं परस्ताद् अहम् अवस्ताद् यद् अन्तरिक्षं तद् उ मे पिताभूत् । अहꣳ सूर्यम् उभयतो ददर्शाहं देवानां परमं गुहा यत् ॥

upayāmagṛhīto 'si bṛhaspatisutasya deva soma ta ' indor indriyāvataṃ patnīvato grahā~2 ' ṛdhyāsam | ahaṃ parastād aham avastād yad antarikṣaṃ tad u me pitābhūt | aham̐ sūryam ubhayato dadarśāhaṃ devānāṃ paramaṃ guhā yat ||

Sanskrit only: no published translation is held for this verse.

अग्ना3इ पत्नीवन्त् सजूर् देवेन त्वष्ट्रा सोमं पिब स्वाहा । प्रजापतिर् वृषासि रेतोधा रेतो मयि धेहि प्रजापतेस् त वृष्णो रेतोधसो रेतोधाम् अशीय ॥

agnā3i patnīvant sajūr devena tvaṣṭrā somaṃ piba svāhā | prajāpatir vṛṣāsi retodhā reto mayi dhehi prajāpates ta vṛṣṇo retodhaso retodhām aśīya ||

Sanskrit only: no published translation is held for this verse.

उपयामगृहीतो ऽसि हरिर् असि हारियोजनो हरिभ्यां त्वा । हर्योर् धाना स्थ सहसोमा ऽ इन्द्राय ॥

upayāmagṛhīto 'si harir asi hāriyojano haribhyāṃ tvā | haryor dhānā stha sahasomā ' indrāya ||

Sanskrit only: no published translation is held for this verse.

यस् ते ऽ अश्वसनिर् भक्षो यो गोसनिस् तस्य त ऽ इष्टयजुष स्तुतसोमस्य शस्तोक्थस्योपहूतस्योपहूतो भक्षयामि ॥

yas te ' aśvasanir bhakṣo yo gosanis tasya ta ' iṣṭayajuṣa stutasomasya śastokthasyopahūtasyopahūto bhakṣayāmi ||

Sanskrit only: no published translation is held for this verse.

देवकृतस्यैनसो ऽवयजनम् असि । मनुष्यकृतस्यैनसो ऽवयजनम् असि । पितृकृतस्यैनसो ऽवयजनम् असि । आत्मकृतस्यैनसो ऽवयजनम् असि । एनसऽ-एनसो ऽवयजनम् असि । यच् चाहम् एनो विद्वाꣳश् चकार यच् चाविद्वाꣳस् तस्य सर्वस्यैनसो ऽवयजनम् असि ।

devakṛtasyainaso 'vayajanam asi | manuṣyakṛtasyainaso 'vayajanam asi | pitṛkṛtasyainaso 'vayajanam asi | ātmakṛtasyainaso 'vayajanam asi | enasa'-enaso 'vayajanam asi | yac cāham eno vidvām̐ś cakāra yac cāvidvām̐s tasya sarvasyainaso 'vayajanam asi |

Sanskrit only: no published translation is held for this verse.

सं वर्चसा पयसा सं तनूभिर् अगन्महि मनसा सꣳ शिवेन । त्वष्टा सुदत्रो वि दधातु रायो ऽनु मार्ष्टु तन्वो यद् विलिष्टम् ॥

saṃ varcasā payasā saṃ tanūbhir aganmahi manasā sam̐ śivena | tvaṣṭā sudatro vi dadhātu rāyo 'nu mārṣṭu tanvo yad viliṣṭam ||

Sanskrit only: no published translation is held for this verse.

सम् इन्द्र णो मनसा नेषि गोभिः सꣳ सूरिभिर् मघवन्त् सꣳ स्वस्त्या । सं ब्रह्मणा देवकृतं यद् अस्ति सं देवाना सुमतौ यज्ञियाना स्वाहा ॥

sam indra ṇo manasā neṣi gobhiḥ sam̐ sūribhir maghavant sam̐ svastyā | saṃ brahmaṇā devakṛtaṃ yad asti saṃ devānā sumatau yajñiyānā svāhā ||

Sanskrit only: no published translation is held for this verse.

