सूर्यो देवीमुषसꣳ रोचमाना मर्यः । न योषामभ्येति पश्चात् । यत्रा नरो देवयन्तो युगानि । वितन्वते प्रति भद्राय भद्रम् । भद्रा अश्वा हरितः सूर्यस्य । चित्रा एदग्वा अनुमाद्यासः । नमस्यन्तो दिव आ पृष्ठमस्थुः । परि द्यावापृथिवी यन्ति सद्यः । तत्सूर्यस्य देवत्वं तन्महित्वम् । मध्या कर्तोर्विततꣳ संजभार १ यदेदयुक्त हरितः सधस्थात् । आद्रा त्री वासस्तनुते सिमस्मै । तन्मित्रस्य वरुणस्याभिचक्षे । सूर्यो रूपं कृणुते द्योरुपस्थे । अनन्तमन्यद्द्रुशदस्य पाजः । कृष्णमन्यद्धरितः संभरन्ति । अद्या देवा उदिता सूर्यस्य । निरꣳ हसः पिपृतान्निरवद्यात् । तन्नो मित्रो वरुणो मामहन्ताम् । अदितिः सिन्धुः पृथिवी उत द्यौः २ दिवो रुक्म उरुचक्षा उदेति । दूर अर्थस्तरणिर्भ्राजमानः । नूनं जनाः सूर्येण प्रसूताः । आयन्नर्थानि कृणवन्नपाꣳ सि । शं नो भव चक्षसा शं नो अह्ना । शं भानुना शꣳ हिमा शं घृणेन । यथा शमस्मै शमसद्दुरोणे । तत्सूर्य द्र विणं धेहि चित्रम् । चित्रं देवानामुदगादनीकम् । चक्षुर्मित्रस्य वरुणस्याग्नेः ३ आप्रा द्यावापृथिवी अन्तरिक्षम् । सूर्य आत्मा जगतस्तस्थुषश्च । त्वष्टा दधत् । तन्नस्तुरीपम् । ।त्वष्टा वीरं। पिशङ्गरूपः । ।दशेमं त्वष्टुर्जनयन्त गर्भम् । अतन्द्रा सो युवतयो बिभर्त्रम् । तिग्मानीकꣳ स्वयशसं जनेषु । विरोचमानं परि षीं नयन्ति । आविष्ट्यो वर्धते चारुरासु । जिह्मानामूर्ध्वः स्वयशा उपस्थे ४ उभे त्वष्टुर्बिभ्यतुर्जायमानात् । प्रतीची सिꣳ हं प्रतिजोषयेते । मित्रो जनान् । प्र स मित्र । ।अयं मित्रो नमस्यः सुशेवः । राजा सुक्षत्रो अजनिष्ट वेधाः । तस्य वयꣳ सुमतौ यज्ञियस्य अपि भद्रे सौमनसे स्याम । अनमीवासं इडया मदन्तः । मितज्मवो वरिमन्ना पृथिव्याः । आदित्यस्य व्रतमुपक्ष्यन्तः ५ वयं मित्रस्य सुमतौ स्याम । मित्रं न ईꣳ शिम्या गोषु गव्यवत् । स्वाधियो विदथे अप्स्वजीजनन् । अरेजयताꣳ रोदसी पाजसा गिरा । प्रति प्रियं यजतं जनुषामवः । महाꣳ आदित्यो नमसोपसद्यः । यातयज्जनो गृणते सुशेवः । तस्मा एतत्पन्यतमाय जुष्टम् । अग्नौ मित्राय हविराजुहोत । आ वाꣳ रथो रोदसी बद्बधानः ६ हिरण्ययो वृषभिर्यात्वश्वैः । घृतवर्तनिः पविभी रुचानः । इषां वोढा नृपतिर्वाजिनीवान् । स पप्रथानो अभि पञ्च भूम । त्रिवन्धुरो मनसायातु युक्तः । विशो येन गच्छथो देवयन्तीः । कुत्राचिद्याममश्विना दधाना । स्वश्वा यशसायातमर्वाक् । दस्रा निधिं मधुमन्तं पिबाथः । वि वाꣳ रथो वध्वा यादमानः ७ अन्तान्दिवो बाधते वर्तनिभ्याम् । युवोः श्रियं परि योषा वृणीत । सूरो दुहिता परितक्मियायाम् । यद्देवयन्तमवथः शचीभिः । परिघ्रꣳ स वां मना वां वयो गाम् । यो ह स्य वाꣳ रथिरा वस्त उस्राः । रथो युजानः परियाति वर्तिः । तेन नः शं योरुषसो व्युष्टौ । न्यश्विना वहतं यज्ञे अस्मिन् । युवं भुज्युमवविद्धꣳ समुद्रे ८ उदूहथुरर्णसो अस्रिधानैः । पतत्रिभिरश्रमैरव्यथिभिः । दꣳ सनाभिरश्विना पारयन्ताम् । अग्नीषोमा यो अद्य वाम् । इदं वचः सपर्यति । तस्मै धत्तꣳ सुवीर्यम् । गवां पोषꣳ स्वश्वियं ।यो अग्नीषोमा हविषा सपर्यात् । देवद्री चा मनसा यो घृतेन । तस्य व्रतꣳ रक्षतं पातमꣳ हसः ९ विशे जनाय महि शर्म यच्छतम् । अग्नीषोमा य आहुतिम् । यो वां दाशाद्धविष्कृतिम् । स प्रजया सुवीर्यम् । विश्वमायुर्व्यश्नवत् । अग्नीषोमा चेति तद्वीर्यं वाम् । यदमुष्णीतमवसं पणिं गोः । अवातिरतं प्रथयस्य शेषः अविन्दतंज्योतिरेकं बहुभ्यः । अग्नीषोमाविमꣳ सु मे । ऽग्नीषोमा हविषः प्रस्थितस्य १०
