वैश्वानरे हविरिदं जुहोमि साहस्रमुत्सꣳ शतधारमेतम् । तस्मिन्नेष पितरं पितामहं प्रपितामहं बिभरत्पिन्वमाने, इति । द्रप्सश्चस्कन्द पृथिवीमनु द्यामिमं च योनिमनु यश्च पूर्वः । तृतीयं योनिमनु संचरन्तं द्रप्सं जुहोम्यनु सप्त होत्राः, इति । इमꣳ समुद्रꣳ शतधारमुत्सं व्यच्यमानं भुवनस्य मध्ये । घृतं दुहानामदितिं जनायाग्ने मा हिꣳसीः परमे व्योमन्, इति । अपेत वीत वि च सर्पतातो येऽत्र स्थ पुराणा ये च नूतनाः । अहोभिरद्भिरक्तुभिर्व्यक्तं यमो ददात्ववसानमस्मै, इति । सवितैतानि शरीराणि पृथिव्यै मातुरुपस्थ आदधे । तेभिर्युज्यन्तामघ्नियाः ( १ ), इति । शुनं वाहाः शुनं नाराः शुनं कृषतु लाङ्गलम् । शुनं वरत्रा बध्यꣳन्ताꣳ शुनमष्ट्रामुदिङ्गय शुनासीरा शुनमस्मासु धत्तम्, इति । शुनासीराविमां वाचं यद्दिवि चक्रथुः पयः । तेनेमामुपसिञ्चतम्, इति । सीते वन्दामहे त्वाऽर्वाची सुभगे भव । यया नः सुभगा ससि यथा नः सुफला ससि, इति । सवितैतानि शरीराणि पृथिव्यै मातुरुपस्थ आदधे । तेभिरदिते शं भव, इति । विमुच्यध्वमघ्निया देवयाना अतारिष्म तमसस्पाꣳरमस्य । ज्योतिरापाम सुवरगन्म ( २), इति । प्र वाता वान्ति पतयन्ति विद्युत उदोषधीर्जिꣳहते पिन्वते सुवः । इरा विश्वस्मै भुवनाय जायते यत्पर्जन्यः पृथिवीꣳ रेतसाऽवति, इति । यथा यमाय हार्म्यमवपन्पञ्च मानवाः । एवं वपामि हार्म्यं यथाऽसाम जीवलोके भूरयः, इति । चितः स्थ परिचित ऊर्ध्वचितः श्रयध्वं पितरो देवता । प्रजापतिर्वः सादयतु तया देवतया, इति। आप्यायस्व, सं ते ( ३), इति ।। अघ्निया अगन्म सप्त च ।।
vaiśvānare haviridaṃ juhomi sāhasramutsam̐ śatadhārametam | tasminneṣa pitaraṃ pitāmahaṃ prapitāmahaṃ bibharatpinvamāne, iti | drapsaścaskanda pṛthivīmanu dyāmimaṃ ca yonimanu yaśca pūrvaḥ | tṛtīyaṃ yonimanu saṃcarantaṃ drapsaṃ juhomyanu sapta hotrāḥ, iti | imam̐ samudram̐ śatadhāramutsaṃ vyacyamānaṃ bhuvanasya madhye | ghṛtaṃ duhānāmaditiṃ janāyāgne mā him̐sīḥ parame vyoman, iti | apeta vīta vi ca sarpatāto ye'tra stha purāṇā ye ca nūtanāḥ | ahobhiradbhiraktubhirvyaktaṃ yamo dadātvavasānamasmai, iti | savitaitāni śarīrāṇi pṛthivyai māturupastha ādadhe | tebhiryujyantāmaghniyāḥ ( 1 ), iti | śunaṃ vāhāḥ śunaṃ nārāḥ śunaṃ kṛṣatu lāṅgalam | śunaṃ varatrā badhyam̐ntām̐ śunamaṣṭrāmudiṅgaya śunāsīrā śunamasmāsu dhattam, iti | śunāsīrāvimāṃ vācaṃ yaddivi cakrathuḥ payaḥ | tenemāmupasiñcatam, iti | sīte vandāmahe tvā'rvācī subhage bhava | yayā naḥ subhagā sasi yathā naḥ suphalā sasi, iti | savitaitāni śarīrāṇi pṛthivyai māturupastha ādadhe | tebhiradite śaṃ bhava, iti | vimucyadhvamaghniyā devayānā atāriṣma tamasaspām̐ramasya | jyotirāpāma suvaraganma ( 2), iti | pra vātā vānti patayanti vidyuta udoṣadhīrjim̐hate pinvate suvaḥ | irā viśvasmai bhuvanāya jāyate yatparjanyaḥ pṛthivīm̐ retasā'vati, iti | yathā yamāya hārmyamavapanpañca mānavāḥ | evaṃ vapāmi hārmyaṃ yathā'sāma jīvaloke bhūrayaḥ, iti | citaḥ stha paricita ūrdhvacitaḥ śrayadhvaṃ pitaro devatā | prajāpatirvaḥ sādayatu tayā devatayā, iti| āpyāyasva, saṃ te ( 3), iti || aghniyā aganma sapta ca ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.