वज्रो वै स्फ्यः । यदन्वञ्चं धारयेत् । वज्रेऽध्वर्युः क्षण्वीत । पुरस्तात्तिर्यञ्चं धारयति । वर्जो वै स्फ्यः । वज्रेणैव यज्ञस्य दक्षिणतो रक्षाꣳस्यपहन्ति । अग्निभ्यां प्राचश्च प्रतीचश्च । स्फ्येनोदीचश्चाध्राचश्च । स्फ्येन वा एष वज्रेणास्यै पाप्मानं भ्रातृव्यमपहत्य । उत्करेऽधि प्रवृश्चति १ यथोपधाय वृश्चन्त्येवम् । हस्ताववनेनिक्ते । आत्मानमेव पवयते । स्फ्यं प्रक्षालयति मेध्यत्वाय । अथो पाप्मन एव भ्रातृव्यस्य न्यङ्गं छिनत्ति । इध्माबर्हिरुपसादयति युक्त्यै । यज्ञस्य मिथुनत्वाय । अथो पुरोरुचमेवैतां दधाति । उत्तरस्य कर्मणोऽनुख्यात्यै । न पुरस्तात्प्रत्यगुपसादयेत् २ यत्पुरस्तात्प्रत्यगुपसादयेत् । अन्यत्राहुतिपथादिध्मं प्रतिपादयेत् । प्रजा वै बर्हिः । अपराध्नुयाद्बर्हिषा प्रजानां प्रजननम् । पश्चात्प्रागुपसादयति । आहुतिपथेनेध्मं प्रतिपादयति । संप्रत्येव बर्हिषा प्रजानां प्रजननमुपैति । दक्षिणमिध्मम् । उत्तरं बर्हिः । आत्मा वा इध्मः । प्रजा बर्हिः । प्रजा ह्यात्मन उत्तरतरा तीर्थे । ततो मेधमुपनीय । यथादेवतमेवैनत्प्रतिष्ठापयति । प्रतितिष्ठति प्रजया पशुभिर्यजमानः ३
vajro vai sphyaḥ | yadanvañcaṃ dhārayet | vajre'dhvaryuḥ kṣaṇvīta | purastāttiryañcaṃ dhārayati | varjo vai sphyaḥ | vajreṇaiva yajñasya dakṣiṇato rakṣām̐syapahanti | agnibhyāṃ prācaśca pratīcaśca | sphyenodīcaścādhrācaśca | sphyena vā eṣa vajreṇāsyai pāpmānaṃ bhrātṛvyamapahatya | utkare'dhi pravṛścati 1 yathopadhāya vṛścantyevam | hastāvavanenikte | ātmānameva pavayate | sphyaṃ prakṣālayati medhyatvāya | atho pāpmana eva bhrātṛvyasya nyaṅgaṃ chinatti | idhmābarhirupasādayati yuktyai | yajñasya mithunatvāya | atho purorucamevaitāṃ dadhāti | uttarasya karmaṇo'nukhyātyai | na purastātpratyagupasādayet 2 yatpurastātpratyagupasādayet | anyatrāhutipathādidhmaṃ pratipādayet | prajā vai barhiḥ | aparādhnuyādbarhiṣā prajānāṃ prajananam | paścātprāgupasādayati | āhutipathenedhmaṃ pratipādayati | saṃpratyeva barhiṣā prajānāṃ prajananamupaiti | dakṣiṇamidhmam | uttaraṃ barhiḥ | ātmā vā idhmaḥ | prajā barhiḥ | prajā hyātmana uttaratarā tīrthe | tato medhamupanīya | yathādevatamevainatpratiṣṭhāpayati | pratitiṣṭhati prajayā paśubhiryajamānaḥ 3
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.