यदाग्नेयो भवति । अग्निमुखा ह्यृद्धिः । अथ यत्पौष्णः । पुष्टिर्वै पूषा । पुष्टिर्वैश्यस्य । पुष्टिमेवावरुन्धे । प्रसवाय सावित्रः । अथ यत्त्वाष्ट्रः । त्वष्टा हि रूपाणि विकरोति । निर्वरुणत्वाय वारुणः १ अथो य एव कश्च सन्त्सूयते । स हि वारुणः । अथ यद्वैश्वदेवः । वैश्वदेवो हि वैश्यः । अथ यन्मारुतः । मारुतो हि वैश्यः । सप्तैतानि हवीꣳ षि भवन्ति । सप्तगणा वै मरुतः । पृश्निः पष्ठौही मारुत्यालभ्यते । विड्वै मरुतः । विश एवैतन्मध्यतोऽभिषिच्यते । तस्माद्वा एष विशः प्रियः । विशो हि मध्यतोऽभिषिच्यते । ऋषभचर्मेऽध्यभिषिञ्चति । स हि प्रजनयिता । दध्नाभिषिञ्चति । ऊर्ग्वा अन्नाद्यं दधि । ऊर्जैवैनमन्नाद्येन समर्धयति २
yadāgneyo bhavati | agnimukhā hyṛddhiḥ | atha yatpauṣṇaḥ | puṣṭirvai pūṣā | puṣṭirvaiśyasya | puṣṭimevāvarundhe | prasavāya sāvitraḥ | atha yattvāṣṭraḥ | tvaṣṭā hi rūpāṇi vikaroti | nirvaruṇatvāya vāruṇaḥ 1 atho ya eva kaśca santsūyate | sa hi vāruṇaḥ | atha yadvaiśvadevaḥ | vaiśvadevo hi vaiśyaḥ | atha yanmārutaḥ | māruto hi vaiśyaḥ | saptaitāni havīm̐ ṣi bhavanti | saptagaṇā vai marutaḥ | pṛśniḥ paṣṭhauhī mārutyālabhyate | viḍvai marutaḥ | viśa evaitanmadhyato'bhiṣicyate | tasmādvā eṣa viśaḥ priyaḥ | viśo hi madhyato'bhiṣicyate | ṛṣabhacarme'dhyabhiṣiñcati | sa hi prajanayitā | dadhnābhiṣiñcati | ūrgvā annādyaṃ dadhi | ūrjaivainamannādyena samardhayati 2
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.