आ चर्षणिप्रा । विवेष यन्मा । तꣳ सध्रीचीः । सत्यमित्तन्न त्वावाꣳ अन्यो अस्ति । इन्द्र देवो न मर्त्यो ज्यायान् । अहन्नहिं परिशयानमर्णः । अवासृजोऽपो अच्छा समुद्र म् । प्रससाहिषे पुरुहूत शत्रून् । ज्येष्ठस्ते शुष्म इह रातिरस्तु । इन्द्रा भर दक्षिणेना वसूनि । पतिः सिन्धूनामसि रेवतीनाम् । स शेवृधमधिधा द्युम्नमस्मे । महि क्षत्रं जनाषाडिन्द्र तव्यम् । रक्षा च नो मघोनः पाहि सूरीन् । राये च नः स्वपत्या इषे धाः १
ā carṣaṇiprā | viveṣa yanmā | tam̐ sadhrīcīḥ | satyamittanna tvāvām̐ anyo asti | indra devo na martyo jyāyān | ahannahiṃ pariśayānamarṇaḥ | avāsṛjo'po acchā samudra m | prasasāhiṣe puruhūta śatrūn | jyeṣṭhaste śuṣma iha rātirastu | indrā bhara dakṣiṇenā vasūni | patiḥ sindhūnāmasi revatīnām | sa śevṛdhamadhidhā dyumnamasme | mahi kṣatraṃ janāṣāḍindra tavyam | rakṣā ca no maghonaḥ pāhi sūrīn | rāye ca naḥ svapatyā iṣe dhāḥ 1
Sanskrit only: no published translation is held for this verse.
देवं बर्हिरिन्द्रꣳ सुदेवं देवैः । वीरवत्स्तीर्णं वेद्यामवर्धयत् । वस्तोर्वृतं प्राक्तोर्भृतम् । राया बर्हिष्मतोऽत्यगात् । वसुवने वसुधेयस्य वेतु यज । देवीर्द्वार इन्द्रꣳ संघाते । विड्वीर्यामन्नवर्धयन् । आ वत्सेन तरुणेन कुमारेण च मीविता अपार्वाणम् । रेणुककाटं नुदन्ताम् । वसुवने वसुधेयस्य वियन्तु यज १
देवी उषासानक्ता । इन्द्रं यज्ञे प्रयत्यह्वेताम् । दैवीर्विशः प्रायासिष्टाम् । सुप्रीते सुधिते अभूताम् । वसुवने वसुधेयस्य वीतां यज । देवी जोष्ट्री वसुधिती ।देवमिन्द्र मवर्धताम् । अयाव्यन्याघा द्वेषाँसि । आन्यावाक्षीद्वसु वार्याणि । यजमानाय शिक्षिते २
वसुवने वसुधेयस्य वीतां यज । देवी ऊर्जाहुती दुघे सुदुघे । पयसेन्द्रमवर्धताम् । इषमूर्जमन्यावाक्षीत् । सग्धिꣳ सपीतिमन्या । नवेन पूर्वं दयमाने । पुराणेन नवम् । अधातामूर्जमूर्जाहुती वसु वार्याणि । यजमानाय शिक्षिते । वसुवने वसुधेयस्य वीतां यज ३
देवा दैव्या होतारा । देवमिन्द्रमवर्धताम् । हताघशँसावाभार्ष्टां वसु वार्याणि । यजमानाय शिक्षितौ । वसुवने वसुधेयस्य वीतां यज । देवीस्तिस्रस्तिस्रो देवीः । पतिमिन्द्र मवर्धयन् । ।
अस्पृक्षद्भारती दिवम् । रुद्रैर्यज्ञꣳ सरस्वती ।इडा वसुमती गृहान् ४
वसुवने वसुधेयस्य वियन्तु यज । देव इन्द्रो नराशँसः । त्रिवरूथस्त्रिवन्धुरः । देवमिन्द्रमवर्धयत् । शतेन शितिपृष्ठानामाहितः । सहस्रेण प्रवर्तते । मित्रावरुणेदस्य होत्रमर्हतः । बृहस्पतिः स्तोत्रम् । अश्विनाध्वर्यवम् । वसुवने वसुधेयस्य वेतु यज ५
देव इन्द्रो वनस्पतिः । हिरण्यपर्णो मधुशाखः सुपिप्पलः । देवमिन्द्रमवर्धयत् । दिवमग्रेणाप्रात् । आन्तरिक्षं पृथिवीमदृँहीत् । वसुवने वसुधेयस्य वेतु यज । देवं बर्हिर्वारितीनाम् । देवमिन्द्रमवर्धयत् । स्वासस्थमिन्द्रेणासन्नम् । अन्या बर्हीँष्यभ्यभूत् । वसुवने वसुधेयस्य वेतु यज । देवो अग्निः स्विष्टकृत् । देवमिन्द्रमवर्धयत् । स्विष्टं कुर्वन्त्स्विष्टकृत् । स्विष्टमद्य करोतु नः । वसुवने वसुधेयस्य वेतु यज ६
devaṃ barhirindram̐ sudevaṃ devaiḥ | vīravatstīrṇaṃ vedyāmavardhayat | vastorvṛtaṃ prāktorbhṛtam | rāyā barhiṣmato'tyagāt | vasuvane vasudheyasya vetu yaja | devīrdvāra indram̐ saṃghāte | viḍvīryāmannavardhayan | ā vatsena taruṇena kumāreṇa ca mīvitā apārvāṇam | reṇukakāṭaṃ nudantām | vasuvane vasudheyasya viyantu yaja 1
devī uṣāsānaktā | indraṃ yajñe prayatyahvetām | daivīrviśaḥ prāyāsiṣṭām | suprīte sudhite abhūtām | vasuvane vasudheyasya vītāṃ yaja | devī joṣṭrī vasudhitī |devamindra mavardhatām | ayāvyanyāghā dveṣā~si | ānyāvākṣīdvasu vāryāṇi | yajamānāya śikṣite 2
vasuvane vasudheyasya vītāṃ yaja | devī ūrjāhutī dughe sudughe | payasendramavardhatām | iṣamūrjamanyāvākṣīt | sagdhim̐ sapītimanyā | navena pūrvaṃ dayamāne | purāṇena navam | adhātāmūrjamūrjāhutī vasu vāryāṇi | yajamānāya śikṣite | vasuvane vasudheyasya vītāṃ yaja 3
devā daivyā hotārā | devamindramavardhatām | hatāghaśa~sāvābhārṣṭāṃ vasu vāryāṇi | yajamānāya śikṣitau | vasuvane vasudheyasya vītāṃ yaja | devīstisrastisro devīḥ | patimindra mavardhayan | |
aspṛkṣadbhāratī divam | rudrairyajñam̐ sarasvatī |iḍā vasumatī gṛhān 4
vasuvane vasudheyasya viyantu yaja | deva indro narāśa~saḥ | trivarūthastrivandhuraḥ | devamindramavardhayat | śatena śitipṛṣṭhānāmāhitaḥ | sahasreṇa pravartate | mitrāvaruṇedasya hotramarhataḥ | bṛhaspatiḥ stotram | aśvinādhvaryavam | vasuvane vasudheyasya vetu yaja 5
deva indro vanaspatiḥ | hiraṇyaparṇo madhuśākhaḥ supippalaḥ | devamindramavardhayat | divamagreṇāprāt | āntarikṣaṃ pṛthivīmadṛ~hīt | vasuvane vasudheyasya vetu yaja | devaṃ barhirvāritīnām | devamindramavardhayat | svāsasthamindreṇāsannam | anyā barhī~ṣyabhyabhūt | vasuvane vasudheyasya vetu yaja | devo agniḥ sviṣṭakṛt | devamindramavardhayat | sviṣṭaṃ kurvantsviṣṭakṛt | sviṣṭamadya karotu naḥ | vasuvane vasudheyasya vetu yaja 6
Sanskrit only: no published translation is held for this verse.
