आयातु देवः सुमनाभिरूतिभिर्यमो ह वेह प्रयताभिरक्ता । आसीदताꣳ सुप्रयते ह बर्हिष्यूर्जाय जात्यै मम शत्रुहत्यै । यमे इव यतमाने यदैतं प्र वां भरन्मानुषा देवयन्तः । आसीदतꣳ स्वमु लोकं विदाने स्वासस्थे भवतमिन्दवे नः, इति । यमाय सोमꣳ सुनुत यमाय जुहुता हविः । यमꣳ ह यज्ञो गच्छत्यग्निदूतो अरंकृतः । यमाय घृतवद्धविर्जुहोत प्र च तिष्ठत । स नो देवेष्वायमद्दीर्घमायुः प्रजीवसे । यमाय मधुमत्तमꣳ राज्ञे हव्यं जुहोतन । इदं नम ऋषिभ्यः पूर्वजेभ्यः पूर्वेभ्यः पथिकृद्भ्यः (१) । योऽस्य कौष्ठ्य जगतः पार्थिवस्यैक इद्वशी । यमं भङ्ग्यश्रवो गाय यो राजाऽनपरोध्यः, इति । यमं गाय भङ्ग्यश्रवो यो राजाऽनपरोध्यः । येनाऽऽपो नद्यो धन्वानि येन द्यौः पृथिवी दृढा, इति । हिरण्यकक्ष्यान्त्सुधुरान्हिरण्याक्षानयःशफान् । अश्वाननश्यतो दानं यमो राजाऽभितिष्ठति, इति । यमो दाधार पृथिवीं यमो विश्वमिदं जगत् । यमाय सर्वमित्रस्थे यत्प्राणद्वायुरक्षितम्, इति । यथा पञ्च यथा षड्यथा पञ्चदशर्षयः । यमं यो विद्यात्स ब्रूयाद्यथैक ऋषिर्विजानते (२), इति । त्रिकद्रुकेभिः पतति षडु्र्वीरेकमिद्बृहत् । गायत्री त्रिष्टुप्छन्दाꣳसि सर्वा ता यम आहिता, इति । अहरहर्नयमानो गामश्वं पुरुषं जगत् । वैवस्वतो न तृप्यति पञ्चभिर्मानवैर्यमः, इति । वैवस्वते विविच्यन्ते यमे राजनि ते जनाः । ये चेह सत्येनेच्छन्ते य उ चानृतवादिनः, इति । ते राजन्निह विविच्यन्तेऽथा यन्ति त्वामुप । देवाꣳश्च ये नमस्यन्ति ब्राह्मणाꣳश्चापचित्यति, इति । यस्मिन्वृक्षे सुपलाशे देवैः संपिबते यमः । अत्रा नो विश्पतिः पिता पुराणा अनुवेनति (३), इति ।। पथिकृद्भ्यो विजानतेऽनुवेनति ।।
āyātu devaḥ sumanābhirūtibhiryamo ha veha prayatābhiraktā | āsīdatām̐ suprayate ha barhiṣyūrjāya jātyai mama śatruhatyai | yame iva yatamāne yadaitaṃ pra vāṃ bharanmānuṣā devayantaḥ | āsīdatam̐ svamu lokaṃ vidāne svāsasthe bhavatamindave naḥ, iti | yamāya somam̐ sunuta yamāya juhutā haviḥ | yamam̐ ha yajño gacchatyagnidūto araṃkṛtaḥ | yamāya ghṛtavaddhavirjuhota pra ca tiṣṭhata | sa no deveṣvāyamaddīrghamāyuḥ prajīvase | yamāya madhumattamam̐ rājñe havyaṃ juhotana | idaṃ nama ṛṣibhyaḥ pūrvajebhyaḥ pūrvebhyaḥ pathikṛdbhyaḥ (1) | yo'sya kauṣṭhya jagataḥ pārthivasyaika idvaśī | yamaṃ bhaṅgyaśravo gāya yo rājā'naparodhyaḥ, iti | yamaṃ gāya bhaṅgyaśravo yo rājā'naparodhyaḥ | yenā''po nadyo dhanvāni yena dyauḥ pṛthivī dṛḍhā, iti | hiraṇyakakṣyāntsudhurānhiraṇyākṣānayaḥśaphān | aśvānanaśyato dānaṃ yamo rājā'bhitiṣṭhati, iti | yamo dādhāra pṛthivīṃ yamo viśvamidaṃ jagat | yamāya sarvamitrasthe yatprāṇadvāyurakṣitam, iti | yathā pañca yathā ṣaḍyathā pañcadaśarṣayaḥ | yamaṃ yo vidyātsa brūyādyathaika ṛṣirvijānate (2), iti | trikadrukebhiḥ patati ṣaḍurvīrekamidbṛhat | gāyatrī triṣṭupchandām̐si sarvā tā yama āhitā, iti | aharaharnayamāno gāmaśvaṃ puruṣaṃ jagat | vaivasvato na tṛpyati pañcabhirmānavairyamaḥ, iti | vaivasvate vivicyante yame rājani te janāḥ | ye ceha satyenecchante ya u cānṛtavādinaḥ, iti | te rājanniha vivicyante'thā yanti tvāmupa | devām̐śca ye namasyanti brāhmaṇām̐ścāpacityati, iti | yasminvṛkṣe supalāśe devaiḥ saṃpibate yamaḥ | atrā no viśpatiḥ pitā purāṇā anuvenati (3), iti || pathikṛdbhyo vijānate'nuvenati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.