गोप्यः स्फुरत्पुरटकुण्डलकुन्तलत्विड्गण्डश्रिया सुधितहासनिरीक्षणेन । मानं दधत्य ऋषभस्य जगुः कृतानि पुण्यानि तत्कररुहस्पर्शप्रमोदाः ॥ ततो ऽतिहृष्टानां गोपीनां चरितम् आह-गोप्य इति । स्फुरतां स्वर्णकुण्डलानां कुन्तलानां च त्विषा गण्डेषु या श्रीस् तया सुधितेनामृतायितेन हाससहितेन निरीक्षणेन च ऋषभस्य पत्युः कृष्णस्य मानं दधत्यः पूजां कुर्वत्यस् तत्कर्माणि जगुः । तस्य कररुहैर् नखैः स्पर्शेन प्रमोदो यासां ताः
gopyaḥ sphuratpuraṭakuṇḍalakuntalatviḍgaṇḍaśriyā sudhitahāsanirīkṣaṇena / mānaṃ dadhatya ṛṣabhasya jaguḥ kṛtāni puṇyāni tatkararuhasparśapramodāḥ // tato 'tihṛṣṭānāṃ gopīnāṃ caritam āha-gopya iti | sphuratāṃ svarṇakuṇḍalānāṃ kuntalānāṃ ca tviṣā gaṇḍeṣu yā śrīs tayā sudhitenāmṛtāyitena hāsasahitena nirīkṣaṇena ca ṛṣabhasya patyuḥ kṛṣṇasya mānaṃ dadhatyaḥ pūjāṃ kurvatyas tatkarmāṇi jaguḥ | tasya kararuhair nakhaiḥ sparśena pramodo yāsāṃ tāḥ
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.