होता यक्षत्समिधाग्निमिडस्पदे । अश्विनेन्द्रꣳ सरस्वतीम् । अजो धूम्रो न गोधूमैः क्वलैर्भेषजम् । मधु शष्पैर्न तेज इन्द्रियम् । पयः सोमः परिस्रुता घृतं मधु । वियन्त्वाज्यस्य होतर्यज । होता यक्षत्तनूनपात्सरस्वती ।अविर्मेषो न भेषजम् । पथा मधुमताऽऽभरन् । अश्विनेन्द्राय वीर्यम् १
बदरैरुपवाकाभिर्भेषजं तोक्मभिः । पयः सोमः परिस्रुता घृतं मधु । वियन्त्वाज्यस्य होतर्यज । होता यक्षन्नराशँसं न नग्नहुम् । पतिꣳ सुरायै भेषजम् । मेषः सरस्वती भिषक् । रथो न चन्द्र्यश्विनोर्वपा इन्द्रस्य वीर्यम् । बदरैरुपवाकाभिर्भेषजं तोक्मभिः । पयः सोमः परिस्रुता घृतं मधु । वियन्त्वाज्यस्य होतर्यज २
होता यक्षदिडेडित आजुह्वानः सरस्वतीम् । इन्द्रं बलेन वर्धयन् । ऋषभेण गवेन्द्रियम् । अश्विनेन्द्राय वीर्यम् । यवैः कर्कन्धुभिः । मधु लाजैर्न मासरम् । पयः सोमः परिस्रुता घृतं मधु । वियन्त्वाज्यस्य होतर्यज । होता यक्षद्बर्हिः । सुष्टरीमोर्णम्रदाः । भिषङ् नासत्या ३
भिषजाश्विनाश्वा शिशुमती भिषग् । धेनुः सरस्वती भिषग् । दुह इन्द्राय भेषजम् । पयः सोमः परिस्रुता घृतं मधु । वियन्त्वाज्यस्य होतर्यज । होता यक्षद्दुरो दिशः । कवष्यो न व्यचस्वतीः । अश्विभ्यां न दुरो दिशः । इन्द्रो न रोदसी दुघे । दुहे कामान्त्सरस्वती ४
अश्विनेन्द्राय भेषजम् । शुक्रं न ज्योतिरिन्द्रियम् । पयः सोमः परिस्रुता घृतं मधु । वियन्त्वाज्यस्य होतर्यज । होता यक्षत्सुपेशसोषे नक्तं दिवा । अश्विना संजानाने । समञ्जाते सरस्वत्या । त्विषिमिन्द्रे न भेषजम् । श्येनो न रजसा हृदा । पयः सोमः परिस्रुता घृतं मधु ५
वियन्त्वाज्यस्य होतर्यज । होता यक्षद्दैव्या होतारा भिषजाश्विना । इन्द्रं न जागृवी दिवा नक्तं न भेषजैः । शूषꣳ सरस्वती भिषक् । सीसेन दुह इन्द्रियम् । पयः सोमः परिस्रुता घृतं मधु । वियन्त्वाज्यस्य होतर्यज । होता यक्षत्तिस्रो देवीर्न भेषजम् । त्रयस्त्रिधातवोऽपसः । रूपमिन्द्रे हिरण्ययम् ६
अश्विनेडा न भारती । वाचा सरस्वती मह । इन्द्राय दधुरिन्द्रियम् । पयः सोमः परिस्रुता घृतं मधु । वियन्त्वाज्यस्य होतर्यज । होता यक्षत्त्वष्टारमिन्द्रमश्विना । भिषजं न सरस्वतीम् । ओजो न जूतिरिन्द्रियम् । वृको न रभसो भिषक् । यशः सुरया भेषजम् ७
श्रिया न मासरम् । पयः सोमः परिस्रुता घृतं मधु । वियन्त्वाज्यस्य होतर्यज । होता यक्षद्वनस्पतिम् । शमितारꣳ शतक्रतुम् । भीमं न मन्युꣳ राजानं व्याघ्रं नमसाश्विना । भामम् सरस्वती भिषक् । इन्द्राय दुह इन्द्रियम् । पयः सोमः परिस्रुता घृतं मधु वियन्त्वाज्यस्य होतर्यज ८
होता यक्षदग्निꣳ स्वाहाज्यस्य स्तोकानाम् । स्वाहा मेदसां पृथक् । स्वाहा छागमश्विभ्याम् । स्वाहा मेषꣳ सरस्वत्यै । स्वाहर्षभमिन्द्राय सिँहाय सहसेन्द्रियम् । स्वाहाग्निं न भेषजम् । स्वाहा सोममिन्द्रियम् । स्वाहेन्द्रꣳ सुत्रामाणꣳ सवितारं वरुणं भिषजां पतिम् । स्वाहा वनस्पतिं प्रियं पाथो न भेषजम् । स्वहा देवाꣳ आज्यपान् ९
स्वाहाग्निꣳ होत्राज्जुषाणो अग्निर्भेषजम् । पयः सोमः परिस्रुता घृतं मधु । वियन्त्वाज्यस्य होतर्यज । होता यक्षदश्विना सरस्वतीमिन्द्रꣳ सुत्रामाणम् । इमे सोमाः सुरामाणः । छागैर्न मेषैर्ऋषभैः सुताः । शष्पैर्न तोक्मभिः । लाजैर्महस्वन्तः । मदा मासरेण परिष्कृताः । शुक्राः पयस्वन्तोऽमृताः । प्रस्थिता वो मधुश्चुतः तानश्विना सरस्वतीन्द्रः सुत्रामा वृत्रहा । जुषन्ताꣳ सौम्यं मधु । पिबन्तु मदन्तु वियन्तु सोमम् । होतर्यज १०
hotā yakṣatsamidhāgnimiḍaspade | aśvinendram̐ sarasvatīm | ajo dhūmro na godhūmaiḥ kvalairbheṣajam | madhu śaṣpairna teja indriyam | payaḥ somaḥ parisrutā ghṛtaṃ madhu | viyantvājyasya hotaryaja | hotā yakṣattanūnapātsarasvatī |avirmeṣo na bheṣajam | pathā madhumatā''bharan | aśvinendrāya vīryam 1
badarairupavākābhirbheṣajaṃ tokmabhiḥ | payaḥ somaḥ parisrutā ghṛtaṃ madhu | viyantvājyasya hotaryaja | hotā yakṣannarāśa~saṃ na nagnahum | patim̐ surāyai bheṣajam | meṣaḥ sarasvatī bhiṣak | ratho na candryaśvinorvapā indrasya vīryam | badarairupavākābhirbheṣajaṃ tokmabhiḥ | payaḥ somaḥ parisrutā ghṛtaṃ madhu | viyantvājyasya hotaryaja 2
hotā yakṣadiḍeḍita ājuhvānaḥ sarasvatīm | indraṃ balena vardhayan | ṛṣabheṇa gavendriyam | aśvinendrāya vīryam | yavaiḥ karkandhubhiḥ | madhu lājairna māsaram | payaḥ somaḥ parisrutā ghṛtaṃ madhu | viyantvājyasya hotaryaja | hotā yakṣadbarhiḥ | suṣṭarīmorṇamradāḥ | bhiṣaṅ nāsatyā 3
bhiṣajāśvināśvā śiśumatī bhiṣag | dhenuḥ sarasvatī bhiṣag | duha indrāya bheṣajam | payaḥ somaḥ parisrutā ghṛtaṃ madhu | viyantvājyasya hotaryaja | hotā yakṣadduro diśaḥ | kavaṣyo na vyacasvatīḥ | aśvibhyāṃ na duro diśaḥ | indro na rodasī dughe | duhe kāmāntsarasvatī 4