सं वर्चसा पयसा सं तनूभिर् अगन्महि मनसा सꣳ शिवेन । त्वष्टा सुदत्रो विदधातु रायो ऽनु मार्ष्टु तन्वो यद् विलिष्टम् ॥

saṃ varcasā payasā saṃ tanūbhir aganmahi manasā sam̐ śivena | tvaṣṭā sudatro vidadhātu rāyo 'nu mārṣṭu tanvo yad viliṣṭam ||

Sanskrit only: no published translation is held for this verse.

धाता रातिः सवितेदं जुषन्तां प्रजापतिर् निधिपा देवो ऽ अग्निः । त्वष्टा विष्णुः प्रजया सꣳरराणा यजमानाय द्रविणं दधात स्वाहा ॥

dhātā rātiḥ savitedaṃ juṣantāṃ prajāpatir nidhipā devo ' agniḥ | tvaṣṭā viṣṇuḥ prajayā sam̐rarāṇā yajamānāya draviṇaṃ dadhāta svāhā ||

Sanskrit only: no published translation is held for this verse.

सुगा वो देवाः सदना ऽ अकर्म य ऽ आजग्मेदꣳ सवनं जुषाणाः । भरमाणा वहमाना हवीꣳष्य् अस्मे धत्त वसवो वसूनि स्वाहा ॥

sugā vo devāḥ sadanā ' akarma ya ' ājagmedam̐ savanaṃ juṣāṇāḥ | bharamāṇā vahamānā havīm̐ṣy asme dhatta vasavo vasūni svāhā ||

Sanskrit only: no published translation is held for this verse.

याँ२ ऽ आवह ऽ उशतो देव देवाँस् तान् प्रेरय स्वे ऽ अग्ने सधस्थे । जक्षिवासः पपिवासश् च विश्वे ऽसुं घर्मꣳ स्वरातिष्ठतानु स्वाहा ॥

yā~2 ' āvaha ' uśato deva devā~s tān preraya sve ' agne sadhasthe | jakṣivāsaḥ papivāsaś ca viśve 'suṃ gharmam̐ svarātiṣṭhatānu svāhā ||

Sanskrit only: no published translation is held for this verse.

वयꣳ हि त्वा प्रयति ऽ यज्ञे अस्मिन्न् अग्ने होतारम् अवृणीमहीह । ऋधग् अया ऽ ऋधग् उताशमिष्ठाः प्रजानन् यज्ञम् उप याहि विद्वान्त् स्वाहा ॥

vayam̐ hi tvā prayati ' yajñe asminn agne hotāram avṛṇīmahīha | ṛdhag ayā ' ṛdhag utāśamiṣṭhāḥ prajānan yajñam upa yāhi vidvānt svāhā ||

Sanskrit only: no published translation is held for this verse.

देवा गातुविदो गातुं वित्त्वा गातुम् इत । मनसस्पत ऽ इमं देव यज्ञꣳ स्वाहा वाते धाः ॥

devā gātuvido gātuṃ vittvā gātum ita | manasaspata ' imaṃ deva yajñam̐ svāhā vāte dhāḥ ||

Sanskrit only: no published translation is held for this verse.

यज्ञ यज्ञं गच्छ यज्ञपतिं गच्छ स्वां योनिं गच्छ स्वाहा । एष ते यज्ञो यज्ञपते सहसूक्तवाकः सर्ववीरस् तज् जुषस्व स्वाहा ॥

yajña yajñaṃ gaccha yajñapatiṃ gaccha svāṃ yoniṃ gaccha svāhā | eṣa te yajño yajñapate sahasūktavākaḥ sarvavīras taj juṣasva svāhā ||

Sanskrit only: no published translation is held for this verse.

माहिर् भूर् मा पृदाकुः । उरुꣳ हि राजा वरुणश् चकार सूर्याय पन्थाम् अन्वेतवा ऽ उ । अपदे पादा प्रतिधातवे ऽकर् उतापवक्ता हृदयाविधश् चित् । नमो वरुणायाभिष्ठितो वरुणस्य पाशः ॥

māhir bhūr mā pṛdākuḥ | urum̐ hi rājā varuṇaś cakāra sūryāya panthām anvetavā ' u | apade pādā pratidhātave 'kar utāpavaktā hṛdayāvidhaś cit | namo varuṇāyābhiṣṭhito varuṇasya pāśaḥ ||

Sanskrit only: no published translation is held for this verse.

