अग्निर्वा अकामयत । अन्नादो देवानाꣳ स्यामिति । स एतमग्नये कृत्तिकाभ्यः पुरोडाशमष्टाकपालं निरवपत् । ततो वै सोऽन्नादो देवानामभवत् । अग्निर्वै देवानामन्नादः । यथा ह वा अग्निर्देवनामन्नादः । एवꣳ ह वा एष मनुष्याणां भवति । य एतेन हविषा यजते । य उ चैनदेवं वेद । सोऽत्र जुहोति । अग्नये स्वाहा कृत्तिकाभ्यः स्वाहा । अम्बायै स्वाहा दुलायै स्वाहा । नितत्न्यै स्वाहाभ्रयन्त्यै स्वाहा । मेघयन्त्यै स्वाहा वर्षयन्त्यै स्वाहा । चुपुणीकायै स्वाहेति १ प्रजापतिः प्रजा असृजत । ता अस्मात्सृष्टाः पराचीरायन्न् । तासाꣳ रोहिणीमभ्यध्यायत् । सोऽकामयत । उप मावर्तेत ।समेनया गच्छेयेति । स एतं प्रजापतये रोहिण्यै चरुं निरवपत् । ततो वै सा तमुपावर्तत । समेनयागच्छत । उप ह वा एनं प्रियमावर्तते । सं प्रियेण गच्छते । य एतेन हविषा यजते । य उ चैनदेवं वेद । सोऽत्र जुहोति । प्रजापतये स्वाहा रोहिण्यै स्वाहा रोचमानायै स्वाहा प्रजाभ्यः स्वाहेति २ सोमो वा अकामयत । ओषधीनाꣳ राज्यमभिजयेयमिति । स एतꣳ सोमाय मृगशीर्षाय श्यामाकं चरुं पयसि निरवपत् । ततो वै स ओषधीनाꣳ राज्यमभ्यजयत् । समानानाꣳ ह वै राज्यमभिजयति । य एतेन हविषा यजते । य उ चैनदेवं वेद । सोऽत्र जुहोति । सोमाय स्वाहा मृगशीर्षाय स्वाहा । इन्वकाभ्यः स्वाहौषधीभ्यः स्वाहा । राज्याय स्वाहाभिजित्यै स्वाहेति ३ रुद्रो वा अकामयत । पशुमान्त्स्यामिति । स एतꣳ रुद्रायार्द्रायै प्रैयंगवं चरुं पयसि निरवपत् । ततो वै स पशुमानभवत् । पशुमान्ह वै भवति । य एतेन हविषा यजते । य उ चैनदेवं वेद । सोऽत्र जुहोति । रुद्रा य स्वाहाद्रा र्यै! स्वाहा । पिन्वमानायै स्वाहा पशुभ्यः स्वाहेति ४ ऋक्षा वा इयमलोमकासीत् । साकामयत । ओषधीभिर्वनस्पतिभिः प्रजायेयेति । सैतमदित्यै पुनर्वसुभ्यां चरुं निरवपत् । ततो वा इयमोषधीभिर्वनस्पतिभिः प्राजायत । प्रजायते ह वै प्रजया पशुभिः । य एतेन हविषा यजते । य उ चैनदेवं वेद । सोऽत्र जुहोति अदित्यै स्वाहा पुनर्वसुभ्याम्स्वाहाभूत्यै स्वाहा प्रजात्यै स्वाहेति ५ बृहस्पतिर्वा अकामयत । ब्रह्मवर्चसी स्यामिति । स एतं बृहस्पतये तिष्याय नैवारं चरुं पयसि निरवपत् । ततो वै स ब्रह्मवर्चस्यभवत् । ब्रह्मवर्चसी ह वै भवति । य एतेन हविषा यजते । य उ चैनदेवं वेद । सोऽत्र जुहोति । बृहस्पतये स्वाहा तिष्याय स्वहा । ब्रह्मवर्चसाय स्वाहेति ६ देवासुराः संयत्ता आसन्न् । ते देवाः सर्पेभ्य आश्रेषाभ्य आज्ये करम्भं निरवपन्न् । तानेताभिरेव देवताभिरुपानयन् । एताभिर्ह वै देवताभिर्द्विषन्तं भ्रा-तृव्यमुपनयति । य एतेन हविषा यजते । य उ चैनदेवं वेद । सोऽत्र जुहोति । सर्पेभ्यः स्वाहा श्रेषाभ्यः स्वाहा । दन्दशूकेभ्यः स्वाहेति ७ पितरो वा अकामयन्त । पितृलोक ऋध्नुयामेति । त एतं पितृभ्यो मघाभ्यः पुरोडाशꣳ षट्कपालं निरवपन्न् । ततो वै ते पितृलोक आर्ध्नुवन् । पितृलोके ह वा ऋध्नोति । य एतेन हविषा