सोमो धेनुꣳ सोमो अर्वन्तमाशुम् । सोमो वीरं कर्मण्यं ददातु । सादन्यं विदथ्यꣳ सभेयम् । पितुःश्रवणं यो ददाशदस्मै । अषाढं युत्सु । त्वꣳ सोम क्रतुभिः । ।या ते धामानि हविषा यजन्ति । ।त्वमिमा ओषधीः सोम विश्वाः । त्वमपो अजनयस्त्वं गाः । त्वमाततन्थोर्वन्तरिक्षम् । त्वं ज्योतिषा वि तमो ववर्थ १ या ते धामानि दिवि या पृथिव्याम् । या पर्वतेष्वोषधीष्वप्सु । तेभिर्नो विश्वैः सुमना अहेडन् । राजन्त्सोम प्रति हव्या गृभाय । विष्णोर्नु कं। तदस्य प्रियम् । प्र तद्विणुः । ।परो मात्रया तनुवा वृधान । न ते महित्वमन्व-श्नुवन्ति । उभे ते विद्म रजसी पृथिव्या विष्णो देव त्वम् । परमस्य वित्से २ विचक्रमे । त्रिर्देवः । आ ते महो । यो जात एव । अभि गोत्राणि । आभिः स्पृधो मिथतीररिषण्यन् । अमित्रस्य व्यथया मन्युमिन्द्र आभिर्विश्वा अभियुजो विषूचीः । आर्याय विशोऽवतरीर्दासीः । अयꣳ शृण्वे अध जयन्नुत घ्नन् । अयमुत प्रकृणुते युधा गाः । यदा सत्यं कृणुते मन्युमिन्द्रः ३ विश्वं दृढं भयत एजदस्मात् । अनु स्वधामक्षरन्नापो अस्य । अवर्धत मध्य आ नाव्यानाम् । सध्रीचीनेन मनसा तमिन्द्र ओजिष्ठेन । हन्मनाहन्नभि द्यून् । मरुत्वन्तं वृषभं वावृधानम् । अकवारिं दिव्यꣳ शासमिन्द्र म् । विश्वा-साहमवसे नूतनाय । उग्रꣳ सहोदामिह तꣳ हुवेम । जनिष्ठा उग्रः सहसे तुराय ४ मन्द्र ओजिष्ठो बहुलाभिमानः । अवर्धन्निन्द्रं मरुतश्चिदत्र । माता यद्वीरं दधनद्धनिष्ठा । क्व स्या वो मरुतः स्वधासीत् । यन्मामेकꣳ समधत्ताहिहत्ये । अहꣳ ह्युग्रस्तविषस्तुविष्मान् । विश्वस्य शत्रोरनमं वधस्नैः । वृत्रस्य त्वा श्वसथादीषमाणाः । विश्वे देवा अजहुर्ये सखायः । मरुद्भिरिन्द्र सख्यं ते अस्तु ५ अथेमा विश्वाः पृतना जयासि । वधीं वृत्रं मरुत इन्द्रि येण । स्वेन भामेन तविषो बभूवान् । अहमेता मनवे विश्वश्चन्द्रा ः! । सुगा अपश्चकर वज्रबाहुः । स यो वृषा वृष्णियेभिः समोकाः । महो दिवः पृथिव्याश्च सम्राट् । सतीनसत्त्वा हव्यो भरेषु । मरुत्वान्नो भवत्विन्द्र ऊती । इन्द्रो वृत्रमतरद्वृत्रतूर्ये ६ अनाधृष्यो मघवा शूर इन्द्रः । अन्वेनं विशो अमदन्त पूर्विः । अयꣳ राजा जगतश्चर्षणीनाम् । स एव वीरः स उ वीर्यावान् । स एकराजो जगतः परस्पाः । यदा वृत्रमतरच्छूर इन्द्रः । अथाभवद्दमिताभिक्रतूनाम् । इन्द्रो यज्ञं वर्धयन्विश्ववेदाः । पुरोडाशस्य जुषताꣳ हविर्नः । वृत्रं तीर्त्वा दानवं वज्रबाहुः ७ दिशोऽदृꣳ हद्दृꣳ हिता दृꣳ हणेन । इमं यज्ञं वर्धयन्विश्ववेदाः । पुरोडाशं प्रतिगृभ्णात्विन्द्रः । यदा वृत्रमतर्च्छूर इन्द्रः । अथैकराजो अभवज्जनानाम् । इन्द्रो देवाञ्शम्बरहत्य आवत् । इन्द्रो देवानामभवत्पुरोगाः । इन्द्रो यज्ञे हविषा वावृधानः । वृत्रतूर्णो अभयꣳ शर्म यꣳ सत् । यः सप्त सिन्धूꣳ रदधा-त्पृथिव्याम् । यः सप्त लोकानकृणोद्दिशश । इन्द्रो हविष्मान्त्सगणो मरुद्भिः । वृत्रतूर्णो यज्ञमिहोपयासत् ८