अग्नेर् अनीकम् अप ऽ आ विवेशापां नपात् प्रतिरक्षन्न् असुर्यम् । दमे-दमे समिधं यक्ष्य् अग्ने प्रति ते जिह्वा घृतम् उच् चरण्यत् स्वाहा ॥

agner anīkam apa ' ā viveśāpāṃ napāt pratirakṣann asuryam | dame-dame samidhaṃ yakṣy agne prati te jihvā ghṛtam uc caraṇyat svāhā ||

Sanskrit only: no published translation is held for this verse.

समुद्रे ते हृदयम् अप्स्व् अन्तः सं त्वा विशन्त्व् ओषधीर् उतापः । यज्ञस्य त्वा यज्ञपते सूक्तोक्तौ नमोवाके विधेम यत् स्वाहा ॥

samudre te hṛdayam apsv antaḥ saṃ tvā viśantv oṣadhīr utāpaḥ | yajñasya tvā yajñapate sūktoktau namovāke vidhema yat svāhā ||

Sanskrit only: no published translation is held for this verse.

देवीर् आप ऽ एष वो गर्भस् तꣳ सुप्रीतꣳ सुभृतं बिभृत । देव सोमैष ते लोकस् तस्मिञ् छं च वक्ष्व परि च वक्ष्व ॥

devīr āpa ' eṣa vo garbhas tam̐ suprītam̐ subhṛtaṃ bibhṛta | deva somaiṣa te lokas tasmiñ chaṃ ca vakṣva pari ca vakṣva ||

Sanskrit only: no published translation is held for this verse.

अवभृथ निचुम्पुण निचेरुर् असि निचुम्पुणः । अव देवैर् देवकृतम् एनो ऽयासिषम् अव मर्त्यैर् मर्त्यकृतं पुरुराव्णो देव रिषस् पाहि । देवाना समिद् असि ॥

avabhṛtha nicumpuṇa nicerur asi nicumpuṇaḥ | ava devair devakṛtam eno 'yāsiṣam ava martyair martyakṛtaṃ pururāvṇo deva riṣas pāhi | devānā samid asi ||

Sanskrit only: no published translation is held for this verse.

एजतु दशमास्यो गर्भो जरायुणा सह । यथायं वायुर् एजति यथा समुद्र ऽ एजति । एवायं दशमास्यो ऽ अस्रज् जरायुणा सह ॥

ejatu daśamāsyo garbho jarāyuṇā saha | yathāyaṃ vāyur ejati yathā samudra ' ejati | evāyaṃ daśamāsyo ' asraj jarāyuṇā saha ||

Sanskrit only: no published translation is held for this verse.

यस्यै ते यज्ञियो गर्भो यस्यै योनिर् हिरण्ययी । अङ्गान्य् अह्रुता यस्य तं मात्रा सम् अजीगमꣳ स्वाहा ॥

yasyai te yajñiyo garbho yasyai yonir hiraṇyayī | aṅgāny ahrutā yasya taṃ mātrā sam ajīgamam̐ svāhā ||

Sanskrit only: no published translation is held for this verse.

पुरुदस्मो विषुरूप ऽ इन्दुर् अन्तर् महिमानम् आनञ्ज धीरः । एकपदीं द्विपदीं त्रिपदीं चतुष्पदीम् अष्टापदीं भुवनानु प्रथन्ता स्वाहा ॥

purudasmo viṣurūpa ' indur antar mahimānam ānañja dhīraḥ | ekapadīṃ dvipadīṃ tripadīṃ catuṣpadīm aṣṭāpadīṃ bhuvanānu prathantā svāhā ||

Sanskrit only: no published translation is held for this verse.

मरुतो यस्य हि क्षये पाथा दिवो विमहसः । स सुगोपातमो जनः ॥

maruto yasya hi kṣaye pāthā divo vimahasaḥ | sa sugopātamo janaḥ ||

मही द्यौः पृथिवी च न ऽ इमं यज्ञं मिमिक्षताम् । पिपृतां नो भरीमभिः ॥

mahī dyauḥ pṛthivī ca na ' imaṃ yajñaṃ mimikṣatām | pipṛtāṃ no bharīmabhiḥ ||

आ तिष्ठ वृत्रहन् रथं युक्ता ते ब्रह्मणा हरी । अर्वाचीनꣳ सु ते मनो ग्रावा कृणोतु वग्नुना । उपयामगृहीतो ऽसीन्द्राय त्वा षोडशिने । ऽ एष ते योनिर् इन्द्राय त्वा षोडशिने ॥

ā tiṣṭha vṛtrahan rathaṃ yuktā te brahmaṇā harī | arvācīnam̐ su te mano grāvā kṛṇotu vagnunā | upayāmagṛhīto 'sīndrāya tvā ṣoḍaśine | ' eṣa te yonir indrāya tvā ṣoḍaśine ||

Sanskrit only: no published translation is held for this verse.