aśvinendrāya bheṣajam | śukraṃ na jyotirindriyam | payaḥ somaḥ parisrutā ghṛtaṃ madhu | viyantvājyasya hotaryaja | hotā yakṣatsupeśasoṣe naktaṃ divā | aśvinā saṃjānāne | samañjāte sarasvatyā | tviṣimindre na bheṣajam | śyeno na rajasā hṛdā | payaḥ somaḥ parisrutā ghṛtaṃ madhu 5
viyantvājyasya hotaryaja | hotā yakṣaddaivyā hotārā bhiṣajāśvinā | indraṃ na jāgṛvī divā naktaṃ na bheṣajaiḥ | śūṣam̐ sarasvatī bhiṣak | sīsena duha indriyam | payaḥ somaḥ parisrutā ghṛtaṃ madhu | viyantvājyasya hotaryaja | hotā yakṣattisro devīrna bheṣajam | trayastridhātavo'pasaḥ | rūpamindre hiraṇyayam 6
aśvineḍā na bhāratī | vācā sarasvatī maha | indrāya dadhurindriyam | payaḥ somaḥ parisrutā ghṛtaṃ madhu | viyantvājyasya hotaryaja | hotā yakṣattvaṣṭāramindramaśvinā | bhiṣajaṃ na sarasvatīm | ojo na jūtirindriyam | vṛko na rabhaso bhiṣak | yaśaḥ surayā bheṣajam 7
śriyā na māsaram | payaḥ somaḥ parisrutā ghṛtaṃ madhu | viyantvājyasya hotaryaja | hotā yakṣadvanaspatim | śamitāram̐ śatakratum | bhīmaṃ na manyum̐ rājānaṃ vyāghraṃ namasāśvinā | bhāmam sarasvatī bhiṣak | indrāya duha indriyam | payaḥ somaḥ parisrutā ghṛtaṃ madhu viyantvājyasya hotaryaja 8
hotā yakṣadagnim̐ svāhājyasya stokānām | svāhā medasāṃ pṛthak | svāhā chāgamaśvibhyām | svāhā meṣam̐ sarasvatyai | svāharṣabhamindrāya si~hāya sahasendriyam | svāhāgniṃ na bheṣajam | svāhā somamindriyam | svāhendram̐ sutrāmāṇam̐ savitāraṃ varuṇaṃ bhiṣajāṃ patim | svāhā vanaspatiṃ priyaṃ pātho na bheṣajam | svahā devām̐ ājyapān 9
svāhāgnim̐ hotrājjuṣāṇo agnirbheṣajam | payaḥ somaḥ parisrutā ghṛtaṃ madhu | viyantvājyasya hotaryaja | hotā yakṣadaśvinā sarasvatīmindram̐ sutrāmāṇam | ime somāḥ surāmāṇaḥ | chāgairna meṣairṛṣabhaiḥ sutāḥ | śaṣpairna tokmabhiḥ | lājairmahasvantaḥ | madā māsareṇa pariṣkṛtāḥ | śukrāḥ payasvanto'mṛtāḥ | prasthitā vo madhuścutaḥ tānaśvinā sarasvatīndraḥ sutrāmā vṛtrahā | juṣantām̐ saumyaṃ madhu | pibantu madantu viyantu somam | hotaryaja 10
Sanskrit only: no published translation is held for this verse.
समिद्धो अग्निरश्विना । तप्तो घर्मो विराट्सुतः । दुहे धेनुः सरस्वती । सोमꣳ शुक्रमिहेन्द्रियम् । तनूपा भिषजा सुते । अश्विनोभा सरस्वती । मध्वा रजाँसीन्द्रियम् । इन्द्राय पथिभिर्वहान् । इन्द्रायेन्दुꣳ सरस्वती । नराशँसेन नग्नहुः १
अधातामश्विना मधु । भेषजं भिषजा सुते । आजुह्वाना सरस्वती । इन्द्रायेन्द्रियाणि वीर्यम् । इडाभिरश्विनाविषम् । समूर्जꣳ सꣳ रयिं दधुः । अश्विना नमुचेः सुतम् । सोमꣳ शुक्रं परिस्रुता । सरस्वती तमाभरत् । बर्हिषेन्द्राय पातवे २
कवष्यो न व्यचस्वतीः । अश्विभ्यां न दुरो दिशः । इन्द्रो न रोदसी दुघे । दुहे कामान्त्सरस्वती ।उषासा नक्तमश्विना । दिवेन्द्रꣳ सायमिन्द्रियैः । संजानाने सुपेशसा । समञ्जाते सरस्वत्या पातं नो अश्विना दिवा । पाहि नक्तꣳ सरस्वति ३
दैव्या होतारा भिषजा । पातमिन्द्रꣳ सचा सुते । तिस्रस्त्रेधा सरस्वती ।अश्विना भारतीडा । तीव्रं परिस्रुता सोमम् । इन्द्राय सुषवुर्मदम् । अश्विना भेषजं मधु । भेषजं नः सरस्वती । इन्द्रे त्वष्टा यशः श्रियम् । रूपꣳ रूपमधुः सुते । ऋतुथेन्द्रो वनस्पतिः । शशमानः परिस्रुता । कीलालमश्विभ्यां मधु । दुहे धेनुः सरस्वती ।गोभिर्न सोममश्विना । मासरेण परिष्कृता । समधाताꣳ सरस्वत्या । स्वाहेन्द्रे सुतं मधु ४
samiddho agniraśvinā | tapto gharmo virāṭsutaḥ | duhe dhenuḥ sarasvatī | somam̐ śukramihendriyam | tanūpā bhiṣajā sute | aśvinobhā sarasvatī | madhvā rajā~sīndriyam | indrāya pathibhirvahān | indrāyendum̐ sarasvatī | narāśa~sena nagnahuḥ 1
adhātāmaśvinā madhu | bheṣajaṃ bhiṣajā sute | ājuhvānā sarasvatī | indrāyendriyāṇi vīryam | iḍābhiraśvināviṣam | samūrjam̐ sam̐ rayiṃ dadhuḥ | aśvinā namuceḥ sutam | somam̐ śukraṃ parisrutā | sarasvatī tamābharat | barhiṣendrāya pātave 2
kavaṣyo na vyacasvatīḥ | aśvibhyāṃ na duro diśaḥ | indro na rodasī dughe | duhe kāmāntsarasvatī |uṣāsā naktamaśvinā | divendram̐ sāyamindriyaiḥ | saṃjānāne supeśasā | samañjāte sarasvatyā pātaṃ no aśvinā divā | pāhi naktam̐ sarasvati 3
daivyā hotārā bhiṣajā | pātamindram̐ sacā sute | tisrastredhā sarasvatī |aśvinā bhāratīḍā | tīvraṃ parisrutā somam | indrāya suṣavurmadam | aśvinā bheṣajaṃ madhu | bheṣajaṃ naḥ sarasvatī | indre tvaṣṭā yaśaḥ śriyam | rūpam̐ rūpamadhuḥ sute | ṛtuthendro vanaspatiḥ | śaśamānaḥ parisrutā | kīlālamaśvibhyāṃ madhu | duhe dhenuḥ sarasvatī |gobhirna somamaśvinā | māsareṇa pariṣkṛtā | samadhātām̐ sarasvatyā | svāhendre sutaṃ madhu 4
Sanskrit only: no published translation is held for this verse.
