ते शुक्रासः शुचयो रश्मिवन्तः । सीदन्नादित्या अधि बर्हिषि प्रिये । कामेन देवाः सरथं दिवो नः । आयान्तु यज्ञमुप नो जुषाणाः । ते सूनवो अदितेः पीवसामिषम् । घृतं पिन्वत्प्रतिहर्यन्नृतेजाः । प्र यज्ञिया यजमानाय येमुरे । आदित्याः कामं पितुमन्तमस्मे । आ नः पुत्रा अदितेर्यान्तु यज्ञम् । आदित्यासः पथिभिर्देवयानैः १ अस्मे कामं दाशुषे सन्नमन्तः । पुरोडाशं घृतवन्तं जुषन्ताम् । स्कभायत निरृतिꣳ सेधतामतिम् । प्र रशिभिर्यतमाना अमृध्राः । आदित्याः काम प्रयतां वषट्कृतिम् । जुषध्वं नो हव्यदातिं यजत्राः । आदित्यान्काममवसे हुवेम । ये भूतानि जनयन्तो विचिख्युः । सीदन्तु पुत्रा अदितेरुपस्थम् । स्तीर्णं बर्हिर्हविरद्याय देवाः २ स्तीर्णं बर्हिः सीदता यज्ञे अस्मिन् । ध्राजाः सेधन्तो अमतिं दुरेवाम् । अस्मभ्यं पुत्रा अदितेः प्रयꣳ सत । आदित्याः काम हविषो जुषाणाः । अग्ने नय सुपथा राये अस्मान् । विश्वानि देव वयुनानि विद्वान् । युयोध्यस्मज्जुहुराणमेनः । भूयिष्ठां ते नमौक्तिं विधेम । प्र वः शुक्राय भानवे भरध्वम् । हव्यं मतिं चाग्नये सुपूतम् ३ यो दैव्यानि मानुषा जनूꣳ षि । अन्तर्विश्वानि विद्मना जिगाति । अच्छा गिरो मतयो देवयन्तीः । अग्निं यन्ति द्र विणं भिक्षमाणाः । सुसंदृशꣳ सुप्रतीकꣳ स्वञ्चम् । हव्यवाहमरतिं मानुषाणाम् । अग्ने त्वमस्मद्युयोध्यमीवाः । अनग्नित्रा अभ्यमन्त कृष्टीः । पुनरस्मभ्यꣳ सुविताय देव । क्षां विश्वेभिरजरेभिर्यजत्र ४ अग्ने त्वं पारया नव्यो अस्मान् । स्वस्तिभिरति दुर्गाणि विश्वा । पूश्च पृथ्वी बहुला न उर्वी ।भवा तोकाय तनयाय शं योः । प्र कारवो मनना वच्यमानाः । देवद्री चीं नयथ देवयन्तः । दक्षिणावाड्वाजिनी प्राच्येति । हविर्भरन्त्यग्नये घृताची ।इन्द्रं नरो । युजे रथम् । ।जगृभ्णा ते दक्षिणामिन्द्र हस्तम् ५ वसूयवो वसुपते वसूनाम् । विद्मा हि त्वा गोपतिꣳ शूर गोनाम् । अस्मभ्यं चित्रं वृषणꣳ रयिं दाः । तवेदं विश्वमभितः पशव्यम् । यत्पश्यसि चक्षसा सूर्यस्य । गवामसि गोपतिरेक इन्द्र । भक्षीमहि ते प्रयतस्य वस्वः । समिन्द्र णो मनसा नेषि गोभिः । सꣳ सूरिभिर्मघवन्त्सꣳ स्वस्त्या । सं ब्रह्मणा देवकृतं यदस्ति ६ सं देवानाꣳ सुमत्या यज्ञियानाम् । आराच्छत्रुमप बाधस्व दूरम् । उग्रो यः शम्बः पुरुहूत तेन । अस्मे धेहि यवमद्गोमदिन्द्र । कृधी धियं जरित्रे वाजरत्नाम् । आ वेधसꣳ । स हि शुचिः । बृहस्पतिः प्रथमं जायमानः । महो ज्योतिषः परमे व्योमन् । सप्तास्यस्तुविजातो रवेण । वि सप्तरश्मिरधमत्तमाꣳ सि ७ बृहस्पतिः समजयद्वसूनि । महो व्रजान्गोमतो देव एषः । अपः सिषासन्त्सुवरप्रतीत्तः । बृहस्पतिर्हन्त्यमित्रमर्कैः । बृहस्पते परि । एवा पित्रे । आ नो दिवः । पावीरवी । इमा जुह्वाना । यस्ते स्तनः । सरस्वत्यभि नो नेषि । इयꣳ शुष्मेभिर्बिसखा इवारुजत् । सानु गिरीणां तविषेभिरूर्मिभिः । पारावदघ्नीमवसे सुवृक्तिभिः । सरस्वतीमाविवासेम धीतिभिः ८