युक्ष्वा हि केशिना हरी वृषणा कक्ष्यप्रा । अथा न ऽ इन्द्र सोमपा गिराम् उपश्रुतिं चर । उपयामगृहीतो ऽसीन्द्राय त्वा षोडशिने । ऽ एष ते योनिर् इन्द्राय त्वा षोडशिने ॥

yukṣvā hi keśinā harī vṛṣaṇā kakṣyaprā | athā na ' indra somapā girām upaśrutiṃ cara | upayāmagṛhīto 'sīndrāya tvā ṣoḍaśine | ' eṣa te yonir indrāya tvā ṣoḍaśine ||

Sanskrit only: no published translation is held for this verse.

इन्द्रम् इद् धरी वहतो ऽप्रतिधृष्टशवसम् । ऋषीणां च स्तुतीर् उप यज्ञं च मानुषाणाम् । उपयामगृहीतो ऽसीन्द्राय त्वा षोडशिने । ऽ एष ते योनिर् इन्द्राय त्वा षोडशिने ॥

indram id dharī vahato 'pratidhṛṣṭaśavasam | ṛṣīṇāṃ ca stutīr upa yajñaṃ ca mānuṣāṇām | upayāmagṛhīto 'sīndrāya tvā ṣoḍaśine | ' eṣa te yonir indrāya tvā ṣoḍaśine ||

Sanskrit only: no published translation is held for this verse.

यस्मान् न जातः परो ऽ अन्यो ऽ अस्ति य ऽ आविवेश भुवनानि विश्वा । प्रजापतिः प्रजया सꣳरराणस् त्रीणि ज्योतीषि सचते स षोडशी ॥

yasmān na jātaḥ paro ' anyo ' asti ya ' āviveśa bhuvanāni viśvā | prajāpatiḥ prajayā sam̐rarāṇas trīṇi jyotīṣi sacate sa ṣoḍaśī ||

Sanskrit only: no published translation is held for this verse.

इन्द्रश् च सम्राड् वरुणश् च राजा तौ ते भक्षं चक्रतुर् अग्र् ऽ एतम् । तयोर् अहम् अनु भक्षं भक्षयामि वाग् देवी जुषाणा सोमस्य तृप्यतु । सह प्राणेन स्वाहा ॥

indraś ca samrāḍ varuṇaś ca rājā tau te bhakṣaṃ cakratur agr ' etam | tayor aham anu bhakṣaṃ bhakṣayāmi vāg devī juṣāṇā somasya tṛpyatu | saha prāṇena svāhā ||

Sanskrit only: no published translation is held for this verse.

अग्ने पवस्व स्वपा ऽ अस्मे वर्चः सुवीर्यम् । दधद् रयिं मयि पोषम् । उपयामगृहीतो ऽस्य् अग्नये त्वा वर्चसे । ऽ एष ते योनिर् अग्नये त्वा वर्चसे । अग्ने वर्चस्विन् वर्चस्वाꣳस् त्वं देवेष्व् असि वर्चस्वान् अहं मनुष्येषु भूयासम् ॥

agne pavasva svapā ' asme varcaḥ suvīryam | dadhad rayiṃ mayi poṣam | upayāmagṛhīto 'sy agnaye tvā varcase | ' eṣa te yonir agnaye tvā varcase | agne varcasvin varcasvām̐s tvaṃ deveṣv asi varcasvān ahaṃ manuṣyeṣu bhūyāsam ||

Sanskrit only: no published translation is held for this verse.