अश्विना हविरिन्द्रियम् । नमुचेर्धिया सरस्वती । आ शुक्रमासुराद्वसु । मघमिन्द्राय जभ्रिरे । यमश्विना सरस्वती । हविषेन्द्रमवर्धयन् । स बिभेद बलं मघम् । नमुचावासुरे सचा । तमिन्द्रं पशवः सचा । अश्विनोभा सरस्वती १
दधाना अभ्यनूषत । हविषा यज्ञमिन्द्रियम् । य इन्द्र इन्द्रियं दधुः । सविता वरुणो भगः । स सुत्रामा हविष्पतिः । यजमानाय सश्चत । सविता वरुणो दधत् । यजमानाय दाशुषे । आदत्त नमुचेर्वसु । सुत्रामा बलमिन्द्रियम् २
वरुणः क्षत्रमिन्द्रियम् । भगेन सविता श्रियम् । सुत्रामा यशसा बलम् । दधाना यज्ञमाशत । अश्विना गोभिरिन्द्रियम् । अश्वेभिर्वीर्यं बलम् । हविषेन्द्रꣳ सरस्वती । यजमानमवर्धयन् । ता नासत्या सुपेशसा । हिरण्यवर्तनी नरा । सरस्वती हविष्मती ।इन्द्र कर्मसु नोऽवत । ता भिषजा सुकर्मणा । सा सुदुघा सरस्वती ।स वृत्रहा शतक्रतुः । इन्द्राय दधुरिन्द्रियम् ३
aśvinā havirindriyam | namucerdhiyā sarasvatī | ā śukramāsurādvasu | maghamindrāya jabhrire | yamaśvinā sarasvatī | haviṣendramavardhayan | sa bibheda balaṃ magham | namucāvāsure sacā | tamindraṃ paśavaḥ sacā | aśvinobhā sarasvatī 1
dadhānā abhyanūṣata | haviṣā yajñamindriyam | ya indra indriyaṃ dadhuḥ | savitā varuṇo bhagaḥ | sa sutrāmā haviṣpatiḥ | yajamānāya saścata | savitā varuṇo dadhat | yajamānāya dāśuṣe | ādatta namucervasu | sutrāmā balamindriyam 2
varuṇaḥ kṣatramindriyam | bhagena savitā śriyam | sutrāmā yaśasā balam | dadhānā yajñamāśata | aśvinā gobhirindriyam | aśvebhirvīryaṃ balam | haviṣendram̐ sarasvatī | yajamānamavardhayan | tā nāsatyā supeśasā | hiraṇyavartanī narā | sarasvatī haviṣmatī |indra karmasu no'vata | tā bhiṣajā sukarmaṇā | sā sudughā sarasvatī |sa vṛtrahā śatakratuḥ | indrāya dadhurindriyam 3
Sanskrit only: no published translation is held for this verse.
देवं बर्हिः सरस्वती ।सुदेवमिन्द्रे अश्विना । तेजो न चक्षुरक्ष्योः । बर्हिषा दधुरिन्द्रियम् । वसुवने वसुधेयस्य वियन्तु यज । देवीर्द्वारो अश्विना । भिषजेन्द्रे सरस्वती । प्राणं न वीर्यं नसि । द्वारो दधुरिन्द्रियम् । वसुवने वसुधेयस्य वियन्तु यज १
देवी उषासावश्विना । भिषजेन्द्रे सरस्वती । बलं न वाचमास्ये । उषाभ्यां दधुरिन्द्रियम् । वसुवने वसुधेयस्य वियन्तु यज । देवी जोष्ट्री अश्विना सुत्रामेन्द्रे सरस्वती । श्रोत्रं न कर्णयोर्यशः । जोष्ट्रीभ्यां दधुरिन्द्रियम् । वसुवने वसुधेयस्य वियन्तु यज २
देवी ऊर्जाहुती दुघे सुदुघे । पयसेन्द्रꣳ सरस्वत्यश्विना भिषजावत । शुक्रं न ज्योतिः स्तनयोराहुती धत्त इन्द्रियम् । वसुवने वसुधेयस्य वियन्तु यज । देवा देवानां भिषजा । होताराविन्द्रमश्विना । वषट्कारैः सरस्वती । त्विषिं न हृदये मतिम् । होतृभ्यां दधुरिन्द्रि यम् । वसुवने वसुधेयस्य वियन्तु यज ३
देवीस्तिस्रस्तिस्रो देवीः । सरस्वत्यश्विना भारतीडा । शूषं न मध्ये नाभ्याम् । इन्द्राय दधुरिन्द्रियम् । वसुवने वसुधेयस्य वियन्तु यज । देव इन्द्रो नराशँसः । त्रिवरूथः सरस्वत्याश्विभ्यामीयते रथः । रेतो न रूपममृतं जनित्रम् । इन्द्राय त्वष्टा दधदिन्द्रियाणि वसुवने वसुधेयस्य वियन्तु यज ४
देव इन्द्रो वनस्पतिः । हिरण्यपर्णो अश्विभ्याम् । सरस्वत्याः सुपिप्पलः । इन्द्राय पच्यते मधु । ओजो न जूतिमृषभो न भामम् । वनस्पतिर्नो दधदिन्द्रियाणि । वसुवने वसुधेयस्य वियन्तु यज । देवं बर्हिर्वारितीनाम् । अध्वरे स्तीर्णमश्विभ्याम् । ऊर्णम्रदाः सरस्वत्याः ५
स्योनमिन्द्र ते सदः । ईशायै मन्युꣳ राजानं बर्हिषा दधुरिन्द्रियम् । वसुवने वसुधेयस्य वियन्तु यज । देवो अग्निः स्विष्टकृत् । देवान्यक्षद्यथायथम् । होताराविन्द्र मश्विना । वाचा वाचꣳ सरस्वतीम् । अग्निꣳ सोमꣳ स्विष्टकृत् । स्विष्ट इन्द्रः सुत्रामा सविता वरुणो भिषक् । इष्टो देवो वनसपतिः । स्विष्टा देवा आज्यपाः । इष्टो अग्निरग्निना । होता होत्रे स्विष्टकृत् । यशो न दधदिन्द्रियम् । ऊर्जमपचितिꣳ स्वधाम् । वसुवने वसुधेयस्य वियन्तु यज ६
