अयज्ञो वा एषः । योऽपत्नीकः । न प्रजाः प्रजायेरन् । पत्न्यन्वास्ते । यज्ञमेवाकः । प्रजानां प्रजननाय । यत्तिष्ठन्ती संनह्येत । प्रियं ज्ञातिँ रुन्ध्यात् । आसीना संनह्यते । आसीना ह्येषा वीर्यं करोति १ यत्पश्चात्प्राच्यन्वासीत । अनया समदं दधीत । देवानां पत्निया समदं दधीत । देशाद्दक्षिणत उदीच्यन्वास्ते । आत्मनो गोपीथाय । आशासाना सौमनसमित्याह । मेध्यामेवैनां केवलीं कृत्वा । आशिषा समर्धयति । अग्नेरनुव्रता भूत्वा संनह्ये सुकृताय कमित्याह । एतद्वै पत्नियै व्रतोपनयनम् २ तेनैवैनां व्रतमुपनयति । तस्मादाहुः । यश्चैवं वेद यश्चन । योक्त्रमेव युते । यमन्वास्ते । तस्यामुष्मिँ ल्लोके भवतीति योक्त्रेण । यद्योक्त्रम् । स योगः । यदास्ते । स क्षेमः ३ योगक्षेमस्य क्ळ्प्त्यै । युक्तं क्रियाता आशीः कामे युज्याता इति । आशिषः समृद्ध्यै । ग्रन्थिं ग्रथ्नाति । आशिष एवास्यां परिगृह्णाति । पुमान्वै ग्रन्थिः । स्त्री पत्नी ।तन्मिथुनम् । मिथुनमेवास्य तद्यज्ञे करोति प्रजननाय । प्रजायते प्रजया पशुभिर्यजमानः ४ अथो अर्धो वा एष आत्मनः । यत्पत्नी ।यज्ञस्य धृत्या अशिथिलंभावाय । सुप्रजसस्त्वा वयँ सुपत्नीरुपसेदिमेत्याह । यज्ञमेव तन्मिथुनी करोति । ऊनेऽतिरिक्तं धीयाता इति प्रजात्यै । महीनां पयोऽस्योषधीनाँ रस इत्याह । रूपमेवास्यैतन्महिमानं व्याचष्टे । तस्य तेऽक्षीयमाणस्य निर्वपामि देवय-ज्याया इत्याह । आशिषमेवैतामाशास्ते ५
ayajño vā eṣaḥ | yo'patnīkaḥ | na prajāḥ prajāyeran | patnyanvāste | yajñamevākaḥ | prajānāṃ prajananāya | yattiṣṭhantī saṃnahyeta | priyaṃ jñāti~ rundhyāt | āsīnā saṃnahyate | āsīnā hyeṣā vīryaṃ karoti 1 yatpaścātprācyanvāsīta | anayā samadaṃ dadhīta | devānāṃ patniyā samadaṃ dadhīta | deśāddakṣiṇata udīcyanvāste | ātmano gopīthāya | āśāsānā saumanasamityāha | medhyāmevaināṃ kevalīṃ kṛtvā | āśiṣā samardhayati | agneranuvratā bhūtvā saṃnahye sukṛtāya kamityāha | etadvai patniyai vratopanayanam 2 tenaivaināṃ vratamupanayati | tasmādāhuḥ | yaścaivaṃ veda yaścana | yoktrameva yute | yamanvāste | tasyāmuṣmi~ lloke bhavatīti yoktreṇa | yadyoktram | sa yogaḥ | yadāste | sa kṣemaḥ 3 yogakṣemasya kl̤ptyai | yuktaṃ kriyātā āśīḥ kāme yujyātā iti | āśiṣaḥ samṛddhyai | granthiṃ grathnāti | āśiṣa evāsyāṃ parigṛhṇāti | pumānvai granthiḥ | strī patnī |tanmithunam | mithunamevāsya tadyajñe karoti prajananāya | prajāyate prajayā paśubhiryajamānaḥ 4 atho ardho vā eṣa ātmanaḥ | yatpatnī |yajñasya dhṛtyā aśithilaṃbhāvāya | suprajasastvā vaya~ supatnīrupasedimetyāha | yajñameva tanmithunī karoti | ūne'tiriktaṃ dhīyātā iti prajātyai | mahīnāṃ payo'syoṣadhīnā~ rasa ityāha | rūpamevāsyaitanmahimānaṃ vyācaṣṭe | tasya te'kṣīyamāṇasya nirvapāmi devaya-jyāyā ityāha | āśiṣamevaitāmāśāste 5
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.