यदाग्नेयो भवति । आग्नेयो वै ब्राह्मणः । अथ यत्सौम्यः । सौम्यो हि ब्राह्मणः । प्रसवायैव सावित्रः । अथ यद्बार्हस्पत्यः । एतद्वै ब्राह्मणस्य वाक्पतीयम् । अथ यदग्नीषोमीयः । आग्नेयो वै ब्राह्मणः । तौ यदा संगच्छेते १ अथ वीर्यावत्तरो भवति । अथ यत्सारस्वतः । एतद्धि प्रत्यक्षं ब्राह्मणस्य वाक्पतीयम् । निर्वरुणत्वायैव वारुणः । अथो य एव कश्च सन्त्सूयते । स हि वारुणः । अथ यद्द्यावापृथिव्यः । इन्द्रो वृत्राय वज्रमुदयच्छत् । तं द्यावापृथिवी नान्वमन्येताम् । तमेतेनैव भागधेयेनान्वमन्येताम् २ वज्रस्य वा एषोऽनुमानाय । अनुमतवज्रः सूयाता इति । अष्टावेतानि हवीꣳ षि भवन्ति । अष्टाक्षरा गायत्री ।गायत्री ब्रह्मवर्चसम् । गायत्रियैव ब्रह्मवर्चसमवरुन्धे । हिरण्येन घृतमुत्पुनाति । तेजस एव रुचे । कृष्णाजिनेऽभिषिञ्चति । ब्रह्मणो वा एतदृक्सामयो रूपम् । यत्कृष्णाजिनम् । ब्रह्मन्नेवैनमृक्सामयोरध्यभिषिञ्चति । घृतेनाभिषिञ्चति । तथा वीर्यावत्तरो भवति ३
yadāgneyo bhavati | āgneyo vai brāhmaṇaḥ | atha yatsaumyaḥ | saumyo hi brāhmaṇaḥ | prasavāyaiva sāvitraḥ | atha yadbārhaspatyaḥ | etadvai brāhmaṇasya vākpatīyam | atha yadagnīṣomīyaḥ | āgneyo vai brāhmaṇaḥ | tau yadā saṃgacchete 1 atha vīryāvattaro bhavati | atha yatsārasvataḥ | etaddhi pratyakṣaṃ brāhmaṇasya vākpatīyam | nirvaruṇatvāyaiva vāruṇaḥ | atho ya eva kaśca santsūyate | sa hi vāruṇaḥ | atha yaddyāvāpṛthivyaḥ | indro vṛtrāya vajramudayacchat | taṃ dyāvāpṛthivī nānvamanyetām | tametenaiva bhāgadheyenānvamanyetām 2 vajrasya vā eṣo'numānāya | anumatavajraḥ sūyātā iti | aṣṭāvetāni havīm̐ ṣi bhavanti | aṣṭākṣarā gāyatrī |gāyatrī brahmavarcasam | gāyatriyaiva brahmavarcasamavarundhe | hiraṇyena ghṛtamutpunāti | tejasa eva ruce | kṛṣṇājine'bhiṣiñcati | brahmaṇo vā etadṛksāmayo rūpam | yatkṛṣṇājinam | brahmannevainamṛksāmayoradhyabhiṣiñcati | ghṛtenābhiṣiñcati | tathā vīryāvattaro bhavati 3
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.