द्वादशसु विक्रामेष्वग्निमादधीत । द्वादश मासाः सम्वत्सरः । संवत्सरादेवैनमवरुध्याधत्ते । यद्द्वादशसु विक्रामेष्वादधीत । परिमितमवरुन्धीत । चक्षुर्निमित आदधीत । इयद्द्वादशविक्रामा३ इति । परिमितं चैवापरिमितं चावरुन्द्धे । अनृतं वै वाचा वदति । अनृतं मनसा ध्यायति १ चक्षुर्वै सत्यम् । अद्रा३गित्याह । अदर्शमिति । तत्सत्यम् । यश्चक्षुर्निमितेऽग्निमाधत्ते । सत्य एवैनमाधत्ते । तस्मादाहिताग्निर्नानृतं वदेत् । नास्य ब्राह्मणोऽनाश्वान्गृहे वसेत् । सत्ये ह्यस्याग्निराहितः । आग्नेयी वै रात्रिः २ । आग्नेयाः पशवः । ऐन्द्रमहः । नक्तं गार्हपत्यमादधाति । पशूनेवावरुन्द्धे । दिवाहवनीयम् । इन्द्रियमेवावरुन्द्धे । अर्धोदिते सूर्य आहवनीयमादधाति । एतस्मिन्वै लोके प्रजापतिः प्रजा असृजत । प्रजा एव तद्यजमानः सृजते । अथो भूतं चैव भविष्यच्चावरुन्द्धे ३ इडा वै मानवी यज्ञानुकाशिन्यासीत् । साशृणोत् । असुरा अग्निमादधत इति । तदगच्छत् । त आहवनीयमग्र आदधत । अथ गार्हपत्यम् । अथान्वाहार्यपचनम् । साब्रवीत् । प्रतीच्येषाꣳ श्रीरगात् । भद्रा भूत्वा पराभविष्यन्तीति ४ यस्यैवमग्निराधीयते । प्रतीच्यस्य श्रीरेति । भद्रो भूत्वा पराभवति । साशृणोत् । देवा अग्निमादधत इति । तदगच्छत् । तेऽन्वाहार्यपचनमग्र आदधत । अथ गार्हपत्यम् । अथाहवनीयम् । साब्रवीत् ५ प्राच्येषाꣳ श्रीरगात् । भद्रा भूत्वा सुवर्गं लोकमेष्यन्ति । प्रजां तु न वेत्स्यन्त इति । यस्यैवमग्निराधीयते । प्राच्यस्य श्रीरेति । भद्रो भूत्वा सुवर्गं लोकमेति । प्रजां तु न विन्दते । साब्रवीदिडा मनुम् । तथा वा अहं तवाग्निमाधास्यामि । यथा प्र प्रजया पशुभिर्मिथुनैर्जनिष्यसे ६ प्रत्यस्मिꣳल्लोके स्थास्यसि । अभि सुवर्गं लोकं जेष्यसीति । गार्हपत्यमग्र आदधात् । गार्हपत्यं वा अनु प्रजाः पशवः प्रजायन्ते । गार्हपत्येनैवास्मै प्रजां पशून्प्राजनयत् । अथान्वाहार्यपचनम् । तिर्यङ्ङिव वा अयं लोकः । अस्मिन्नेव तेन लोके प्रत्यतिष्ठत् । अथाहवनीयम् । तेनैव सुवर्गं लोकमभ्यजयत् ७ यस्यैवमग्निराधीयते । प्र प्रजया पशुभिर्मिथुनैर्जायते । प्रत्यस्मिꣳल्लोके तिष्ठति । अभि सुवर्गं लोकं जयति । यस्य वा अयथादेवतमग्निराधीयते । आ देवताभ्यो वृश्च्यते । पापीयान्भवति । यस्य यथादेवतम् । न देवताभ्य आ वृश्च्यते । वसीयान्भवति । भृगूणां त्वाऽङ्गिरसां व्रतपते व्रतेनाऽऽदधामीति भृग्वङ्गिरसामादध्यात् । आदित्यानां त्वा देवानां व्रतपते व्रतेनाऽऽदधामीत्यन्यासां ब्राह्मणीनां प्रजानाम् । वरुणस्य त्वा राज्ञो व्रतपते व्रतेनाऽऽदधामीति राज्ञः । इन्द्रस्य त्वेन्द्रियेण व्रतपते व्रतेनादधामीति राजन्यस्य । मनोस्त्वा ग्रामण्यो व्रतपते व्रतेनाऽऽदधामीति वैश्यस्य । ऋभूणां त्वा देवानां व्रतपते व्रतेनाऽऽदधामीति रथकारस्य । यथादेवतमग्निराधीयते । न देवताभ्य आ वृश्च्यते । वसीयान्भवति ८ इति कृष्णयजुर्वेदीयतैत्तिरीयब्राह्मणे प्रथमकाण्डे प्रथमप्रपाठके चतुर्थोनुवाकः॥