उत्तिष्ठन्न् ओजसा सह पीत्वी शिप्रे ऽ अवेपयः । सोमम् इन्द्र चमू सुतम् । उपयामगृहीतो ऽसीन्द्राय त्वौजसे । ऽ एष ते योनिर् इन्द्राय त्वौजसे । इन्द्रौजिष्ठौजिष्ठस् त्वं देवेष्व् अस्य् ओजिष्ठो ऽहं मनुष्येषु भूयासम् ॥

uttiṣṭhann ojasā saha pītvī śipre ' avepayaḥ | somam indra camū sutam | upayāmagṛhīto 'sīndrāya tvaujase | ' eṣa te yonir indrāya tvaujase | indraujiṣṭhaujiṣṭhas tvaṃ deveṣv asy ojiṣṭho 'haṃ manuṣyeṣu bhūyāsam ||

Sanskrit only: no published translation is held for this verse.

अदृश्रम् अस्य केतवो वि रश्मयो जनाꣳ ऽ अनु । भ्राजन्तो अग्नयो यथा । उपयामगृहीतो ऽसि सूर्याय त्वा भ्राजाय । एष ते योनिः सूर्याय त्वा भ्राजाय । सूर्य भ्राजिष्ठ भ्राजिष्ठस् त्वं देवेष्व् असि भ्राजिष्ठो ऽहं मनुष्येषु भूयासम् ॥

adṛśram asya ketavo vi raśmayo janām̐ ' anu | bhrājanto agnayo yathā | upayāmagṛhīto 'si sūryāya tvā bhrājāya | eṣa te yoniḥ sūryāya tvā bhrājāya | sūrya bhrājiṣṭha bhrājiṣṭhas tvaṃ deveṣv asi bhrājiṣṭho 'haṃ manuṣyeṣu bhūyāsam ||

Sanskrit only: no published translation is held for this verse.

उद् उ त्यं जातवेदसं देवं वहन्ति केतवः । दृशे विश्वाय सूर्यम् । उपयामगृहीतो ऽसि सूर्याय त्वा भ्राजाय । एष ते योनिः सूर्याय त्वा भ्राजाय । (सूर्य भ्राजिष्ठ भ्राजिष्ठस् त्वं देवेष्व् असि भ्राजिष्ठो ऽहं मनुष्येषु भूयासम् )॥ ?

ud u tyaṃ jātavedasaṃ devaṃ vahanti ketavaḥ | dṛśe viśvāya sūryam | upayāmagṛhīto 'si sūryāya tvā bhrājāya | eṣa te yoniḥ sūryāya tvā bhrājāya | (sūrya bhrājiṣṭha bhrājiṣṭhas tvaṃ deveṣv asi bhrājiṣṭho 'haṃ manuṣyeṣu bhūyāsam )|| ?

Sanskrit only: no published translation is held for this verse.

आजिघ्रकलशं मह्यात्वाविशन्त्विन्दवः। पुनरूर्जा निवर्त्तस्व सा नः सहस्रं धुक्ष्वोरुधारा पयस्वती पुनर् माविशताद् रयिः ॥

ājighrakalaśaṃ mahyātvāviśantvindavaḥ| punarūrjā nivarttasva sā naḥ sahasraṃ dhukṣvorudhārā payasvatī punar māviśatād rayiḥ ||

Sanskrit only: no published translation is held for this verse.

इडे रन्ते हव्ये काम्ये चन्द्रे ज्योते ऽदिते सरस्वति महि विश्रुति । एता ते ऽ अघ्न्ये नामानि देवेभ्यो मा सुकृतं ब्रूतात् ॥

iḍe rante havye kāmye candre jyote 'dite sarasvati mahi viśruti | etā te ' aghnye nāmāni devebhyo mā sukṛtaṃ brūtāt ||

Sanskrit only: no published translation is held for this verse.

वि न इन्द्र मृधो जहि नीचा यच्छ पृतन्यतः । यो ऽ अस्माँ२ ऽ अभिदासत्य् अधरं गमया तमः । उपयामगृहीतो ऽसीन्द्राय त्वा विमृधे । ऽ एष ते योनिर् इन्द्राय त्वा विमृधे ॥

vi na indra mṛdho jahi nīcā yaccha pṛtanyataḥ | yo ' asmā~2 ' abhidāsaty adharaṃ gamayā tamaḥ | upayāmagṛhīto 'sīndrāya tvā vimṛdhe | ' eṣa te yonir indrāya tvā vimṛdhe ||

Sanskrit only: no published translation is held for this verse.

