तृतीयस्यामितो दिवि सोम आसीत् । तं गायत्र्याहरत् । तस्य पर्णमच्छिद्यत । तत्पर्णोऽभवत् । तत्पर्णस्य पर्णत्वम् । ब्रह्म वै पर्णः । यत्पर्णशाखया वत्सानपाकरोति । ब्रह्मणैवैनानपाकरोति । गायत्रो वै पर्णः । गायत्राः पशवः १ तस्मात्त्रीणित्रीणि पर्णस्य पलाशानि । त्रिपदा गायत्री ।यत्पर्णशखया गाः प्रार्पयति । स्वयैवैना देवतया प्रार्पयति । यं कामयेतापशुः स्यादिति । अपर्णां तस्मै शुष्काग्रामाहरेत् । अपशुरेव भवति । यं कामयेत पशुमान्त्स्यादिति । बहुपर्णां तस्मै बहुशाखामाहरेत् । पशुमन्तमेवैनं करोति २ यत्प्राचीमाहरेत् । देवलोकमभिजयेत् । यदुदीचीं मनुष्यलोकम् । प्राचीमुदीचीमाहरति । उभयोर्लोकयोरभिजित्यै । इषे त्वोर्जे त्वेत्याह । इषमेवोर्जं यजमाने दधाति । वायवः स्थेत्याह । वायुर्वा अन्तरिक्षस्याध्यक्षाः । अन्तरिक्षदेवत्याः खलु वै पशवः ३ वायव एवैनान्परिददाति । प्र वा एनानेतदाकरोति । यदाह । वायवः स्थेत्युपायवः स्थेत्याह । यजमानायैव पशूनुपह्वयते । देवो वः सविता प्रार्पयत्वित्याह प्रसूत्यै । श्रेष्ठतमाय कर्मण इत्याह । यज्ञो हि श्रेष्ठतमं कर्म । तस्मादेवमाह । आप्यायध्वमघ्निया देवभागमित्याह ४ वत्सेभ्यश्च वा एताः पुरा मौष्येभ्यश्चाप्यायन्त । देवेभ्य एवैना इन्द्रायाप्यायति । ऊर्जस्वतीः पयस्वतीरित्याह । ऊर्जꣳ हि पयः संभरन्ति । प्रजावतीरनमीवा अयक्ष्मा इत्याह प्रजात्यै । मा वः स्तेन ईशत माघशꣳस इत्याह गुप्त्यै । रुद्र स्य हेतिः परि वो वृणक्त्वित्याह । रुद्रा देवैनास्त्रायते । ध्रुवा अस्मिन्गोपतौ स्यात बह्वीरित्याह । ध्रुवा एवास्मिन्बह्वीः करोति ५ यजमानस्य पशून्पाहीत्याह । पशूनां गोपीथाय । तस्मात्सायं पशव उप समावर्तन्ते । अनधः सादयति । गर्भाणां धृत्या अप्रपादाय । तस्माद्गर्भाः प्रजानामप्रपादुकाः । उपरीव निदधाति । उपरीव हि सुवर्गो लोकः । सुवर्गस्य लोकस्य समष्ट्यै ६
tṛtīyasyāmito divi soma āsīt | taṃ gāyatryāharat | tasya parṇamacchidyata | tatparṇo'bhavat | tatparṇasya parṇatvam | brahma vai parṇaḥ | yatparṇaśākhayā vatsānapākaroti | brahmaṇaivainānapākaroti | gāyatro vai parṇaḥ | gāyatrāḥ paśavaḥ 1 tasmāttrīṇitrīṇi parṇasya palāśāni | tripadā gāyatrī |yatparṇaśakhayā gāḥ prārpayati | svayaivainā devatayā prārpayati | yaṃ kāmayetāpaśuḥ syāditi | aparṇāṃ tasmai śuṣkāgrāmāharet | apaśureva bhavati | yaṃ kāmayeta paśumāntsyāditi | bahuparṇāṃ tasmai bahuśākhāmāharet | paśumantamevainaṃ karoti 2 yatprācīmāharet | devalokamabhijayet | yadudīcīṃ manuṣyalokam | prācīmudīcīmāharati | ubhayorlokayorabhijityai | iṣe tvorje tvetyāha | iṣamevorjaṃ yajamāne dadhāti | vāyavaḥ sthetyāha | vāyurvā antarikṣasyādhyakṣāḥ | antarikṣadevatyāḥ khalu vai paśavaḥ 3 vāyava evainānparidadāti | pra vā enānetadākaroti | yadāha | vāyavaḥ sthetyupāyavaḥ sthetyāha | yajamānāyaiva paśūnupahvayate | devo vaḥ savitā prārpayatvityāha prasūtyai | śreṣṭhatamāya karmaṇa ityāha | yajño hi śreṣṭhatamaṃ karma | tasmādevamāha | āpyāyadhvamaghniyā devabhāgamityāha 4 vatsebhyaśca vā etāḥ purā mauṣyebhyaścāpyāyanta | devebhya evainā indrāyāpyāyati | ūrjasvatīḥ payasvatīrityāha | ūrjam̐ hi payaḥ saṃbharanti | prajāvatīranamīvā ayakṣmā ityāha prajātyai | mā vaḥ stena īśata māghaśam̐sa ityāha guptyai | rudra sya hetiḥ pari vo vṛṇaktvityāha | rudrā devaināstrāyate | dhruvā asmingopatau syāta bahvīrityāha | dhruvā evāsminbahvīḥ karoti 5 yajamānasya paśūnpāhītyāha | paśūnāṃ gopīthāya | tasmātsāyaṃ paśava upa samāvartante | anadhaḥ sādayati | garbhāṇāṃ dhṛtyā aprapādāya | tasmādgarbhāḥ prajānāmaprapādukāḥ | uparīva nidadhāti | uparīva hi suvargo lokaḥ | suvargasya lokasya samaṣṭyai 6
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.