याः पुरस्तात्प्रस्रवन्ति । उपरिष्टात्सर्वतश्च याः । ताभी रश्मिपवित्राभिः । श्रद्धां यज्ञमारभे । देवा गातुविदः । गातुं यज्ञाय विन्दत । मनसस्पतिना देवेन । वाताद्यज्ञः प्रयुज्यताम् । तृतीयस्यै दिवः । गायत्रिया सोम आभृतः १ सोमपीथाय संनयितुम् । वकलमन्तरमाददे । आपो देवीः शुद्धाः स्थ । इमा पात्राणि शुन्धत । उपातङ्क्याय देवानाम् । पर्णवल्कमुत शुन्धत । पयो गृहेषु पयो अघ्नियासु । पयो वत्सेषु पय इन्द्रा य हविषे ध्रियस्व । गायत्री पर्णवल्केन । पयः सोमं करोत्विमम् २ अग्निं गृह्णामि सुरथं यो मयोभूः । य उद्यन्तमारोहति सूर्यमह्ने । आदित्यं ज्योतिषां ज्योतिरुत्तमम् । श्वो यज्ञाय रमतां देवताभ्यः । वसून्रुद्रा नादित्यान् । इन्द्रे ण सह देवताः । ताः पूर्वः परिगृह्णामि । स्व आयतने मनीषया । इमामूर्जं पञ्चदशीं ये प्रविष्टाः । तान्देवान्परिगृह्णामि पूर्वाः ३ अग्निर्हव्यवाडिह तानावहतु । पौर्णमासꣳ हविरिदमेषां मयि । आमावास्यꣳ हविरिदमेषां मयि । अन्तराग्नी पशवः । देवसꣳ सदमागमन् । तान्पूर्वः परिगृह्णामि । स्व आयतने मनीषया । इह प्रजा विश्वरूपा रमन्ताम् । अग्निं गृहपतिमभि संवसानाः । ताः पूर्वः परिगृह्णामि ४ स्व आयतने मनीषया । इह पशवो विश्वरूपा रमन्ताम् । अग्निं गृहपतिमभि संवसानाः । तान्पूर्वः परिगृह्णामि । स्व आयतने मनीषया । अयं पितृणामग्निः । अवाड्ढव्या पितृभ्य आ । तं पूर्वः परिगृह्णामि । अविषं नः पितुं करत् । अजस्रं त्वाꣳ सभापालाः ५ विजयभागꣳ समिन्धताम् । अग्ने दीदाय मे सभ्य । विजित्यै शरदः शतम् । अन्नमावसथीयम् । अभिहराणि शरदः शतम् । आवसथे श्रियं मन्त्रम् । अहिर्बुध्नियो नियच्छतु । इदमहमग्निज्येष्ठेभ्यः । वसुभ्यो यज्ञं प्रब्रवीमि । इदमहमिन्द्र ज्येष्ठेभ्यः ६ रुद्रे भ्यो यज्ञं प्रब्रवीमि । इदमहं वरुणज्येष्ठेभ्यः । आदित्येभ्यो यज्ञं प्रब्रवीमि । पयस्वतीरोषधयः । पयस्वद्वीरुधां पयः । अपां पयसो यत्पयः । तेन मामिन्द्र सꣳ सृज । अग्ने व्रतपते व्रतं चरिष्यामि । तच्छकेयं तन्मे राध्यताम् । वायो व्रतपत आदित्य व्रतपते ७ व्रतानां व्रतपते व्रतं चरिष्यामि । तच्छकेयं तन्मे राध्यताम् । इमां प्राचीमुदीचीम् । इषमूर्जमभि सꣳ स्कृताम् । बहुपर्णामशुष्काग्राम् । हरामि पशुपामहम् । यत्कृष्णो रूपं कृत्वा । प्राविशस्त्वं वनस्पतीन् । ततस्त्वामेकविꣳ शतिधा । संभरामि सुसंभृता ८ त्रीन्परिधीꣳ स्तिस्रः समिधः । यज्ञायुरनुसंचरान् । उपवेषं मेक्षणं धृष्टिम् । संभरामि सुसंभृता । या जाता ओषधयः । देवेभ्यस्त्रियुगं पुरा । तासां पर्व राध्यासम् । परिस्तरमाहरन् । अपां मेध्यं यज्ञियम् । सदेवꣳ शिवमस्तु