वाचस् पतिं विश्वकर्माणमूतये मनोजुवं वाजे ऽ अद्या हुवेम । स नो विश्वानि हवनानि जोषद् विश्वशम्भूर् अवसे साधुकर्मा । उपयामगृहीतो ऽसीन्द्राय त्वा विश्वकर्मणे । ऽ एष ते योनिर् इन्द्राय त्वा विश्वकर्मणे ॥

vācas patiṃ viśvakarmāṇamūtaye manojuvaṃ vāje ' adyā huvema | sa no viśvāni havanāni joṣad viśvaśambhūr avase sādhukarmā | upayāmagṛhīto 'sīndrāya tvā viśvakarmaṇe | ' eṣa te yonir indrāya tvā viśvakarmaṇe ||

Sanskrit only: no published translation is held for this verse.

विश्वकर्मन् हविषा वर्धनेन त्रातारम् इन्द्रम् अकृणोर् अवध्यम् । तस्मै विशः समनमन्त पूर्वीर् अयम् उग्रो विहव्यो यथासत् । उपयामगृहीतो ऽसीन्द्राय त्वा विश्वकर्मणे । ऽ एष ते योनिर् इन्द्राय त्वा विश्वकर्मणे ॥

viśvakarman haviṣā vardhanena trātāram indram akṛṇor avadhyam | tasmai viśaḥ samanamanta pūrvīr ayam ugro vihavyo yathāsat | upayāmagṛhīto 'sīndrāya tvā viśvakarmaṇe | ' eṣa te yonir indrāya tvā viśvakarmaṇe ||

Sanskrit only: no published translation is held for this verse.

उपयामगृहीतो ऽस्य् अग्नये त्वा गायत्रच्छन्दसं गृह्णामि । इन्द्राय त्वा त्रिष्टुप्छन्दसं गृह्णामि । विश्वेभ्यस् त्वा देवेभ्यो जगच्छन्दसं गृह्णामि । अनुष्टुप् ते ऽभिगरः ॥

upayāmagṛhīto 'sy agnaye tvā gāyatracchandasaṃ gṛhṇāmi | indrāya tvā triṣṭupchandasaṃ gṛhṇāmi | viśvebhyas tvā devebhyo jagacchandasaṃ gṛhṇāmi | anuṣṭup te 'bhigaraḥ ||

Sanskrit only: no published translation is held for this verse.

व्रेशीनां त्वा पत्मन्न् आ धूनोमि कुकूननानां त्वा पत्मन्न् आ धूनोमि भन्दनानां त्वा पत्मन्न् आ धूनोमि मदिन्तमानां त्वा पत्मन्न् आ धूनोमि मधुन्तमानां त्वा पत्मन्न् आ धूनोमि शुक्रं त्वा शुक्र ऽ आ धूनोम्य् अह्नो रूपे सूर्यस्य रश्मिषु ॥

vreśīnāṃ tvā patmann ā dhūnomi kukūnanānāṃ tvā patmann ā dhūnomi bhandanānāṃ tvā patmann ā dhūnomi madintamānāṃ tvā patmann ā dhūnomi madhuntamānāṃ tvā patmann ā dhūnomi śukraṃ tvā śukra ' ā dhūnomy ahno rūpe sūryasya raśmiṣu ||

Sanskrit only: no published translation is held for this verse.

ककुभꣳ रूपं वृषभस्य रोचते बृहच् छुक्रः शुक्रस्य पुरोगाः सोमः सोमस्य पुरोगाः । यत् ते सोमादाभ्यं नाम जागृवि तस्मै त्वा गृह्णामि तस्मै ते सोम सोमाय स्वाहा ॥

kakubham̐ rūpaṃ vṛṣabhasya rocate bṛhac chukraḥ śukrasya purogāḥ somaḥ somasya purogāḥ | yat te somādābhyaṃ nāma jāgṛvi tasmai tvā gṛhṇāmi tasmai te soma somāya svāhā ||

Sanskrit only: no published translation is held for this verse.

उशिक् त्वं देव सोमाग्नेः प्रियं पाथो ऽपीहि । वशी त्वं देव सोमेन्द्रस्य प्रियं पाथो ऽपीहि । अस्मत्सखा त्वं देव सोम विश्वेषां देवानां प्रियं पाथो ऽपीहि ॥

uśik tvaṃ deva somāgneḥ priyaṃ pātho 'pīhi | vaśī tvaṃ deva somendrasya priyaṃ pātho 'pīhi | asmatsakhā tvaṃ deva soma viśveṣāṃ devānāṃ priyaṃ pātho 'pīhi ||

Sanskrit only: no published translation is held for this verse.