somo dhenum̐ somo arvantamāśum | somo vīraṃ karmaṇyaṃ dadātu | sādanyaṃ vidathyam̐ sabheyam | pituḥśravaṇaṃ yo dadāśadasmai | aṣāḍhaṃ yutsu | tvam̐ soma kratubhiḥ | |yā te dhāmāni haviṣā yajanti | |tvamimā oṣadhīḥ soma viśvāḥ | tvamapo ajanayastvaṃ gāḥ | tvamātatanthorvantarikṣam | tvaṃ jyotiṣā vi tamo vavartha 1 yā te dhāmāni divi yā pṛthivyām | yā parvateṣvoṣadhīṣvapsu | tebhirno viśvaiḥ sumanā aheḍan | rājantsoma prati havyā gṛbhāya | viṣṇornu kaṃ| tadasya priyam | pra tadviṇuḥ | |paro mātrayā tanuvā vṛdhāna | na te mahitvamanva-śnuvanti | ubhe te vidma rajasī pṛthivyā viṣṇo deva tvam | paramasya vitse 2 vicakrame | trirdevaḥ | ā te maho | yo jāta eva | abhi gotrāṇi | ābhiḥ spṛdho mithatīrariṣaṇyan | amitrasya vyathayā manyumindra ābhirviśvā abhiyujo viṣūcīḥ | āryāya viśo'vatarīrdāsīḥ | ayam̐ śṛṇve adha jayannuta ghnan | ayamuta prakṛṇute yudhā gāḥ | yadā satyaṃ kṛṇute manyumindraḥ 3 viśvaṃ dṛḍhaṃ bhayata ejadasmāt | anu svadhāmakṣarannāpo asya | avardhata madhya ā nāvyānām | sadhrīcīnena manasā tamindra ojiṣṭhena | hanmanāhannabhi dyūn | marutvantaṃ vṛṣabhaṃ vāvṛdhānam | akavāriṃ divyam̐ śāsamindra m | viśvā-sāhamavase nūtanāya | ugram̐ sahodāmiha tam̐ huvema | janiṣṭhā ugraḥ sahase turāya 4 mandra ojiṣṭho bahulābhimānaḥ | avardhannindraṃ marutaścidatra | mātā yadvīraṃ dadhanaddhaniṣṭhā | kva syā vo marutaḥ svadhāsīt | yanmāmekam̐ samadhattāhihatye | aham̐ hyugrastaviṣastuviṣmān | viśvasya śatroranamaṃ vadhasnaiḥ | vṛtrasya tvā śvasathādīṣamāṇāḥ | viśve devā ajahurye sakhāyaḥ | marudbhirindra sakhyaṃ te astu 5 athemā viśvāḥ pṛtanā jayāsi | vadhīṃ vṛtraṃ maruta indri yeṇa | svena bhāmena taviṣo babhūvān | ahametā manave viśvaścandrā ḥ! | sugā apaścakara vajrabāhuḥ | sa yo vṛṣā vṛṣṇiyebhiḥ samokāḥ | maho divaḥ pṛthivyāśca samrāṭ | satīnasattvā havyo bhareṣu | marutvānno bhavatvindra ūtī | indro vṛtramataradvṛtratūrye 6 anādhṛṣyo maghavā śūra indraḥ | anvenaṃ viśo amadanta pūrviḥ | ayam̐ rājā jagataścarṣaṇīnām | sa eva vīraḥ sa u vīryāvān | sa ekarājo jagataḥ paraspāḥ | yadā vṛtramataracchūra indraḥ | athābhavaddamitābhikratūnām | indro yajñaṃ vardhayanviśvavedāḥ | puroḍāśasya juṣatām̐ havirnaḥ | vṛtraṃ tīrtvā dānavaṃ vajrabāhuḥ 7 diśo'dṛm̐ haddṛm̐ hitā dṛm̐ haṇena | imaṃ yajñaṃ vardhayanviśvavedāḥ | puroḍāśaṃ pratigṛbhṇātvindraḥ | yadā vṛtramatarcchūra indraḥ | athaikarājo abhavajjanānām | indro devāñśambarahatya āvat | indro devānāmabhavatpurogāḥ | indro yajñe haviṣā vāvṛdhānaḥ | vṛtratūrṇo abhayam̐ śarma yam̐ sat | yaḥ sapta sindhūm̐ radadhā-tpṛthivyām | yaḥ sapta lokānakṛṇoddiśaśa | indro haviṣmāntsagaṇo marudbhiḥ | vṛtratūrṇo yajñamihopayāsat 8
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.