मे ९ आच्छेत्ता वो मा रिषम् । जीवानि शरदः शतम् । अपरिमितानां परिमिताः । संनह्ये सुकृताय कम् । एनो मा निगां कतमच्चनाहम् । पुनरुत्थाय बहुला भवन्तु । सकृदाच्छिन्नं बर्हिरूर्णामृदु । स्योनं पितृभ्यस्त्वा भराम्यहम् । अस्मिन्त्सीदन्तु मे पितरः सोम्याः । पितामहाः प्रपितामहाश्चानुगैः सह १० त्रिवृत्पलाशे दर्भः । इयान्प्रादेशसंमितः । यज्ञे पवित्रं पोतृतमम् । पयो हव्यं करोतु मे । इमौ प्राणापानौ । यज्ञस्याङ्गानि सर्वशः । आप्याययन्तौ संचरताम् । पवित्रे हव्यशोधने । पवित्रे स्थो वैष्णवी ।वायुर्वां मनसा पुनातु ११ अयं प्राणश्चापानश्च । यजमानमपिगच्छताम् । यज्ञे ह्यभूतां पोतारौ । पवित्रे हव्यशोधने । त्वया वेदिं विविदुः पृथिवीम् । त्वया यज्ञो जायते विश्वदानिः । अच्छिद्रं यज्ञमन्वेषि विद्वान् । त्वया होता संतनोत्यर्धमसान् । त्रयस्त्रिꣳ शोऽसि तन्तूनाम् । पवित्रेण सहागहि १२ शिवेऽयꣳ रज्जुरभिधानी ।अघ्नियामुपसेवताम् । अप्रस्रꣳ साय यज्ञस्य । उखे उपदधाम्यहम् । पशुभिः संनीतं बिभृताम् । इन्द्रा य शृतं दधि । उपवेषोऽसि यज्ञाय । त्वां परिवेषमधारयन् । इन्द्रा य हविः कृण्वन्तः । शिवः शग्मो भवासि नः १३ अमृण्मयं देवपात्रम् । यज्ञस्यायुषि प्रयुज्यताम् । तिरःपवित्रमतिनीताः । आपो धारय मातिगुः । देवेन सवित्रोत्पूताः । वसोः सूर्यस्य रश्मिभिः । गां दोहपवित्रे रज्जुम् । सर्वा पात्राणि शुन्धत । एता आचरन्ति मधुमद्दुहानाः । प्रजावतीर्यशसो विश्वरूपाः १४ बह्वीर्भवन्तीरुप जायमानाः । इह व इन्द्रो रमयतु गावः । पूषा स्थ । अयक्ष्मा वः प्रजया सꣳ सृजामि । रायस्पोषेण बहुला भवन्तीः । ऊर्जं पयः पिन्वमाना घृतं च । जीवो जीवन्तीरुप वः सदेयम् । द्यौश्चेमं यज्ञं पृथिवी च संदुहाताम् । धाता सोमेन सह वातेन वायुः । यजमानाय द्र विणं दधातु १५ उत्सं दुहन्ति कलशं चतुर्बिलम् । इडां देवीं मधुमतीꣳ सुवर्विदम् । तदिन्द्रा ग्नी जिन्वतꣳ सूनृतावत् । तद्यजमानममृतत्वे दधातु । कामधुक्षः प्र णो ब्रूहि । इन्द्रा य हविरिन्द्रि यम् । अमूं यस्यां देवानाम् । मनुष्याणां पयो हितम् । बहु दुग्धीन्द्रा य देवेभ्यः । हव्यमाप्यायतां पुनः १६ वत्सेभ्यो मनुष्येभ्यः । पुनर्दोहाय कल्पताम् । यज्ञस्य संततिरसि । यज्ञस्य त्वा संततिमनु संतनोमि । अदस्तमसि विष्णवे त्वा । यज्ञायापिदधाम्यहम् । अद्भिररिक्तेन पात्रेण । याः पूताः परिशेरते । अयं पयः सोमं कृत्वा । स्वां योनिमपिगच्छतु १७ पर्णवल्कः पवित्रम् । सौम्यः सोमाद्धि निर्मितः । इमौ पर्णं च दर्भं च । देवानाꣳ हव्यशोधनौ । प्रातर्वेषाय गोपाय विष्णो हव्यꣳ हि रक्षसि । उभावग्नी उपस्तृणते । देवता उपवसन्तु मे । अहं ग्राम्यानुपवसामि । मह्यं गोपतये पशून् १८