devaṃ barhiḥ sarasvatī |sudevamindre aśvinā | tejo na cakṣurakṣyoḥ | barhiṣā dadhurindriyam | vasuvane vasudheyasya viyantu yaja | devīrdvāro aśvinā | bhiṣajendre sarasvatī | prāṇaṃ na vīryaṃ nasi | dvāro dadhurindriyam | vasuvane vasudheyasya viyantu yaja 1
devī uṣāsāvaśvinā | bhiṣajendre sarasvatī | balaṃ na vācamāsye | uṣābhyāṃ dadhurindriyam | vasuvane vasudheyasya viyantu yaja | devī joṣṭrī aśvinā sutrāmendre sarasvatī | śrotraṃ na karṇayoryaśaḥ | joṣṭrībhyāṃ dadhurindriyam | vasuvane vasudheyasya viyantu yaja 2
devī ūrjāhutī dughe sudughe | payasendram̐ sarasvatyaśvinā bhiṣajāvata | śukraṃ na jyotiḥ stanayorāhutī dhatta indriyam | vasuvane vasudheyasya viyantu yaja | devā devānāṃ bhiṣajā | hotārāvindramaśvinā | vaṣaṭkāraiḥ sarasvatī | tviṣiṃ na hṛdaye matim | hotṛbhyāṃ dadhurindri yam | vasuvane vasudheyasya viyantu yaja 3
devīstisrastisro devīḥ | sarasvatyaśvinā bhāratīḍā | śūṣaṃ na madhye nābhyām | indrāya dadhurindriyam | vasuvane vasudheyasya viyantu yaja | deva indro narāśa~saḥ | trivarūthaḥ sarasvatyāśvibhyāmīyate rathaḥ | reto na rūpamamṛtaṃ janitram | indrāya tvaṣṭā dadhadindriyāṇi vasuvane vasudheyasya viyantu yaja 4
deva indro vanaspatiḥ | hiraṇyaparṇo aśvibhyām | sarasvatyāḥ supippalaḥ | indrāya pacyate madhu | ojo na jūtimṛṣabho na bhāmam | vanaspatirno dadhadindriyāṇi | vasuvane vasudheyasya viyantu yaja | devaṃ barhirvāritīnām | adhvare stīrṇamaśvibhyām | ūrṇamradāḥ sarasvatyāḥ 5
syonamindra te sadaḥ | īśāyai manyum̐ rājānaṃ barhiṣā dadhurindriyam | vasuvane vasudheyasya viyantu yaja | devo agniḥ sviṣṭakṛt | devānyakṣadyathāyatham | hotārāvindra maśvinā | vācā vācam̐ sarasvatīm | agnim̐ somam̐ sviṣṭakṛt | sviṣṭa indraḥ sutrāmā savitā varuṇo bhiṣak | iṣṭo devo vanasapatiḥ | sviṣṭā devā ājyapāḥ | iṣṭo agniragninā | hotā hotre sviṣṭakṛt | yaśo na dadhadindriyam | ūrjamapacitim̐ svadhām | vasuvane vasudheyasya viyantu yaja 6
Sanskrit only: no published translation is held for this verse.
अग्निमद्य होतारमवृणीत । अयꣳ सुतासुती यजमानः । पचन्पक्तीः । पचन्पुरोडाशान् । गृह्णन्ग्रहान् । बध्नन्नश्विभ्यां छागꣳ सरस्वत्या इन्द्राय । बध्नन्त्सरस्वत्यै मेषमिन्द्रायाश्विभ्याम् । बध्नन्निन्द्रायर्षभमश्विभ्याꣳ सरस्वत्यै । सूपस्था अद्य देवो वनस्पतिरभवत् । अश्विभ्यां छागेन सरस्वत्या इन्द्राय १
सरस्वत्यै मेषेणेन्द्रायाश्विभ्याम् । इन्द्रायर्षभेणाश्विभ्याꣳ सरस्वत्यै । अक्षꣳ स्तान्मेदस्तः प्रति पचताग्रभीषुः । अवीवृधन्त ग्रहैः । अपातामश्विना सरस्वतीन्द्रः सुत्रामा वृत्रहा । सोमान्त्सुराम्णः । उपो उक्थामदाः श्रौद्विमदा अदन् । अवीवृधन्ताङ्गूषैः । त्वामद्यर्ष आर्षेयर्षीणां नपादवृणीत । अयꣳ सुतासुती यजमानः । बहुभ्य आ संगतेभ्यः । एष मे देवेषु वसु वार्या यक्ष्यत इति । ता या देवा देवदानान्यदुः । तान्यस्मा आ च शास्स्व । आ च गुरस्व । इषितश्च होतरसि भद्र वाच्याय प्रेषितो मानुषः । सूक्तवाकाय सूक्ता ब्रूहि २
agnimadya hotāramavṛṇīta | ayam̐ sutāsutī yajamānaḥ | pacanpaktīḥ | pacanpuroḍāśān | gṛhṇangrahān | badhnannaśvibhyāṃ chāgam̐ sarasvatyā indrāya | badhnantsarasvatyai meṣamindrāyāśvibhyām | badhnannindrāyarṣabhamaśvibhyām̐ sarasvatyai | sūpasthā adya devo vanaspatirabhavat | aśvibhyāṃ chāgena sarasvatyā indrāya 1
sarasvatyai meṣeṇendrāyāśvibhyām | indrāyarṣabheṇāśvibhyām̐ sarasvatyai | akṣam̐ stānmedastaḥ prati pacatāgrabhīṣuḥ | avīvṛdhanta grahaiḥ | apātāmaśvinā sarasvatīndraḥ sutrāmā vṛtrahā | somāntsurāmṇaḥ | upo ukthāmadāḥ śraudvimadā adan | avīvṛdhantāṅgūṣaiḥ | tvāmadyarṣa ārṣeyarṣīṇāṃ napādavṛṇīta | ayam̐ sutāsutī yajamānaḥ | bahubhya ā saṃgatebhyaḥ | eṣa me deveṣu vasu vāryā yakṣyata iti | tā yā devā devadānānyaduḥ | tānyasmā ā ca śāssva | ā ca gurasva | iṣitaśca hotarasi bhadra vācyāya preṣito mānuṣaḥ | sūktavākāya sūktā brūhi 2
Sanskrit only: no published translation is held for this verse.