इह रतिर् इह रमध्वम् इह धृतिर् इह स्वधृतिः स्वाहा । उपसृजन् धरुणं मात्रे धरुणो मातरं धयन् । रायस्पोषम् अस्मासु दीधरत् स्वाहा ॥

iha ratir iha ramadhvam iha dhṛtir iha svadhṛtiḥ svāhā | upasṛjan dharuṇaṃ mātre dharuṇo mātaraṃ dhayan | rāyaspoṣam asmāsu dīdharat svāhā ||

Sanskrit only: no published translation is held for this verse.

सत्रस्य ऽ ऋद्धिर् अस्य् अगन्म ज्योतिर् अमृता ऽ अभूम दिवं पृथिव्या ऽ अध्य् आरुहामाविदाम देवान्त् स्वर् ज्योतिः ॥

satrasya ' ṛddhir asy aganma jyotir amṛtā ' abhūma divaṃ pṛthivyā ' adhy āruhāmāvidāma devānt svar jyotiḥ ||

Sanskrit only: no published translation is held for this verse.

युवं तम् इन्द्रापर्वता पुरोयुधा यो नः पृतन्याद् अप तं-तम् इद् धतं वज्रेण तं-तम् इद् धतम् । दूरे चत्ताय छन्त्सद् गहनं यद् इनक्षत् । अस्माकꣳ शत्रून् परि शूर विश्वतो दर्मा दर्षीष्ट विश्वतः । भूर् भुवः स्वः सुप्रजाः प्रजाभिः स्याम सुवीरा वीरैः सुपोषाः पोषैः ॥

yuvaṃ tam indrāparvatā puroyudhā yo naḥ pṛtanyād apa taṃ-tam id dhataṃ vajreṇa taṃ-tam id dhatam | dūre cattāya chantsad gahanaṃ yad inakṣat | asmākam̐ śatrūn pari śūra viśvato darmā darṣīṣṭa viśvataḥ | bhūr bhuvaḥ svaḥ suprajāḥ prajābhiḥ syāma suvīrā vīraiḥ supoṣāḥ poṣaiḥ ||

Sanskrit only: no published translation is held for this verse.

परमेष्ठ्य् अभिधीतः । प्रजापतिर् वाचि व्याहृतायाम् । अन्धो ऽ अच्छेतः । सविता सन्याम् । विश्वकर्मा दीक्षायाम् । पूषा सोमक्रयण्याम् ॥

parameṣṭhy abhidhītaḥ | prajāpatir vāci vyāhṛtāyām | andho ' acchetaḥ | savitā sanyām | viśvakarmā dīkṣāyām | pūṣā somakrayaṇyām ||

Sanskrit only: no published translation is held for this verse.

इन्द्रश् च मरुतश् च क्रयायोपोत्थितः । ऽ असुरः पण्यमानः । मित्रः क्रीतः । विष्णुः शिपिविष्ट ऽ ऊराव् आसन्नः । विष्णुर् नरन्धिषः प्रोह्यमाणः ॥

indraś ca marutaś ca krayāyopotthitaḥ | ' asuraḥ paṇyamānaḥ | mitraḥ krītaḥ | viṣṇuḥ śipiviṣṭa ' ūrāv āsannaḥ | viṣṇur narandhiṣaḥ prohyamāṇaḥ ||

Sanskrit only: no published translation is held for this verse.

सोम ऽ आगतः । वरुण ऽ आसन्द्याम् आसन्नः । ऽ अग्निर् आग्नीध्रे । ऽ इन्द्रो हविर्धाने । ऽ अथर्वोपावह्रियमाणः ॥

soma ' āgataḥ | varuṇa ' āsandyām āsannaḥ | ' agnir āgnīdhre | ' indro havirdhāne | ' atharvopāvahriyamāṇaḥ ||

Sanskrit only: no published translation is held for this verse.

