चूतप्रियालपनसासनकोविदारजम्ब्वर्कबिल्वबकुलाम्रकदम्बनीपाः । ये ऽन्ये परार्थभवका यमुनोपकूलाः शंसन्तु कृष्णपदवीं रहितात्मनां नः ॥ फलादिभिः सर्वप्राणिनां संतर्पका एते पश्येयुर् इति पृच्छन्ति-चूतेति । चूताम्रयोर् अवान्तरजातिभेदः कदम्बनीपयोश् च । हे चूतादयः, ये ऽन्ये च परार्थभवकाः परार्थम् एव भवो जन्म येषां ते । यमुनोपकूलास् तस्याः कूलसमीपे वर्तमानाः । तीर्थवासिन इत्य् अर्थः । ते भवन्तो रहितात्मनां शून्यचेतसां नः कृष्णपदवीं कृष्णस्य मार्गं शंसन्तु कथयन्तु
cūtapriyālapanasāsanakovidārajambvarkabilvabakulāmrakadambanīpāḥ / ye 'nye parārthabhavakā yamunopakūlāḥ śaṃsantu kṛṣṇapadavīṃ rahitātmanāṃ naḥ // phalādibhiḥ sarvaprāṇināṃ saṃtarpakā ete paśyeyur iti pṛcchanti-cūteti | cūtāmrayor avāntarajātibhedaḥ kadambanīpayoś ca | he cūtādayaḥ, ye 'nye ca parārthabhavakāḥ parārtham eva bhavo janma yeṣāṃ te | yamunopakūlās tasyāḥ kūlasamīpe vartamānāḥ | tīrthavāsina ity arthaḥ | te bhavanto rahitātmanāṃ śūnyacetasāṃ naḥ kṛṣṇapadavīṃ kṛṣṇasya mārgaṃ śaṃsantu kathayantu
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.