उशन्तस्त्वा हवामह । आ नो अग्ने सुकेतुना । त्वꣳ सोम महे भगं। त्वꣳ सोम प्र चिकितो मनीषा । त्वया हि नः पितरः सोम पूर्वे । त्वꣳ सोम पितृभिः संविदानः । बर्हिषदः पितर । आहं पितॄन् । उपहूताः पितरो । ऽग्निष्वात्ताः पितरः । अग्निष्वात्तानृतुमतो हवामहे । नराशँसे सोमपीथं य आशुः । ते नो अर्वन्तः सुहवा भवन्तु । शं नो भवन्तु द्विपदे शं चतुष्पदे । ये अग्निष्वात्ता येऽनग्निष्वात्ताः १
अँहोमुचः पितरः सोम्यासः । परेऽवरेऽमृतासो भवन्तः । अधिब्रुवन्तु ते अवन्त्वस्मान् । वान्यायै दुग्धे जुषमाणाः करम्भम् । उदीराणा अवरे परे च । अग्निष्वात्ता ऋतुभिः संविदानाः । इन्द्रवन्तो हविरिदं जुषन्ताम् । यदग्ने कव्यवाहन । त्वमग्न ईडितो जातवेदः । मातली कव्यैः । ये तातृपुर्देवत्रा जेहमानाः । होत्रावृधः स्तोमतष्टासो अर्कैः । आग्ने याहि सुविदत्रेभिरर्वाङ्।सत्यैः कव्यैः पितृभिर्घर्मसद्भिः । हव्यवाहमजरं पुरुप्रियम् । अग्निं घृतेन हविषा सपर्यन् । उपासदं कव्यवाहं पितृणाम् । स नः प्रजां वीरवतीꣳ समृण्वतु २
uśantastvā havāmaha | ā no agne suketunā | tvam̐ soma mahe bhagaṃ| tvam̐ soma pra cikito manīṣā | tvayā hi naḥ pitaraḥ soma pūrve | tvam̐ soma pitṛbhiḥ saṃvidānaḥ | barhiṣadaḥ pitara | āhaṃ pitṝn | upahūtāḥ pitaro | 'gniṣvāttāḥ pitaraḥ | agniṣvāttānṛtumato havāmahe | narāśa~se somapīthaṃ ya āśuḥ | te no arvantaḥ suhavā bhavantu | śaṃ no bhavantu dvipade śaṃ catuṣpade | ye agniṣvāttā ye'nagniṣvāttāḥ 1
a~homucaḥ pitaraḥ somyāsaḥ | pare'vare'mṛtāso bhavantaḥ | adhibruvantu te avantvasmān | vānyāyai dugdhe juṣamāṇāḥ karambham | udīrāṇā avare pare ca | agniṣvāttā ṛtubhiḥ saṃvidānāḥ | indravanto haviridaṃ juṣantām | yadagne kavyavāhana | tvamagna īḍito jātavedaḥ | mātalī kavyaiḥ | ye tātṛpurdevatrā jehamānāḥ | hotrāvṛdhaḥ stomataṣṭāso arkaiḥ | āgne yāhi suvidatrebhirarvāṅ|satyaiḥ kavyaiḥ pitṛbhirgharmasadbhiḥ | havyavāhamajaraṃ purupriyam | agniṃ ghṛtena haviṣā saparyan | upāsadaṃ kavyavāhaṃ pitṛṇām | sa naḥ prajāṃ vīravatīm̐ samṛṇvatu 2
Sanskrit only: no published translation is held for this verse.
होता यक्षदिडस्पदे । समिधानं महद्यशः । सुषमिद्धं वरेण्यम् । अग्निमिन्द्रं वयोधसम् । गायत्रीं छन्द इन्द्रियम् । त्र्यविं गां वयो दधत् । वेत्वाज्यस्य होतर्यज । होता यक्षच्छुचिव्रतम् । तनूनपातमुद्भिदम् । यं गर्भमदितिर्दधे १
शुचिमिन्द्रं वयोधसम् । उष्णिहं छन्द इन्द्रि यम् । दित्यवाहं गां वयो दधत् । वेत्वाज्यस्य होतर्यज । होता यक्षदीडेन्यम् । ईडितं वृत्रहन्तमम् । इडाभिरीड्यꣳ सहः । सोममिन्द्रं वयोधसम् । अनुष्टुभं छन्द इन्द्रियम् । त्रिवत्सं गां वयो दधत् २
वेत्वाज्यस्य होतर्यज । होता यक्षत्सुबर्हिषदम् । पूषण्वन्तममर्त्यम् । सीदन्तं बर्हिषि प्रिये । अमृतेन्द्रं वयोधसम् । बृहतीं छन्द इन्द्रियम् । पञ्चाविं गां वयो दधत् । वेत्वाज्यस्य होतर्यज । होता यक्षद्व्यचस्वतीः । सुप्रायणा ऋतावृधः ३
द्वारो देवीर्हिरण्ययीः । ब्रह्माण इन्द्रं वयोधसम् । पङ्क्तिं छन्द इहेन्द्रियम् । तुर्यवाहं गां वयो दधत् । वेत्वाज्यस्य होतर्यज । होता यक्षत्सुपेशसे । सुशिल्पे बृहती उभे । नक्तोषासा न दर्शते । विश्वमिन्द्रं वयोधसम् । त्रिष्टुभं छन्द इन्द्रियम् ४
षष्ठवाहं गां वयो दधत् । वेत्वाज्यस्य होतर्यज । होता यक्षत्प्रचेतसा । देवानामुत्तमं यशः । होतारा दैव्या कवी ।सयुजेन्द्रं वयोधसम् । जगतीं छन्द इहेन्द्रियम् । अनड्वाहं गां वयो दधत् । वेत्वाज्यस्य होतर्यज । होता यक्षत्पेशस्वतीः ५
तिस्रो देवीर्हिरण्ययीः । भारतीर्बृहतीर्महीः । पतिमिन्द्रं वयोधसम् । विराजं छन्द इहेन्द्रियम् । धेनुं गां न वयो दधत् । वेत्वाज्यस्य होतर्यज । होता यक्षत्सुरेतसम् । त्वष्टारं पुष्टिवर्धनम् । रूपाणि बिभ्रतं पृथक् । पुष्टिमिन्द्रं वयोधसम् ६
द्विपदं छन्द इहेन्द्रि यम् । उक्षाणं गां न वयो दधत् । वेत्वाज्यस्य होतर्यज । होता यक्षच्छतक्रतुम् । हिरण्यपर्णमुक्थिनम् । रशनां बिभ्रतं वशिम् । भगमिन्द्रं वयोधसम् । ककुभं छन्द इहेन्द्रि यम् । वशां वेहतं गां न वयो दधत् । वेत्वाज्यस्य होतर्यज । होता यक्षत्स्वाहाकृतीः । अग्निं गृहपतिं पृथक् । वरुणं भेषजं कविम् । क्षत्त्रमिन्द्रं वयोधसम् । अतिच्छन्दसं छन्द इन्द्रियम् । बृहदृषभं गां वयो दधत् । वेत्वाज्यस्य होतर्यज ७
hotā yakṣadiḍaspade | samidhānaṃ mahadyaśaḥ | suṣamiddhaṃ vareṇyam | agnimindraṃ vayodhasam | gāyatrīṃ chanda indriyam | tryaviṃ gāṃ vayo dadhat | vetvājyasya hotaryaja | hotā yakṣacchucivratam | tanūnapātamudbhidam | yaṃ garbhamaditirdadhe 1