यजते । य उ चैनदेवं वेद । सोऽत्र जुहोति । पितृभ्यः स्वाहा मघाभ्यः स्वाहानघाभ्यः स्वाहागदाभ्यः स्वाहा-रुन्धतीभ्यः स्वाहेति ८ अर्यमा वा अकामयत । पशुमान्त्स्यामिति । स एतमर्यम्णे फल्गुनीभ्यां चरुं निरवपत् । ततो वै स पशुमानभवत् । पशुमान्ह वै भवति । य एतेन हविषा यजते । य उ चैनदेवं वेद । सोऽत्र जुहोति । अर्यम्णे स्वाहा फल्गुनीभ्याꣳ स्वाहा । पशुभ्यः स्वाहेति ९ भगो वा अकामयत । भगी श्रेष्ठी देवानाꣳ स्यामिति । स एतं भगाय फल्गुनीभ्यां चरुं निरवपत् । ततो वै स भगी श्रेष्ठी देवानामभवत् । भगी ह वै श्रेष्ठी समानानां भवति । य एतेन हविषा यजते । य उ चैनदेवं वेद । सोऽत्र जुहोति । भगाय स्वाहा फल्गुनीभ्याꣳ स्वाहा । श्रैष्ठ्याय स्वाहेति १० सविता वा अकामयत श्रन्मे देवा दधीरन्न् । सविता स्यामिति । स एतꣳ सवित्रे हस्ताय पुरोडाशं द्वादशकपालं निरवपदाशूनां व्रीहीणाम् । ततो वै तस्मै श्रद्देवा अदधत । सविताभवत् । श्रद्ध वा अस्मै मनुष्या दधते । सविता समानानां भवति । य एतेन हविषा यजते । य उ चैनदेवं वेद । सोऽत्र जुहोति । सवित्रे स्वाहा हस्ताय स्वाहा ददते स्वाहा पृणते स्वाहा प्रयच्छते स्वाहा प्रतिगृभ्णते स्वाहेति ११ त्वष्टा वा अकामयत । चित्रं प्रजां विन्देयेति । स एतं त्वष्ट्रे चित्रायै पुरोडाशमष्टाकपालं निरवपत् । ततो वै स चित्रं प्रजामविन्दत । चित्रꣳ ह वै प्रजां विन्दते । य एतेन हविषा यजते । य उ चैनदेवं वेद । सोऽत्र जुहोति । त्वष्ट्रे स्वाहा चित्रायै स्वाहा । चैत्राय स्वाहा प्रजायै स्वाहेति १२ वायुर्वा अकामयत । कामचारमेषु लोकेष्वभिजयेयमिति । स एतद्वायवे निष्ट्यायै गृष्ट्यै दुग्धं पयो निरवपत् । ततो वै स कामचारमेषु लोकेष्व-भ्यजयत् । कामचारꣳ ह वा एषु लोकेष्वभिजयति । य एतेन हविषा यजते । य उ चैनदेवं वेद । सोऽत्र जुहोति । वायवे स्वाहा निष्ट्यायै स्वाहा । कामचाराय स्वाहाभिजित्यै स्वाहेति १३ इन्द्रा ग्नी वा अकामयेताम् । श्रैष्ठ्यं देवानामभिजयेवेति । तावेतमिन्द्रा ग्निभ्यां विशाखाभ्यां पुरोडाशमेकादशकपालं निरवपताम्ततो वै तौ श्रैष्ठ्यं देवानामभ्यजयताम् । श्रैष्ठ्यꣳ ह वै समानानामभिजयति । य एतेन हविषा यजते । य उ चैनदेवं वेद । सोऽत्र जुहोति । इन्द्रा ग्निभ्याꣳ स्वाहा विशाखाभ्याꣳ स्वाहा । श्रैष्ठ्याय स्वाहाभिजित्यै स्वाहेति १४ अथैतत्पौर्णमास्या आज्यं निर्वपति । कामो वै पौर्नमासी ।काम आज्यम् । कामेनैव कामꣳ समर्धयति । क्षिप्रमेनꣳ स काम उपनमति । येन कामेन यजते । सोऽत्र जुहोति । पौर्णमास्यै स्वाहा कामाय स्वाहागत्यै स्वाहेति १५
