अग्निमद्य होतारमवृणीत । अयꣳ सुतासुती यजमानः । पचन्पक्तीः । पचन्पुरोडाशान् । गृह्णन्ग्रहान् । बध्नन्नश्विभ्यां छागꣳ सरस्वत्या इन्द्राय । बध्नन्त्सरस्वत्यै मेषमिन्द्रायाश्विभ्याम् । बध्नन्निन्द्रायर्षभमश्विभ्याꣳ सरस्वत्यै । सूपस्था अद्य देवो वनस्पतिरभवत् । अश्विभ्यां छागेन सरस्वत्या इन्द्राय १ सरस्वत्यै मेषेणेन्द्रायाश्विभ्याम् । इन्द्रायर्षभेणाश्विभ्याꣳ सरस्वत्यै । अक्षꣳ स्तान्मेदस्तः प्रति पचताग्रभीषुः । अवीवृधन्त ग्रहैः । अपातामश्विना सरस्वतीन्द्रः सुत्रामा वृत्रहा । सोमान्त्सुराम्णः । उपो उक्थामदाः श्रौद्विमदा अदन् । अवीवृधन्ताङ्गूषैः । त्वामद्यर्ष आर्षेयर्षीणां नपादवृणीत । अयꣳ सुतासुती यजमानः । बहुभ्य आ संगतेभ्यः । एष मे देवेषु वसु वार्या यक्ष्यत इति । ता या देवा देवदानान्यदुः । तान्यस्मा आ च शास्स्व । आ च गुरस्व । इषितश्च होतरसि भद्र वाच्याय प्रेषितो मानुषः । सूक्तवाकाय सूक्ता ब्रूहि २
agnimadya hotāramavṛṇīta | ayam̐ sutāsutī yajamānaḥ | pacanpaktīḥ | pacanpuroḍāśān | gṛhṇangrahān | badhnannaśvibhyāṃ chāgam̐ sarasvatyā indrāya | badhnantsarasvatyai meṣamindrāyāśvibhyām | badhnannindrāyarṣabhamaśvibhyām̐ sarasvatyai | sūpasthā adya devo vanaspatirabhavat | aśvibhyāṃ chāgena sarasvatyā indrāya 1 sarasvatyai meṣeṇendrāyāśvibhyām | indrāyarṣabheṇāśvibhyām̐ sarasvatyai | akṣam̐ stānmedastaḥ prati pacatāgrabhīṣuḥ | avīvṛdhanta grahaiḥ | apātāmaśvinā sarasvatīndraḥ sutrāmā vṛtrahā | somāntsurāmṇaḥ | upo ukthāmadāḥ śraudvimadā adan | avīvṛdhantāṅgūṣaiḥ | tvāmadyarṣa ārṣeyarṣīṇāṃ napādavṛṇīta | ayam̐ sutāsutī yajamānaḥ | bahubhya ā saṃgatebhyaḥ | eṣa me deveṣu vasu vāryā yakṣyata iti | tā yā devā devadānānyaduḥ | tānyasmā ā ca śāssva | ā ca gurasva | iṣitaśca hotarasi bhadra vācyāya preṣito mānuṣaḥ | sūktavākāya sūktā brūhi 2
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.