śucimindraṃ vayodhasam | uṣṇihaṃ chanda indri yam | dityavāhaṃ gāṃ vayo dadhat | vetvājyasya hotaryaja | hotā yakṣadīḍenyam | īḍitaṃ vṛtrahantamam | iḍābhirīḍyam̐ sahaḥ | somamindraṃ vayodhasam | anuṣṭubhaṃ chanda indriyam | trivatsaṃ gāṃ vayo dadhat 2
vetvājyasya hotaryaja | hotā yakṣatsubarhiṣadam | pūṣaṇvantamamartyam | sīdantaṃ barhiṣi priye | amṛtendraṃ vayodhasam | bṛhatīṃ chanda indriyam | pañcāviṃ gāṃ vayo dadhat | vetvājyasya hotaryaja | hotā yakṣadvyacasvatīḥ | suprāyaṇā ṛtāvṛdhaḥ 3
dvāro devīrhiraṇyayīḥ | brahmāṇa indraṃ vayodhasam | paṅktiṃ chanda ihendriyam | turyavāhaṃ gāṃ vayo dadhat | vetvājyasya hotaryaja | hotā yakṣatsupeśase | suśilpe bṛhatī ubhe | naktoṣāsā na darśate | viśvamindraṃ vayodhasam | triṣṭubhaṃ chanda indriyam 4
ṣaṣṭhavāhaṃ gāṃ vayo dadhat | vetvājyasya hotaryaja | hotā yakṣatpracetasā | devānāmuttamaṃ yaśaḥ | hotārā daivyā kavī |sayujendraṃ vayodhasam | jagatīṃ chanda ihendriyam | anaḍvāhaṃ gāṃ vayo dadhat | vetvājyasya hotaryaja | hotā yakṣatpeśasvatīḥ 5
tisro devīrhiraṇyayīḥ | bhāratīrbṛhatīrmahīḥ | patimindraṃ vayodhasam | virājaṃ chanda ihendriyam | dhenuṃ gāṃ na vayo dadhat | vetvājyasya hotaryaja | hotā yakṣatsuretasam | tvaṣṭāraṃ puṣṭivardhanam | rūpāṇi bibhrataṃ pṛthak | puṣṭimindraṃ vayodhasam 6
dvipadaṃ chanda ihendri yam | ukṣāṇaṃ gāṃ na vayo dadhat | vetvājyasya hotaryaja | hotā yakṣacchatakratum | hiraṇyaparṇamukthinam | raśanāṃ bibhrataṃ vaśim | bhagamindraṃ vayodhasam | kakubhaṃ chanda ihendri yam | vaśāṃ vehataṃ gāṃ na vayo dadhat | vetvājyasya hotaryaja | hotā yakṣatsvāhākṛtīḥ | agniṃ gṛhapatiṃ pṛthak | varuṇaṃ bheṣajaṃ kavim | kṣattramindraṃ vayodhasam | aticchandasaṃ chanda indriyam | bṛhadṛṣabhaṃ gāṃ vayo dadhat | vetvājyasya hotaryaja 7
Sanskrit only: no published translation is held for this verse.
समिद्धो अग्निः समिधा । सुषमिद्धो वरेण्यः । गायत्री छन्द इन्द्रियम् । त्र्यविर्गौर्वयो दधुः । तनूनपाच्छुचिव्रतः । तनूनपाच्च सरस्वती ।उष्णिक्छन्द इन्द्रियं दित्यवाड्गौर्वयो दधुः । इडाभिरग्निरीड्यः । सोमो देवो अमर्त्यः १
अनुष्टुप्छन्द इन्द्रियम् । त्रिवत्सो गौर्वयो दधुः । सुबर्हिरग्निः पूषण्वान् । स्तीर्णबर्हिरमर्त्यः । बृहती छन्द इन्द्रियम् । पञ्चाविर्गौर्वयो दधुः । दुरो देवीर्दिशो महीः । ब्रह्मा देवो बृहस्पतिः । पङ्क्तिश्छन्द इहेन्द्रियम् । तुर्यवाड्गौर्वयो दधुः २
उषे यह्वी सुपेशसा । विश्वे देवा अमर्त्याः । त्रिष्टुप्छन्द इन्द्रियम् । पष्ठवाड्गौर्वयो दधुः । दैव्या होतारा भिषजा । इन्द्रेण सयुजा युजा । जगती छन्द इहेन्द्रियम् । अनड्वान्गौर्वयो दधुः । तिस्र इडा सरस्वती ।भारती मरुतो विशः ३
विराट्छन्द इहेन्द्रियम् । धेनुर्गौर्न वयो दधुः । त्वष्टा तुरीपो अद्भुतः । इन्द्राग्नी पुष्टिवर्धना । द्विपाच्छन्द इहेन्द्रियम् । उक्षा गौर्न वयो दधुः । शमिता नो वनस्पतिः । सविता प्रसुवन्भगम् । ककुच्छन्द इहेन्द्रियम् । वशा वेहद्गौर्न वयो दधुः । स्वाहा यज्ञं वरुणः । सुक्षत्रो भेषजं करत् । अतिच्छन्दाश्छन्द इन्द्रियम् । बृहदृषभो गौर्वयो दधुः ४
samiddho agniḥ samidhā | suṣamiddho vareṇyaḥ | gāyatrī chanda indriyam | tryavirgaurvayo dadhuḥ | tanūnapācchucivrataḥ | tanūnapācca sarasvatī |uṣṇikchanda indriyaṃ dityavāḍgaurvayo dadhuḥ | iḍābhiragnirīḍyaḥ | somo devo amartyaḥ 1
anuṣṭupchanda indriyam | trivatso gaurvayo dadhuḥ | subarhiragniḥ pūṣaṇvān | stīrṇabarhiramartyaḥ | bṛhatī chanda indriyam | pañcāvirgaurvayo dadhuḥ | duro devīrdiśo mahīḥ | brahmā devo bṛhaspatiḥ | paṅktiśchanda ihendriyam | turyavāḍgaurvayo dadhuḥ 2
uṣe yahvī supeśasā | viśve devā amartyāḥ | triṣṭupchanda indriyam | paṣṭhavāḍgaurvayo dadhuḥ | daivyā hotārā bhiṣajā | indreṇa sayujā yujā | jagatī chanda ihendriyam | anaḍvāngaurvayo dadhuḥ | tisra iḍā sarasvatī |bhāratī maruto viśaḥ 3
virāṭchanda ihendriyam | dhenurgaurna vayo dadhuḥ | tvaṣṭā turīpo adbhutaḥ | indrāgnī puṣṭivardhanā | dvipācchanda ihendriyam | ukṣā gaurna vayo dadhuḥ | śamitā no vanaspatiḥ | savitā prasuvanbhagam | kakucchanda ihendriyam | vaśā vehadgaurna vayo dadhuḥ | svāhā yajñaṃ varuṇaḥ | sukṣatro bheṣajaṃ karat | aticchandāśchanda indriyam | bṛhadṛṣabho gaurvayo dadhuḥ 4
Sanskrit only: no published translation is held for this verse.
