घर्मः शिरस्तदयमग्निः । संप्रियः पशुभिर्भुवत् । छर्दिस्तोकाय तनयाय यच्छ । वातः प्राणस्तदयमग्निः । संप्रियः पशुभिर्भुवत् । स्वदितं तोकाय तनयाय पितुं पच । प्राचीमनु प्रदिशं प्रेहि विद्वान् । अग्नेरग्ने पुरो अग्निर्भवेह । विश्वा आशा दीद्यानो विभाहि । ऊर्जं नो धेहि द्विपदे चतुष्पदे १ अर्कश्चक्षुस्तदसौ सूर्यस्तदयमग्निः । संप्रियः पशुभिर्भुवत् । यत्ते शुक्र शुक्रं वर्चः शुक्रा तनूः । शुक्रं ज्योतिरजस्रम् । तेन मे दीदिहि तेन त्वादधे । अग्निनाग्ने ब्रह्मणा । आनशे व्यानशे सर्वमायुर्व्यानशे । ये ते अग्ने शिवे तनुवौ । विराट्च स्वराट्च । ते मा विशतां ते मा जिन्वताम् २ ये ते अग्ने शिवे तनुवौ । सम्राट्चाभिभूश्च । ते मा विशतां ते मा जिन्वताम् । ये ते अग्ने शिवे तनुवौ । विभूश्च परिभूश्च । ते मा विशतां ते मा जिन्वताम् । ये ते अग्ने शिवे तनुवौ । प्रभ्वी च प्रभूतिश्च । ते मा विशतां ते मा जिन्वताम् । यास्ते अग्ने शिवास्तनुवः । ताभिस्त्वादधे । यास्ते अग्ने घोरास्तनुवः । ताभिरमुं गच्छ ३
gharmaḥ śirastadayamagniḥ | saṃpriyaḥ paśubhirbhuvat | chardistokāya tanayāya yaccha | vātaḥ prāṇastadayamagniḥ | saṃpriyaḥ paśubhirbhuvat | svaditaṃ tokāya tanayāya pituṃ paca | prācīmanu pradiśaṃ prehi vidvān | agneragne puro agnirbhaveha | viśvā āśā dīdyāno vibhāhi | ūrjaṃ no dhehi dvipade catuṣpade 1 arkaścakṣustadasau sūryastadayamagniḥ | saṃpriyaḥ paśubhirbhuvat | yatte śukra śukraṃ varcaḥ śukrā tanūḥ | śukraṃ jyotirajasram | tena me dīdihi tena tvādadhe | agnināgne brahmaṇā | ānaśe vyānaśe sarvamāyurvyānaśe | ye te agne śive tanuvau | virāṭca svarāṭca | te mā viśatāṃ te mā jinvatām 2 ye te agne śive tanuvau | samrāṭcābhibhūśca | te mā viśatāṃ te mā jinvatām | ye te agne śive tanuvau | vibhūśca paribhūśca | te mā viśatāṃ te mā jinvatām | ye te agne śive tanuvau | prabhvī ca prabhūtiśca | te mā viśatāṃ te mā jinvatām | yāste agne śivāstanuvaḥ | tābhistvādadhe | yāste agne ghorāstanuvaḥ | tābhiramuṃ gaccha 3
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.