यद्विष्षण्णेन जुहुयात् । अप्रजा अपशुर्यजमानः स्यात् । यदनायतने निनयेत् । अनायतनः स्यात् । प्राजापत्ययर्चा वल्मीकवपायामवनयेत् । प्राजापत्यो वै वल्मीकः । यज्ञः प्रजापतिः । प्रजापतावेव यज्ञं प्रतिष्ठापयति । भूरित्याह । भूतो वै प्रजापतिः १ भूतिमेवोपैति । तत्कृत्वा । अन्यां दुग्ध्वा पुनर्होतव्यम् । सैव ततः प्रायश्चित्तिः । यत्कीटावपन्नेन जुहुयात् । अप्रजा अपशुर्यजमानः स्यात् । यदनायतने निनयेत् । अनायतनः स्यात् । मध्यमेन पर्णेन द्यावापृथिव्य-यर्चान्तःपरिधि निनयेत् । द्यावापृथिव्योरेवैनत्प्रतिष्ठापयति २ तत्कृत्वा । अन्यां दुग्ध्वा पुनर्होतव्यम् । सैव ततः प्रायश्चित्तिः । यदववृष्टेन जुहुयात् । अपरूपमस्यात्मन्जायेत । किलासो वा स्यादर्शसो वा । यत्प्रत्येयात् । यज्ञं विच्छिन्द्यात् । स जुहुयात् । मित्रो जनान्कल्पयति प्रजानन् ३ मित्रो दाधार पृथिवीमुत द्याम् । मित्रः कृष्टीरनिमिषाभिचष्टे । सत्याय हव्यं घृतवज्जुहोतेति । मित्रेणैवैनत्कल्पयति । तत्कृत्वा । अन्यां दुग्ध्वा पुनर्होतव्यम् । सैव ततः प्रायश्चित्तिः । यत्पूर्वस्यामाहुत्याꣳ हुतायामुत्तराहुतिः स्कन्देत् । द्विपाद्भिः पशुभिर्यजमानो व्यृध्येत । यदुत्तरयाभिजुहुयात् ४ चतुष्पाद्भिः पशुभिर्यजमानो व्यृध्येत । यत्र वेत्थ वनस्पते देवानां गुह्या नामानि । तत्र हव्यानि गामयेति वानस्पत्ययर्चा समिधमाधाय । तूष्णीमेव पुनर्जुहुयात् । वनस्पतिनैव यज्ञस्यार्तां चानार्तां चाहुती विदाधार । तत्कृत्वा । अन्यां दुग्ध्वा पुनर्होतव्यम् । सैव ततः प्रायश्चित्तिः । यत्पुरा प्रयाजेभ्यः प्राङङ्गारः स्कन्देत् । अध्वर्यवे च यजमानाय चाकꣳ स्यात् ५ यद्दक्षिणा । ब्रह्मणे च यजमानाय चाकꣳ स्यात् । यत्प्रत्यक् । होत्रे च पत्नियै च यजमानाय चाकꣳ स्यात् । यदुदङ्।अग्नीधे च पशुभ्यश्च यजमानाय चाकꣳ स्यात् । यदभि जुहुयात् । रुद्रो ऽस्य पशून्घातुकः स्यात् । यन्नाभिजुहुयात् । अशान्तः प्रह्रियेत ६ स्रुवस्य बुध्नेनाभिनिदध्यात् । मा तमो मा यज्ञस्तमन्मा यजमानस्तमत् । नमस्ते अस्त्वायते । नमो रुद्र परायते । नमो यत्र निषीदसि । अमुं मा हिꣳ सीरमुं मा हिꣳ सीरिति येन स्कन्देत् । तं प्रहरेत् । सहस्रशृङ्गो वृषभो जातवेदाः । स्तोमपृष्ठो घृतवान्त्सुप्रतीकः । मा नो हासीन्मेत्थितो नेत्त्वा जहाम । गोपोषं नो वीरपोषं च यच्छेति । ब्रह्मणैवैनं प्रहरति । सैव ततः प्रायश्चित्तिः ७
yadviṣṣaṇṇena juhuyāt | aprajā apaśuryajamānaḥ syāt | yadanāyatane ninayet | anāyatanaḥ syāt | prājāpatyayarcā valmīkavapāyāmavanayet | prājāpatyo vai valmīkaḥ | yajñaḥ prajāpatiḥ | prajāpatāveva yajñaṃ pratiṣṭhāpayati | bhūrityāha | bhūto vai prajāpatiḥ 1 bhūtimevopaiti | tatkṛtvā | anyāṃ dugdhvā punarhotavyam | saiva tataḥ prāyaścittiḥ | yatkīṭāvapannena juhuyāt | aprajā apaśuryajamānaḥ syāt | yadanāyatane ninayet | anāyatanaḥ syāt | madhyamena parṇena dyāvāpṛthivya-yarcāntaḥparidhi ninayet | dyāvāpṛthivyorevainatpratiṣṭhāpayati 2 tatkṛtvā | anyāṃ dugdhvā punarhotavyam | saiva tataḥ prāyaścittiḥ | yadavavṛṣṭena juhuyāt | aparūpamasyātmanjāyeta | kilāso vā syādarśaso vā | yatpratyeyāt | yajñaṃ vicchindyāt | sa juhuyāt | mitro janānkalpayati prajānan 3 mitro dādhāra pṛthivīmuta dyām | mitraḥ kṛṣṭīranimiṣābhicaṣṭe | satyāya havyaṃ ghṛtavajjuhoteti | mitreṇaivainatkalpayati | tatkṛtvā | anyāṃ dugdhvā punarhotavyam | saiva tataḥ prāyaścittiḥ | yatpūrvasyāmāhutyām̐ hutāyāmuttarāhutiḥ skandet | dvipādbhiḥ paśubhiryajamāno vyṛdhyeta | yaduttarayābhijuhuyāt 4 catuṣpādbhiḥ paśubhiryajamāno vyṛdhyeta | yatra vettha vanaspate devānāṃ guhyā nāmāni | tatra havyāni gāmayeti vānaspatyayarcā samidhamādhāya | tūṣṇīmeva punarjuhuyāt | vanaspatinaiva yajñasyārtāṃ cānārtāṃ cāhutī vidādhāra | tatkṛtvā | anyāṃ dugdhvā punarhotavyam | saiva tataḥ prāyaścittiḥ | yatpurā prayājebhyaḥ prāṅaṅgāraḥ skandet | adhvaryave ca yajamānāya cākam̐ syāt 5 yaddakṣiṇā | brahmaṇe ca yajamānāya cākam̐ syāt | yatpratyak | hotre ca patniyai ca yajamānāya cākam̐ syāt | yadudaṅ|agnīdhe ca paśubhyaśca yajamānāya cākam̐ syāt | yadabhi juhuyāt | rudro 'sya paśūnghātukaḥ syāt | yannābhijuhuyāt | aśāntaḥ prahriyeta 6 sruvasya budhnenābhinidadhyāt | mā tamo mā yajñastamanmā yajamānastamat | namaste astvāyate | namo rudra parāyate | namo yatra niṣīdasi | amuṃ mā him̐ sīramuṃ mā him̐ sīriti yena skandet | taṃ praharet | sahasraśṛṅgo vṛṣabho jātavedāḥ | stomapṛṣṭho ghṛtavāntsupratīkaḥ | mā no hāsīnmetthito nettvā jahāma | gopoṣaṃ no vīrapoṣaṃ ca yaccheti | brahmaṇaivainaṃ praharati | saiva tataḥ prāyaścittiḥ 7
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.