विश्वे देवा ऽ अꣳशुषु न्युप्तः । विष्णुर् आप्रीतपा ऽ आप्याय्यमानः । यमः सूयमानः । विष्णुः संभ्रियमाणः । वायुः पूयमानः । शुक्रः पूतः । शुक्रं क्षीरश्रीः । मन्थी सक्तुश्रीः ॥

viśve devā ' am̐śuṣu nyuptaḥ | viṣṇur āprītapā ' āpyāyyamānaḥ | yamaḥ sūyamānaḥ | viṣṇuḥ saṃbhriyamāṇaḥ | vāyuḥ pūyamānaḥ | śukraḥ pūtaḥ | śukraṃ kṣīraśrīḥ | manthī saktuśrīḥ ||

Sanskrit only: no published translation is held for this verse.

विश्वे देवाश् चमसेषून्नीतः । ऽ असुर् होमायोद्यतः । रुद्रो हूयमानः । वातो ऽभ्यावृत्तः । नृचक्षाः प्रतिख्यातः । भक्षो भक्ष्यमाणः । पितरो नाराशꣳसाः सन्नः ॥

viśve devāś camaseṣūnnītaḥ | ' asur homāyodyataḥ | rudro hūyamānaḥ | vāto 'bhyāvṛttaḥ | nṛcakṣāḥ pratikhyātaḥ | bhakṣo bhakṣyamāṇaḥ | pitaro nārāśam̐sāḥ sannaḥ ||

Sanskrit only: no published translation is held for this verse.

सिन्धुर् अवभृथायोद्यतः । समुद्रो ऽभ्यवह्रियमाणः । सलिलः प्रप्लुतः । ययोर् ओजसा स्कभिता रजाꣳसि वीर्येभिर् वीरतमा शविष्ठा । या पत्येते ऽ अप्रतीता सहोभिर् विष्णू ऽ अगन् वरुणा पूर्वहूतौ ॥

sindhur avabhṛthāyodyataḥ | samudro 'bhyavahriyamāṇaḥ | salilaḥ praplutaḥ | yayor ojasā skabhitā rajām̐si vīryebhir vīratamā śaviṣṭhā | yā patyete ' apratītā sahobhir viṣṇū ' agan varuṇā pūrvahūtau ||

Sanskrit only: no published translation is held for this verse.

देवान् दिवम् अगन् यज्ञस् ततो मा द्रविणम् अष्टु मनुष्यान् अन्तरिक्षम् अगन् यज्ञस् ततो मा द्रविणम् अष्टु पितॄन् पृथिवीम् अगन् यज्ञस् ततो मा द्रविणम् अष्टु यं कं च लोकम् अगन् यज्ञस् ततो मे भद्रं अभूत् ॥

devān divam agan yajñas tato mā draviṇam aṣṭu manuṣyān antarikṣam agan yajñas tato mā draviṇam aṣṭu pitṝn pṛthivīm agan yajñas tato mā draviṇam aṣṭu yaṃ kaṃ ca lokam agan yajñas tato me bhadraṃ abhūt ||

Sanskrit only: no published translation is held for this verse.

चतुस्त्रिꣳशत् तन्तवो ये वितत्निरे य ऽ इमं यज्ञꣳ स्वधया ददन्ते । तेषां छिन्नꣳ सम् व् एतद् दधामि स्वाहा घर्मो ऽ अप्य् एतु देवान् ॥

catustrim̐śat tantavo ye vitatnire ya ' imaṃ yajñam̐ svadhayā dadante | teṣāṃ chinnam̐ sam v etad dadhāmi svāhā gharmo ' apy etu devān ||

Sanskrit only: no published translation is held for this verse.

यज्ञस्य दोहो विततः पुरुत्रा सो ऽ अष्टधा दिवम् अन्वा ततान । स यज्ञ धुक्ष्व महि मे प्रजयाꣳ रायस्पोषं विश्वम् आयुर् अशीय स्वाहा ॥

yajñasya doho vitataḥ purutrā so ' aṣṭadhā divam anvā tatāna | sa yajña dhukṣva mahi me prajayām̐ rāyaspoṣaṃ viśvam āyur aśīya svāhā ||

Sanskrit only: no published translation is held for this verse.

आ पवस्व हिरण्यवद् अश्ववत् सोम वीरवत् । वाजं गोमन्तम् आ भर स्वाहा ॥

ā pavasva hiraṇyavad aśvavat soma vīravat | vājaṃ gomantam ā bhara svāhā ||

Sanskrit only: no published translation is held for this verse.