sūryo devīmuṣasam̐ rocamānā maryaḥ | na yoṣāmabhyeti paścāt | yatrā naro devayanto yugāni | vitanvate prati bhadrāya bhadram | bhadrā aśvā haritaḥ sūryasya | citrā edagvā anumādyāsaḥ | namasyanto diva ā pṛṣṭhamasthuḥ | pari dyāvāpṛthivī yanti sadyaḥ | tatsūryasya devatvaṃ tanmahitvam | madhyā kartorvitatam̐ saṃjabhāra 1 yadedayukta haritaḥ sadhasthāt | ādrā trī vāsastanute simasmai | tanmitrasya varuṇasyābhicakṣe | sūryo rūpaṃ kṛṇute dyorupasthe | anantamanyaddruśadasya pājaḥ | kṛṣṇamanyaddharitaḥ saṃbharanti | adyā devā uditā sūryasya | niram̐ hasaḥ pipṛtānniravadyāt | tanno mitro varuṇo māmahantām | aditiḥ sindhuḥ pṛthivī uta dyauḥ 2 divo rukma urucakṣā udeti | dūra arthastaraṇirbhrājamānaḥ | nūnaṃ janāḥ sūryeṇa prasūtāḥ | āyannarthāni kṛṇavannapām̐ si | śaṃ no bhava cakṣasā śaṃ no ahnā | śaṃ bhānunā śam̐ himā śaṃ ghṛṇena | yathā śamasmai śamasadduroṇe | tatsūrya dra viṇaṃ dhehi citram | citraṃ devānāmudagādanīkam | cakṣurmitrasya varuṇasyāgneḥ 3 āprā dyāvāpṛthivī antarikṣam | sūrya ātmā jagatastasthuṣaśca | tvaṣṭā dadhat | tannasturīpam | |tvaṣṭā vīraṃ| piśaṅgarūpaḥ | |daśemaṃ tvaṣṭurjanayanta garbham | atandrā so yuvatayo bibhartram | tigmānīkam̐ svayaśasaṃ janeṣu | virocamānaṃ pari ṣīṃ nayanti | āviṣṭyo vardhate cārurāsu | jihmānāmūrdhvaḥ svayaśā upasthe 4 ubhe tvaṣṭurbibhyaturjāyamānāt | pratīcī sim̐ haṃ pratijoṣayete | mitro janān | pra sa mitra | |ayaṃ mitro namasyaḥ suśevaḥ | rājā sukṣatro ajaniṣṭa vedhāḥ | tasya vayam̐ sumatau yajñiyasya api bhadre saumanase syāma | anamīvāsaṃ iḍayā madantaḥ | mitajmavo varimannā pṛthivyāḥ | ādityasya vratamupakṣyantaḥ 5 vayaṃ mitrasya sumatau syāma | mitraṃ na īm̐ śimyā goṣu gavyavat | svādhiyo vidathe apsvajījanan | arejayatām̐ rodasī pājasā girā | prati priyaṃ yajataṃ januṣāmavaḥ | mahām̐ ādityo namasopasadyaḥ | yātayajjano gṛṇate suśevaḥ | tasmā etatpanyatamāya juṣṭam | agnau mitrāya havirājuhota | ā vām̐ ratho rodasī badbadhānaḥ 6 hiraṇyayo vṛṣabhiryātvaśvaiḥ | ghṛtavartaniḥ pavibhī rucānaḥ | iṣāṃ voḍhā nṛpatirvājinīvān | sa paprathāno abhi pañca bhūma | trivandhuro manasāyātu yuktaḥ | viśo yena gacchatho devayantīḥ | kutrācidyāmamaśvinā dadhānā | svaśvā yaśasāyātamarvāk | dasrā nidhiṃ madhumantaṃ pibāthaḥ | vi vām̐ ratho vadhvā yādamānaḥ 7 antāndivo bādhate vartanibhyām | yuvoḥ śriyaṃ pari yoṣā vṛṇīta | sūro duhitā paritakmiyāyām | yaddevayantamavathaḥ śacībhiḥ | parighram̐ sa vāṃ manā vāṃ vayo gām | yo ha sya vām̐ rathirā vasta usrāḥ | ratho yujānaḥ pariyāti vartiḥ | tena naḥ śaṃ yoruṣaso vyuṣṭau | nyaśvinā vahataṃ yajñe asmin | yuvaṃ bhujyumavaviddham̐ samudre 8 udūhathurarṇaso asridhānaiḥ | patatribhiraśramairavyathibhiḥ | dam̐ sanābhiraśvinā pārayantām | agnīṣomā yo adya vām | idaṃ vacaḥ saparyati | tasmai dhattam̐ suvīryam | gavāṃ poṣam̐ svaśviyaṃ |yo agnīṣomā haviṣā saparyāt | devadrī cā manasā yo ghṛtena | tasya vratam̐ rakṣataṃ pātamam̐ hasaḥ 9 viśe janāya mahi śarma yacchatam | agnīṣomā ya āhutim | yo vāṃ dāśāddhaviṣkṛtim | sa prajayā suvīryam | viśvamāyurvyaśnavat | agnīṣomā ceti tadvīryaṃ vām | yadamuṣṇītamavasaṃ paṇiṃ goḥ | avātirataṃ prathayasya śeṣaḥ avindataṃjyotirekaṃ bahubhyaḥ | agnīṣomāvimam̐ su me | 'gnīṣomā haviṣaḥ prasthitasya 10
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.