देवासुराः संयात्ता आसन् । स एतमिन्द्र आज्यस्यावकाशमपश्यत् । तेनावैक्षत । ततो देवा अभवन् । परासुराः । य एवं विद्वानाज्यमवेक्षते । भवत्यात्मना । परास्य भ्रातृव्यो भवति । ब्रह्मवादिनो वदन्ति । यदाज्येनान्यानि हवीँ ष्यभिघारयति १ अथ केनाज्यमिति । सत्येनेति ब्रूयात् । चक्षुर्वै सत्यम् । सत्येनैवैनदभिघारयति । ईश्वरो वा एषोऽन्धो भवितोः । यश्चक्षुषाज्यमवेक्षते । निमील्यावेक्षेत । दाधारात्मन्चक्षुः । अभ्याज्यं घारयति । आज्यं गृह्णाति २ छन्दाँ सि वा आज्यम् । छन्दाँ स्येव प्रीणाति । चतुर्जुह्वां गृह्णाति । चतुष्पादः पशवः । पशूनेवावरुन्धे । अष्टावुपभृति । अष्टाक्षरा गायत्री ।गायत्रः प्राणः । प्राणमेव पशुषु दधाति । चतुर्ध्रुवायाम् ३ चतुष्पादः पशवः । पशुष्वेवोपरिष्टात्प्रतितिष्ठति । यजमानदेवत्या वै जुहूः । भ्रातृव्यदेवत्योपभृत् । चतुर्जुह्वां गृह्णन्भूयो गृह्णीयात् । अष्टावुपभृति गृह्णन्कनीयः । यजमानायैव भ्रातृव्यमुपस्तिं करोति । गौर्वै स्रुवः । चतुर्जुह्वां गृह्णाति । तस्माच्चतुष्पदी ४ अष्टावुपभृति । तस्मादष्टाशफा । चतुर्ध्रुवायाम् । तस्माच्चतुस्तना । गामेव तत्सँ स्करोति । सास्मै सँ स्कृतेषमूर्जं दुहे । यज्जुह्वां गृह्णाति । प्रयाजेभ्यस्तत् । यदुपभृति । प्रयाजानूयाजेभ्यस्तत् । सर्वस्मै वा एतद्यज्ञाय गृह्यते । यद्ध्रुवायामाज्यम् ५
devāsurāḥ saṃyāttā āsan | sa etamindra ājyasyāvakāśamapaśyat | tenāvaikṣata | tato devā abhavan | parāsurāḥ | ya evaṃ vidvānājyamavekṣate | bhavatyātmanā | parāsya bhrātṛvyo bhavati | brahmavādino vadanti | yadājyenānyāni havī~ ṣyabhighārayati 1 atha kenājyamiti | satyeneti brūyāt | cakṣurvai satyam | satyenaivainadabhighārayati | īśvaro vā eṣo'ndho bhavitoḥ | yaścakṣuṣājyamavekṣate | nimīlyāvekṣeta | dādhārātmancakṣuḥ | abhyājyaṃ ghārayati | ājyaṃ gṛhṇāti 2 chandā~ si vā ājyam | chandā~ syeva prīṇāti | caturjuhvāṃ gṛhṇāti | catuṣpādaḥ paśavaḥ | paśūnevāvarundhe | aṣṭāvupabhṛti | aṣṭākṣarā gāyatrī |gāyatraḥ prāṇaḥ | prāṇameva paśuṣu dadhāti | caturdhruvāyām 3 catuṣpādaḥ paśavaḥ | paśuṣvevopariṣṭātpratitiṣṭhati | yajamānadevatyā vai juhūḥ | bhrātṛvyadevatyopabhṛt | caturjuhvāṃ gṛhṇanbhūyo gṛhṇīyāt | aṣṭāvupabhṛti gṛhṇankanīyaḥ | yajamānāyaiva bhrātṛvyamupastiṃ karoti | gaurvai sruvaḥ | caturjuhvāṃ gṛhṇāti | tasmāccatuṣpadī 4 aṣṭāvupabhṛti | tasmādaṣṭāśaphā | caturdhruvāyām | tasmāccatustanā | gāmeva tatsa~ skaroti | sāsmai sa~ skṛteṣamūrjaṃ duhe | yajjuhvāṃ gṛhṇāti | prayājebhyastat | yadupabhṛti | prayājānūyājebhyastat | sarvasmai vā etadyajñāya gṛhyate | yaddhruvāyāmājyam 5
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.