वसन्तेनर्तुना देवाः । वसवस्त्रिवृता स्तुतम् । रथन्तरेण तेजसा । हविरिन्द्रे वयो दधुः । ग्रीष्मेण देवा ऋतुना । रुद्राः पञ्चदशे स्तुतम् । बृहता यशसा बलम् । हविरिन्द्रे वयो दधुः । वर्षाभिर्ऋतुनादित्याः । स्तोमे सप्तदशे स्तुतम् १
वैरूपेण विशौजसा । हविरिन्द्रे वयो दधुः । शारदेनर्तुना देवाः । एकविꣳ श ऋभवः स्तुतम् । वैराजेन श्रिया श्रियम् । हविरिन्द्रे वयो दधुः । हेमन्तेनर्तुना देवाः । मरुतस्त्रिणवे स्तुतम् । बलेन शक्वरीः सहः । हविरिन्द्रे वयो दधुः । शैशिरेणर्तुना देवाः । त्रयस्त्रिँशेऽमृतꣳ स्तुतम् । सत्येन रेवतीः क्षत्त्रम् । हविरिन्द्रे वयो दधुः २
vasantenartunā devāḥ | vasavastrivṛtā stutam | rathantareṇa tejasā | havirindre vayo dadhuḥ | grīṣmeṇa devā ṛtunā | rudrāḥ pañcadaśe stutam | bṛhatā yaśasā balam | havirindre vayo dadhuḥ | varṣābhirṛtunādityāḥ | stome saptadaśe stutam 1
vairūpeṇa viśaujasā | havirindre vayo dadhuḥ | śāradenartunā devāḥ | ekavim̐ śa ṛbhavaḥ stutam | vairājena śriyā śriyam | havirindre vayo dadhuḥ | hemantenartunā devāḥ | marutastriṇave stutam | balena śakvarīḥ sahaḥ | havirindre vayo dadhuḥ | śaiśireṇartunā devāḥ | trayastri~śe'mṛtam̐ stutam | satyena revatīḥ kṣattram | havirindre vayo dadhuḥ 2
Sanskrit only: no published translation is held for this verse.
देवं बर्हिरिन्द्रं वयोधसम् । देवं देवमवर्धयत् । गायत्रिया छन्दसेन्द्रियम् । तेज इन्द्रे वयो दधत् । वसुवने वसुधेयस्य वेतु यज । देवीर्द्वारो देवमिन्द्रं वयोधसम् । देवीर्देवमवर्धयन् । उष्णिहा छन्दसेन्द्रियम् । प्राणमिन्द्रे वयो दधत् । वसुवने वसुधेयस्य वियन्तु यज १
देवी देवं वयोधसम् । उषे इन्द्रमवर्धताम् । अनुष्टुभा छन्दसेन्द्रियम् । वाचमिन्द्रे वयो दधत् । वसुवने वसुधेयस्य वीतां यज । देवी जोष्ट्री देवमिन्द्रं वयोधसम् । देवी देवमवर्धताम् । बृहत्या छन्दसेन्द्रियम् । श्रोत्रमिन्द्रे वयो दधत् । वसुवने वसुधेयस्य वीतां यज २
देवी ऊर्जाहुती देवमिन्द्रं वयोधसम् । देवी देवमवर्धताम् । पङ्क्त्या छन्दसेन्द्रियम् । शुक्रमिन्द्रे वयो दधत् । वसुवने वसुधेयस्य वीतां यज । देवा दैव्या होतारा देवमिन्द्रं वयोधसम् । देवा देवमवर्धताम् । त्रिष्टुभा छन्दसेन्द्रियम् । त्विषिमिन्द्रे वयो दधत् । वसुवने वसुधेयस्य वीतां यज ३
देवीस्तिस्रस्तिस्रो देवीर्वयोधसम् । पतिमिन्द्रमवर्धयन् । जगत्या छन्दसेन्द्रियम् । बलमिन्द्रे वयो दधत् । वसुवने वसुधेयस्य वियन्तु यज । देवो नराशँसो देवमिन्द्रं वयोधसम् । देवो देवमवर्धयत् । विराजा छन्दसेन्द्रियम् । रेत इन्द्रे वयो दधत् । वसुवने वसुधेयस्य वेतु यज ४
देवो वनस्पतिर्देवमिन्द्रं वयोधसम् । देवो देवमवर्धयत् । द्विपदा छन्दसेन्द्रियम् । भगमिन्द्रे वयो दधत् । वसुवने वसुधेयस्य वेतु यज । देवं बर्हिर्वारितीनां देवमिन्द्रं वयोधसम् । देवो देवमवर्धयत् । ककुभा छन्दसेन्द्रियम् । यश इन्द्रे वयो दधत् । वसुवने वसुधेयस्य वेतु यज । देवो अग्निः स्विष्टकृद्देवमिन्द्रं वयोधसम् । देवो देवमवर्धयत् । अतिच्छन्दसा छन्दसेन्द्रियम् । क्षत्त्रमिन्द्रे वयो दधत् । वसुवने वसुधेयस्य वेतु यज ५
devaṃ barhirindraṃ vayodhasam | devaṃ devamavardhayat | gāyatriyā chandasendriyam | teja indre vayo dadhat | vasuvane vasudheyasya vetu yaja | devīrdvāro devamindraṃ vayodhasam | devīrdevamavardhayan | uṣṇihā chandasendriyam | prāṇamindre vayo dadhat | vasuvane vasudheyasya viyantu yaja 1
devī devaṃ vayodhasam | uṣe indramavardhatām | anuṣṭubhā chandasendriyam | vācamindre vayo dadhat | vasuvane vasudheyasya vītāṃ yaja | devī joṣṭrī devamindraṃ vayodhasam | devī devamavardhatām | bṛhatyā chandasendriyam | śrotramindre vayo dadhat | vasuvane vasudheyasya vītāṃ yaja 2
devī ūrjāhutī devamindraṃ vayodhasam | devī devamavardhatām | paṅktyā chandasendriyam | śukramindre vayo dadhat | vasuvane vasudheyasya vītāṃ yaja | devā daivyā hotārā devamindraṃ vayodhasam | devā devamavardhatām | triṣṭubhā chandasendriyam | tviṣimindre vayo dadhat | vasuvane vasudheyasya vītāṃ yaja 3
devīstisrastisro devīrvayodhasam | patimindramavardhayan | jagatyā chandasendriyam | balamindre vayo dadhat | vasuvane vasudheyasya viyantu yaja | devo narāśa~so devamindraṃ vayodhasam | devo devamavardhayat | virājā chandasendriyam | reta indre vayo dadhat | vasuvane vasudheyasya vetu yaja 4
devo vanaspatirdevamindraṃ vayodhasam | devo devamavardhayat | dvipadā chandasendriyam | bhagamindre vayo dadhat | vasuvane vasudheyasya vetu yaja | devaṃ barhirvāritīnāṃ devamindraṃ vayodhasam | devo devamavardhayat | kakubhā chandasendriyam | yaśa indre vayo dadhat | vasuvane vasudheyasya vetu yaja | devo agniḥ sviṣṭakṛddevamindraṃ vayodhasam | devo devamavardhayat | aticchandasā chandasendriyam | kṣattramindre vayo dadhat | vasuvane vasudheyasya vetu yaja 5
Sanskrit only: no published translation is held for this verse.