te śukrāsaḥ śucayo raśmivantaḥ | sīdannādityā adhi barhiṣi priye | kāmena devāḥ sarathaṃ divo naḥ | āyāntu yajñamupa no juṣāṇāḥ | te sūnavo aditeḥ pīvasāmiṣam | ghṛtaṃ pinvatpratiharyannṛtejāḥ | pra yajñiyā yajamānāya yemure | ādityāḥ kāmaṃ pitumantamasme | ā naḥ putrā aditeryāntu yajñam | ādityāsaḥ pathibhirdevayānaiḥ 1 asme kāmaṃ dāśuṣe sannamantaḥ | puroḍāśaṃ ghṛtavantaṃ juṣantām | skabhāyata nirṛtim̐ sedhatāmatim | pra raśibhiryatamānā amṛdhrāḥ | ādityāḥ kāma prayatāṃ vaṣaṭkṛtim | juṣadhvaṃ no havyadātiṃ yajatrāḥ | ādityānkāmamavase huvema | ye bhūtāni janayanto vicikhyuḥ | sīdantu putrā aditerupastham | stīrṇaṃ barhirhaviradyāya devāḥ 2 stīrṇaṃ barhiḥ sīdatā yajñe asmin | dhrājāḥ sedhanto amatiṃ durevām | asmabhyaṃ putrā aditeḥ prayam̐ sata | ādityāḥ kāma haviṣo juṣāṇāḥ | agne naya supathā rāye asmān | viśvāni deva vayunāni vidvān | yuyodhyasmajjuhurāṇamenaḥ | bhūyiṣṭhāṃ te namauktiṃ vidhema | pra vaḥ śukrāya bhānave bharadhvam | havyaṃ matiṃ cāgnaye supūtam 3 yo daivyāni mānuṣā janūm̐ ṣi | antarviśvāni vidmanā jigāti | acchā giro matayo devayantīḥ | agniṃ yanti dra viṇaṃ bhikṣamāṇāḥ | susaṃdṛśam̐ supratīkam̐ svañcam | havyavāhamaratiṃ mānuṣāṇām | agne tvamasmadyuyodhyamīvāḥ | anagnitrā abhyamanta kṛṣṭīḥ | punarasmabhyam̐ suvitāya deva | kṣāṃ viśvebhirajarebhiryajatra 4 agne tvaṃ pārayā navyo asmān | svastibhirati durgāṇi viśvā | pūśca pṛthvī bahulā na urvī |bhavā tokāya tanayāya śaṃ yoḥ | pra kāravo mananā vacyamānāḥ | devadrī cīṃ nayatha devayantaḥ | dakṣiṇāvāḍvājinī prācyeti | havirbharantyagnaye ghṛtācī |indraṃ naro | yuje ratham | |jagṛbhṇā te dakṣiṇāmindra hastam 5 vasūyavo vasupate vasūnām | vidmā hi tvā gopatim̐ śūra gonām | asmabhyaṃ citraṃ vṛṣaṇam̐ rayiṃ dāḥ | tavedaṃ viśvamabhitaḥ paśavyam | yatpaśyasi cakṣasā sūryasya | gavāmasi gopatireka indra | bhakṣīmahi te prayatasya vasvaḥ | samindra ṇo manasā neṣi gobhiḥ | sam̐ sūribhirmaghavantsam̐ svastyā | saṃ brahmaṇā devakṛtaṃ yadasti 6 saṃ devānām̐ sumatyā yajñiyānām | ārācchatrumapa bādhasva dūram | ugro yaḥ śambaḥ puruhūta tena | asme dhehi yavamadgomadindra | kṛdhī dhiyaṃ jaritre vājaratnām | ā vedhasam̐ | sa hi śuciḥ | bṛhaspatiḥ prathamaṃ jāyamānaḥ | maho jyotiṣaḥ parame vyoman | saptāsyastuvijāto raveṇa | vi saptaraśmiradhamattamām̐ si 7 bṛhaspatiḥ samajayadvasūni | maho vrajāngomato deva eṣaḥ | apaḥ siṣāsantsuvarapratīttaḥ | bṛhaspatirhantyamitramarkaiḥ | bṛhaspate pari | evā pitre | ā no divaḥ | pāvīravī | imā juhvānā | yaste stanaḥ | sarasvatyabhi no neṣi | iyam̐ śuṣmebhirbisakhā ivārujat | sānu girīṇāṃ taviṣebhirūrmibhiḥ | pārāvadaghnīmavase suvṛktibhiḥ | sarasvatīmāvivāsema dhītibhiḥ 8
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.