चतुष्टय्य आपो गृह्णाति । चत्वारि वा अपां रूपाणि । मेघो विद्युत् । स्तनयित्नुर्वृष्टिः । तान्येवावरुन्धे, इति । आतपति वर्ष्यां गृह्णाति । ताः पुरस्तादुपदधाति । एता वै ब्रह्मवर्चस्या आपः । मुखत एव ब्रह्मवर्चसमवरुन्धे । तस्मान्मुखतो ब्रह्मवर्चसितरः ( १), इति । कूप्या गृह्णाति । ता दक्षिणत उपदधाति । एता वै तेजस्वनीरापः । तेज एवास्य दक्षिणतो दधाति । तस्माद्दक्षिणोऽर्धस्तेजस्वितरः,इति । स्थावरा गृह्णाति । ताः पश्चादुपदधाति । प्रतिष्ठिता वै स्थावराः । पश्चादेव प्रतितिष्ठति, इति । वहन्तीर्गृह्णाति २) । ता उत्तरत उपदधाति । ओजसा वा एता वहन्तीरिवोद्गतीरिव आकूजतीरिव धावन्तीः । ओज एवास्योत्तरतो दधाति । तस्मादुत्तरोऽर्ध ओजस्वितरः, इति । संभार्या गृह्णाति । ता मध्य उपदधाति । इयं वै संभार्याः । अस्यामेव प्रतितिष्ठति, इति । पल्वल्या गृह्णाति । ता उपरिष्टादुपादधाति ( ३) । असौ वै पल्वल्याः । अमुष्यामेव प्रतितिष्ठति, इति । दिक्षूपदधाति । दिक्षु वा आपः । अन्नं वा आपः । अद्भ्यो वा अन्नं जायते । यदेवाद्भ्योऽन्नं जायते । तदवरुन्धे, इति । तं वा एतमरुणाः केतवो वातरशना ऋषयोऽचिन्वन् । तस्मादारुणकेतुकः, इति । तदेषाऽभ्यनूक्ता, इति । कैतवो अरुणासश्च । ऋषयो वातरशनाः । प्रतिष्ठां शतधा हि । समाहितासो सहस्रधायसमिति, इति । शतशश्चैव सहस्रशश्च प्रतितिष्ठति । य एतमग्निं चिनुते । य उ चैनमेवं वेद, इति ।। व्रह्मवर्चसितरो वहन्तीर्गृह्णाति ता उपरिष्टादुपादधात्यारुणकेतुकोऽष्टौ च ।।
catuṣṭayya āpo gṛhṇāti | catvāri vā apāṃ rūpāṇi | megho vidyut | stanayitnurvṛṣṭiḥ | tānyevāvarundhe, iti | ātapati varṣyāṃ gṛhṇāti | tāḥ purastādupadadhāti | etā vai brahmavarcasyā āpaḥ | mukhata eva brahmavarcasamavarundhe | tasmānmukhato brahmavarcasitaraḥ ( 1), iti | kūpyā gṛhṇāti | tā dakṣiṇata upadadhāti | etā vai tejasvanīrāpaḥ | teja evāsya dakṣiṇato dadhāti | tasmāddakṣiṇo'rdhastejasvitaraḥ,iti | sthāvarā gṛhṇāti | tāḥ paścādupadadhāti | pratiṣṭhitā vai sthāvarāḥ | paścādeva pratitiṣṭhati, iti | vahantīrgṛhṇāti 2) | tā uttarata upadadhāti | ojasā vā etā vahantīrivodgatīriva ākūjatīriva dhāvantīḥ | oja evāsyottarato dadhāti | tasmāduttaro'rdha ojasvitaraḥ, iti | saṃbhāryā gṛhṇāti | tā madhya upadadhāti | iyaṃ vai saṃbhāryāḥ | asyāmeva pratitiṣṭhati, iti | palvalyā gṛhṇāti | tā upariṣṭādupādadhāti ( 3) | asau vai palvalyāḥ | amuṣyāmeva pratitiṣṭhati, iti | dikṣūpadadhāti | dikṣu vā āpaḥ | annaṃ vā āpaḥ | adbhyo vā annaṃ jāyate | yadevādbhyo'nnaṃ jāyate | tadavarundhe, iti | taṃ vā etamaruṇāḥ ketavo vātaraśanā ṛṣayo'cinvan | tasmādāruṇaketukaḥ, iti | tadeṣā'bhyanūktā, iti | kaitavo aruṇāsaśca | ṛṣayo vātaraśanāḥ | pratiṣṭhāṃ śatadhā hi | samāhitāso sahasradhāyasamiti, iti | śataśaścaiva sahasraśaśca pratitiṣṭhati | ya etamagniṃ cinute | ya u cainamevaṃ veda, iti || vrahmavarcasitaro vahantīrgṛhṇāti tā upariṣṭādupādadhātyāruṇaketuko'ṣṭau ca ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.