दिवः शिल्पमवततम् । पृथिव्याः ककुभि श्रितम् । तेन वयँ सहस्रवल्शेन । सपत्नं नाशयामसि स्वाहेति स्रुक्संमार्जनान्यग्नौ प्रहरति । आपो वै दर्भाः । रूपमेवैषामेतन्महिमानं व्याचष्टे । अनुष्टुभर्चा । आनुष्टुभः प्रजापतिः । प्राजापत्यो वेदः । वेदस्याग्रँ स्रुक्संमार्जनानि १ स्वेनैवैनानि छन्दसा । स्वया देवतया समर्धयति । अथो ऋग्वाव योषा । दर्भो वृषा । तन्मिथुनम् । मिथुनमेवास्य तद्यज्ञे करोति प्रजननाय । प्रजायते प्रजया पशुभिर्यजमानः । तान्येके वृथैवापास्यन्ति । तत्तथा न कार्यम् । आरब्धस्य यज्ञियस्य कर्मणः स विदोहः २ यद्येनानि पशवोऽभितिष्ठेयुः । न तत्पशुभ्यः कम् । अद्भिर्मार्जयित्वोत्करे न्यस्येत् । यद्वै यज्ञियस्य कर्मणोऽन्यत्राहुतीभ्यः संतिष्ठते । उत्करो वाव तस्य प्रतिष्ठा । एताँ हि तस्मै प्रतिष्ठां देवाः समभरन् । यदद्भिर्मार्जयति । तेन शान्तम् । यदुत्करे न्यस्यति । प्रतिष्ठामेवैनानि तद्गमयति ३ प्रतितिष्ठति प्रजया पशुभिर्यजमानः । अथो स्तम्बस्य वा एतद्रू पम् । यत्स्रुक्संमार्जनानि । स्तम्बशो वा ओषधयः । तासां जरत्कक्षे पशवो न रमन्ते । अप्रियो ह्येषां जरत्कक्षः । यावदप्रियो ह वै जरत्कक्षः पशूनाम् । तावदप्रियः पशूनां भवति । यस्यैतान्यन्यत्राग्नेर्दधति । नवदाव्यासु वा ओषधीषु पशवो रमन्ते ४ नवदावो ह्येषां प्रियः । यावत्प्रियो ह वै नवदावः पशूनाम् । तावत्प्रियः पशूनां भवति । यस्यैतान्यग्नौ प्रहरन्ति । तस्मादेतान्यग्नावेव प्रहरेत् । यतरस्मिन्त्संमृज्यात् । पशूनां धृत्यै । यो भूतानामधिपतिः । रुद्र स्तन्तिचरो वृषा । पशूनस्माकं मा हिँ सीः । एतदस्तु हुतं तव स्वाहेत्यग्निसंमार्जनान्यग्नौ प्रहरति । एषा वा एतेषां योनिः । एषा प्रतिष्ठा । स्वामेवैनानि योनिम् । स्वां प्रतिष्ठां गमयति । प्रतितिष्ठति प्रजया पशुभिर्यजमानः ५
divaḥ śilpamavatatam | pṛthivyāḥ kakubhi śritam | tena vaya~ sahasravalśena | sapatnaṃ nāśayāmasi svāheti sruksaṃmārjanānyagnau praharati | āpo vai darbhāḥ | rūpamevaiṣāmetanmahimānaṃ vyācaṣṭe | anuṣṭubharcā | ānuṣṭubhaḥ prajāpatiḥ | prājāpatyo vedaḥ | vedasyāgra~ sruksaṃmārjanāni 1 svenaivaināni chandasā | svayā devatayā samardhayati | atho ṛgvāva yoṣā | darbho vṛṣā | tanmithunam | mithunamevāsya tadyajñe karoti prajananāya | prajāyate prajayā paśubhiryajamānaḥ | tānyeke vṛthaivāpāsyanti | tattathā na kāryam | ārabdhasya yajñiyasya karmaṇaḥ sa vidohaḥ 2 yadyenāni paśavo'bhitiṣṭheyuḥ | na tatpaśubhyaḥ kam | adbhirmārjayitvotkare nyasyet | yadvai yajñiyasya karmaṇo'nyatrāhutībhyaḥ saṃtiṣṭhate | utkaro vāva tasya pratiṣṭhā | etā~ hi tasmai pratiṣṭhāṃ devāḥ samabharan | yadadbhirmārjayati | tena śāntam | yadutkare nyasyati | pratiṣṭhāmevaināni tadgamayati 3 pratitiṣṭhati prajayā paśubhiryajamānaḥ | atho stambasya vā etadrū pam | yatsruksaṃmārjanāni | stambaśo vā oṣadhayaḥ | tāsāṃ jaratkakṣe paśavo na ramante | apriyo hyeṣāṃ jaratkakṣaḥ | yāvadapriyo ha vai jaratkakṣaḥ paśūnām | tāvadapriyaḥ paśūnāṃ bhavati | yasyaitānyanyatrāgnerdadhati | navadāvyāsu vā oṣadhīṣu paśavo ramante 4 navadāvo hyeṣāṃ priyaḥ | yāvatpriyo ha vai navadāvaḥ paśūnām | tāvatpriyaḥ paśūnāṃ bhavati | yasyaitānyagnau praharanti | tasmādetānyagnāveva praharet | yatarasmintsaṃmṛjyāt | paśūnāṃ dhṛtyai | yo bhūtānāmadhipatiḥ | rudra stanticaro vṛṣā | paśūnasmākaṃ mā hi~ sīḥ | etadastu hutaṃ tava svāhetyagnisaṃmārjanānyagnau praharati | eṣā vā eteṣāṃ yoniḥ | eṣā pratiṣṭhā | svāmevaināni yonim | svāṃ pratiṣṭhāṃ gamayati | pratitiṣṭhati prajayā paśubhiryajamānaḥ 5
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.