agnirvā akāmayata | annādo devānām̐ syāmiti | sa etamagnaye kṛttikābhyaḥ puroḍāśamaṣṭākapālaṃ niravapat | tato vai so'nnādo devānāmabhavat | agnirvai devānāmannādaḥ | yathā ha vā agnirdevanāmannādaḥ | evam̐ ha vā eṣa manuṣyāṇāṃ bhavati | ya etena haviṣā yajate | ya u cainadevaṃ veda | so'tra juhoti | agnaye svāhā kṛttikābhyaḥ svāhā | ambāyai svāhā dulāyai svāhā | nitatnyai svāhābhrayantyai svāhā | meghayantyai svāhā varṣayantyai svāhā | cupuṇīkāyai svāheti 1 prajāpatiḥ prajā asṛjata | tā asmātsṛṣṭāḥ parācīrāyann | tāsām̐ rohiṇīmabhyadhyāyat | so'kāmayata | upa māvarteta |samenayā gaccheyeti | sa etaṃ prajāpataye rohiṇyai caruṃ niravapat | tato vai sā tamupāvartata | samenayāgacchata | upa ha vā enaṃ priyamāvartate | saṃ priyeṇa gacchate | ya etena haviṣā yajate | ya u cainadevaṃ veda | so'tra juhoti | prajāpataye svāhā rohiṇyai svāhā rocamānāyai svāhā prajābhyaḥ svāheti 2 somo vā akāmayata | oṣadhīnām̐ rājyamabhijayeyamiti | sa etam̐ somāya mṛgaśīrṣāya śyāmākaṃ caruṃ payasi niravapat | tato vai sa oṣadhīnām̐ rājyamabhyajayat | samānānām̐ ha vai rājyamabhijayati | ya etena haviṣā yajate | ya u cainadevaṃ veda | so'tra juhoti | somāya svāhā mṛgaśīrṣāya svāhā | invakābhyaḥ svāhauṣadhībhyaḥ svāhā | rājyāya svāhābhijityai svāheti 3 rudro vā akāmayata | paśumāntsyāmiti | sa etam̐ rudrāyārdrāyai praiyaṃgavaṃ caruṃ payasi niravapat | tato vai sa paśumānabhavat | paśumānha vai bhavati | ya etena haviṣā yajate | ya u cainadevaṃ veda | so'tra juhoti | rudrā ya svāhādrā ryai! svāhā | pinvamānāyai svāhā paśubhyaḥ svāheti 4 ṛkṣā vā iyamalomakāsīt | sākāmayata | oṣadhībhirvanaspatibhiḥ prajāyeyeti | saitamadityai punarvasubhyāṃ caruṃ niravapat | tato vā iyamoṣadhībhirvanaspatibhiḥ prājāyata | prajāyate ha vai prajayā paśubhiḥ | ya etena haviṣā yajate | ya u cainadevaṃ veda | so'tra juhoti adityai svāhā punarvasubhyāmsvāhābhūtyai svāhā prajātyai svāheti 5 bṛhaspatirvā akāmayata | brahmavarcasī syāmiti | sa etaṃ bṛhaspataye tiṣyāya naivāraṃ caruṃ payasi niravapat | tato vai sa brahmavarcasyabhavat | brahmavarcasī ha vai bhavati | ya etena haviṣā yajate | ya u cainadevaṃ veda | so'tra juhoti | bṛhaspataye svāhā tiṣyāya svahā | brahmavarcasāya svāheti 6 devāsurāḥ saṃyattā āsann | te devāḥ sarpebhya āśreṣābhya ājye karambhaṃ niravapann | tānetābhireva devatābhirupānayan | etābhirha vai devatābhirdviṣantaṃ bhrā-tṛvyamupanayati | ya etena haviṣā yajate | ya u cainadevaṃ veda | so'tra juhoti | sarpebhyaḥ svāhā śreṣābhyaḥ svāhā | dandaśūkebhyaḥ svāheti 7 pitaro vā akāmayanta | pitṛloka ṛdhnuyāmeti | ta etaṃ pitṛbhyo maghābhyaḥ puroḍāśam̐ ṣaṭkapālaṃ niravapann | tato vai te pitṛloka ārdhnuvan | pitṛloke ha vā ṛdhnoti | ya etena haviṣā yajate | ya u cainadevaṃ veda | so'tra juhoti | pitṛbhyaḥ svāhā maghābhyaḥ svāhānaghābhyaḥ svāhāgadābhyaḥ svāhā-rundhatībhyaḥ svāheti 8 aryamā vā akāmayata | paśumāntsyāmiti | sa etamaryamṇe phalgunībhyāṃ caruṃ niravapat | tato vai sa paśumānabhavat | paśumānha vai bhavati | ya etena haviṣā yajate | ya u cainadevaṃ veda | so'tra juhoti | aryamṇe svāhā phalgunībhyām̐ svāhā | paśubhyaḥ svāheti 9 bhago vā akāmayata | bhagī śreṣṭhī devānām̐ syāmiti | sa etaṃ bhagāya phalgunībhyāṃ caruṃ niravapat | tato vai sa bhagī śreṣṭhī devānāmabhavat | bhagī ha vai śreṣṭhī samānānāṃ bhavati | ya etena haviṣā yajate | ya u cainadevaṃ veda | so'tra juhoti | bhagāya svāhā phalgunībhyām̐ svāhā | śraiṣṭhyāya svāheti 10 savitā vā akāmayata śranme devā dadhīrann | savitā syāmiti | sa etam̐ savitre hastāya puroḍāśaṃ dvādaśakapālaṃ niravapadāśūnāṃ vrīhīṇām | tato vai tasmai śraddevā adadhata | savitābhavat | śraddha vā asmai manuṣyā dadhate | savitā samānānāṃ bhavati | ya etena haviṣā yajate | ya u cainadevaṃ veda | so'tra juhoti | savitre svāhā hastāya svāhā dadate svāhā pṛṇate svāhā prayacchate svāhā pratigṛbhṇate svāheti 11 tvaṣṭā vā akāmayata | citraṃ prajāṃ vindeyeti | sa etaṃ tvaṣṭre citrāyai puroḍāśamaṣṭākapālaṃ niravapat | tato vai sa citraṃ prajāmavindata | citram̐ ha vai prajāṃ vindate | ya etena haviṣā yajate | ya u cainadevaṃ veda | so'tra juhoti | tvaṣṭre svāhā citrāyai svāhā | caitrāya svāhā prajāyai svāheti 12 vāyurvā akāmayata | kāmacārameṣu lokeṣvabhijayeyamiti | sa etadvāyave niṣṭyāyai gṛṣṭyai dugdhaṃ payo niravapat | tato vai sa kāmacārameṣu lokeṣva-bhyajayat | kāmacāram̐ ha vā eṣu lokeṣvabhijayati | ya etena haviṣā yajate | ya u cainadevaṃ veda | so'tra juhoti | vāyave svāhā niṣṭyāyai svāhā | kāmacārāya svāhābhijityai svāheti 13 indrā gnī vā akāmayetām | śraiṣṭhyaṃ devānāmabhijayeveti | tāvetamindrā gnibhyāṃ viśākhābhyāṃ puroḍāśamekādaśakapālaṃ niravapatāmtato vai tau śraiṣṭhyaṃ devānāmabhyajayatām | śraiṣṭhyam̐ ha vai samānānāmabhijayati | ya etena haviṣā yajate | ya u cainadevaṃ veda | so'tra juhoti | indrā gnibhyām̐ svāhā viśākhābhyām̐ svāhā | śraiṣṭhyāya svāhābhijityai svāheti 14 athaitatpaurṇamāsyā ājyaṃ nirvapati | kāmo vai paurnamāsī |kāma ājyam | kāmenaiva kāmam̐ samardhayati | kṣipramenam̐ sa kāma upanamati | yena kāmena yajate | so'tra juhoti | paurṇamāsyai svāhā kāmāya svāhāgatyai svāheti 15
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.