dvādaśasu vikrāmeṣvagnimādadhīta | dvādaśa māsāḥ samvatsaraḥ | saṃvatsarādevainamavarudhyādhatte | yaddvādaśasu vikrāmeṣvādadhīta | parimitamavarundhīta | cakṣurnimita ādadhīta | iyaddvādaśavikrāmā3 iti | parimitaṃ caivāparimitaṃ cāvarunddhe | anṛtaṃ vai vācā vadati | anṛtaṃ manasā dhyāyati 1 cakṣurvai satyam | adrā3gityāha | adarśamiti | tatsatyam | yaścakṣurnimite'gnimādhatte | satya evainamādhatte | tasmādāhitāgnirnānṛtaṃ vadet | nāsya brāhmaṇo'nāśvāngṛhe vaset | satye hyasyāgnirāhitaḥ | āgneyī vai rātriḥ 2 | āgneyāḥ paśavaḥ | aindramahaḥ | naktaṃ gārhapatyamādadhāti | paśūnevāvarunddhe | divāhavanīyam | indriyamevāvarunddhe | ardhodite sūrya āhavanīyamādadhāti | etasminvai loke prajāpatiḥ prajā asṛjata | prajā eva tadyajamānaḥ sṛjate | atho bhūtaṃ caiva bhaviṣyaccāvarunddhe 3 iḍā vai mānavī yajñānukāśinyāsīt | sāśṛṇot | asurā agnimādadhata iti | tadagacchat | ta āhavanīyamagra ādadhata | atha gārhapatyam | athānvāhāryapacanam | sābravīt | pratīcyeṣām̐ śrīragāt | bhadrā bhūtvā parābhaviṣyantīti 4 yasyaivamagnirādhīyate | pratīcyasya śrīreti | bhadro bhūtvā parābhavati | sāśṛṇot | devā agnimādadhata iti | tadagacchat | te'nvāhāryapacanamagra ādadhata | atha gārhapatyam | athāhavanīyam | sābravīt 5 prācyeṣām̐ śrīragāt | bhadrā bhūtvā suvargaṃ lokameṣyanti | prajāṃ tu na vetsyanta iti | yasyaivamagnirādhīyate | prācyasya śrīreti | bhadro bhūtvā suvargaṃ lokameti | prajāṃ tu na vindate | sābravīdiḍā manum | tathā vā ahaṃ tavāgnimādhāsyāmi | yathā pra prajayā paśubhirmithunairjaniṣyase 6 pratyasmim̐lloke sthāsyasi | abhi suvargaṃ lokaṃ jeṣyasīti | gārhapatyamagra ādadhāt | gārhapatyaṃ vā anu prajāḥ paśavaḥ prajāyante | gārhapatyenaivāsmai prajāṃ paśūnprājanayat | athānvāhāryapacanam | tiryaṅṅiva vā ayaṃ lokaḥ | asminneva tena loke pratyatiṣṭhat | athāhavanīyam | tenaiva suvargaṃ lokamabhyajayat 7 yasyaivamagnirādhīyate | pra prajayā paśubhirmithunairjāyate | pratyasmim̐lloke tiṣṭhati | abhi suvargaṃ lokaṃ jayati | yasya vā ayathādevatamagnirādhīyate | ā devatābhyo vṛścyate | pāpīyānbhavati | yasya yathādevatam | na devatābhya ā vṛścyate | vasīyānbhavati | bhṛgūṇāṃ tvā'ṅgirasāṃ vratapate vratenā''dadhāmīti bhṛgvaṅgirasāmādadhyāt | ādityānāṃ tvā devānāṃ vratapate vratenā''dadhāmītyanyāsāṃ brāhmaṇīnāṃ prajānām | varuṇasya tvā rājño vratapate vratenā''dadhāmīti rājñaḥ | indrasya tvendriyeṇa vratapate vratenādadhāmīti rājanyasya | manostvā grāmaṇyo vratapate vratenā''dadhāmīti vaiśyasya | ṛbhūṇāṃ tvā devānāṃ vratapate vratenā''dadhāmīti rathakārasya | yathādevatamagnirādhīyate | na devatābhya ā vṛścyate | vasīyānbhavati 8 iti kṛṣṇayajurvedīyataittirīyabrāhmaṇe prathamakāṇḍe prathamaprapāṭhake caturthonuvākaḥ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.