yāḥ purastātprasravanti | upariṣṭātsarvataśca yāḥ | tābhī raśmipavitrābhiḥ | śraddhāṃ yajñamārabhe | devā gātuvidaḥ | gātuṃ yajñāya vindata | manasaspatinā devena | vātādyajñaḥ prayujyatām | tṛtīyasyai divaḥ | gāyatriyā soma ābhṛtaḥ 1 somapīthāya saṃnayitum | vakalamantaramādade | āpo devīḥ śuddhāḥ stha | imā pātrāṇi śundhata | upātaṅkyāya devānām | parṇavalkamuta śundhata | payo gṛheṣu payo aghniyāsu | payo vatseṣu paya indrā ya haviṣe dhriyasva | gāyatrī parṇavalkena | payaḥ somaṃ karotvimam 2 agniṃ gṛhṇāmi surathaṃ yo mayobhūḥ | ya udyantamārohati sūryamahne | ādityaṃ jyotiṣāṃ jyotiruttamam | śvo yajñāya ramatāṃ devatābhyaḥ | vasūnrudrā nādityān | indre ṇa saha devatāḥ | tāḥ pūrvaḥ parigṛhṇāmi | sva āyatane manīṣayā | imāmūrjaṃ pañcadaśīṃ ye praviṣṭāḥ | tāndevānparigṛhṇāmi pūrvāḥ 3 agnirhavyavāḍiha tānāvahatu | paurṇamāsam̐ haviridameṣāṃ mayi | āmāvāsyam̐ haviridameṣāṃ mayi | antarāgnī paśavaḥ | devasam̐ sadamāgaman | tānpūrvaḥ parigṛhṇāmi | sva āyatane manīṣayā | iha prajā viśvarūpā ramantām | agniṃ gṛhapatimabhi saṃvasānāḥ | tāḥ pūrvaḥ parigṛhṇāmi 4 sva āyatane manīṣayā | iha paśavo viśvarūpā ramantām | agniṃ gṛhapatimabhi saṃvasānāḥ | tānpūrvaḥ parigṛhṇāmi | sva āyatane manīṣayā | ayaṃ pitṛṇāmagniḥ | avāḍḍhavyā pitṛbhya ā | taṃ pūrvaḥ parigṛhṇāmi | aviṣaṃ naḥ pituṃ karat | ajasraṃ tvām̐ sabhāpālāḥ 5 vijayabhāgam̐ samindhatām | agne dīdāya me sabhya | vijityai śaradaḥ śatam | annamāvasathīyam | abhiharāṇi śaradaḥ śatam | āvasathe śriyaṃ mantram | ahirbudhniyo niyacchatu | idamahamagnijyeṣṭhebhyaḥ | vasubhyo yajñaṃ prabravīmi | idamahamindra jyeṣṭhebhyaḥ 6 rudre bhyo yajñaṃ prabravīmi | idamahaṃ varuṇajyeṣṭhebhyaḥ | ādityebhyo yajñaṃ prabravīmi | payasvatīroṣadhayaḥ | payasvadvīrudhāṃ payaḥ | apāṃ payaso yatpayaḥ | tena māmindra sam̐ sṛja | agne vratapate vrataṃ cariṣyāmi | tacchakeyaṃ tanme rādhyatām | vāyo vratapata āditya vratapate 7 vratānāṃ vratapate vrataṃ cariṣyāmi | tacchakeyaṃ tanme rādhyatām | imāṃ prācīmudīcīm | iṣamūrjamabhi sam̐ skṛtām | bahuparṇāmaśuṣkāgrām | harāmi paśupāmaham | yatkṛṣṇo rūpaṃ kṛtvā | prāviśastvaṃ vanaspatīn | tatastvāmekavim̐ śatidhā | saṃbharāmi susaṃbhṛtā 8 trīnparidhīm̐ stisraḥ samidhaḥ | yajñāyuranusaṃcarān | upaveṣaṃ mekṣaṇaṃ dhṛṣṭim | saṃbharāmi susaṃbhṛtā | yā jātā oṣadhayaḥ | devebhyastriyugaṃ purā | tāsāṃ parva rādhyāsam | paristaramāharan | apāṃ medhyaṃ yajñiyam | sadevam̐ śivamastu me 9 ācchettā vo mā riṣam | jīvāni śaradaḥ śatam | aparimitānāṃ parimitāḥ | saṃnahye sukṛtāya kam | eno mā nigāṃ katamaccanāham | punarutthāya bahulā bhavantu | sakṛdācchinnaṃ barhirūrṇāmṛdu | syonaṃ pitṛbhyastvā bharāmyaham | asmintsīdantu me pitaraḥ somyāḥ | pitāmahāḥ prapitāmahāścānugaiḥ saha 10 trivṛtpalāśe darbhaḥ | iyānprādeśasaṃmitaḥ | yajñe pavitraṃ potṛtamam | payo havyaṃ karotu me | imau prāṇāpānau | yajñasyāṅgāni sarvaśaḥ | āpyāyayantau saṃcaratām | pavitre havyaśodhane | pavitre stho vaiṣṇavī |vāyurvāṃ manasā punātu 11 ayaṃ prāṇaścāpānaśca | yajamānamapigacchatām | yajñe hyabhūtāṃ potārau | pavitre havyaśodhane | tvayā vediṃ vividuḥ pṛthivīm | tvayā yajño jāyate viśvadāniḥ | acchidraṃ yajñamanveṣi vidvān | tvayā hotā saṃtanotyardhamasān | trayastrim̐ śo'si tantūnām | pavitreṇa sahāgahi 12 śive'yam̐ rajjurabhidhānī |aghniyāmupasevatām | aprasram̐ sāya yajñasya | ukhe upadadhāmyaham | paśubhiḥ saṃnītaṃ bibhṛtām | indrā ya śṛtaṃ dadhi | upaveṣo'si yajñāya | tvāṃ pariveṣamadhārayan | indrā ya haviḥ kṛṇvantaḥ | śivaḥ śagmo bhavāsi naḥ 13 amṛṇmayaṃ devapātram | yajñasyāyuṣi prayujyatām | tiraḥpavitramatinītāḥ | āpo dhāraya mātiguḥ | devena savitrotpūtāḥ | vasoḥ sūryasya raśmibhiḥ | gāṃ dohapavitre rajjum | sarvā pātrāṇi śundhata | etā ācaranti madhumadduhānāḥ | prajāvatīryaśaso viśvarūpāḥ 14 bahvīrbhavantīrupa jāyamānāḥ | iha va indro ramayatu gāvaḥ | pūṣā stha | ayakṣmā vaḥ prajayā sam̐ sṛjāmi | rāyaspoṣeṇa bahulā bhavantīḥ | ūrjaṃ payaḥ pinvamānā ghṛtaṃ ca | jīvo jīvantīrupa vaḥ sadeyam | dyauścemaṃ yajñaṃ pṛthivī ca saṃduhātām | dhātā somena saha vātena vāyuḥ | yajamānāya dra viṇaṃ dadhātu 15 utsaṃ duhanti kalaśaṃ caturbilam | iḍāṃ devīṃ madhumatīm̐ suvarvidam | tadindrā gnī jinvatam̐ sūnṛtāvat | tadyajamānamamṛtatve dadhātu | kāmadhukṣaḥ pra ṇo brūhi | indrā ya havirindri yam | amūṃ yasyāṃ devānām | manuṣyāṇāṃ payo hitam | bahu dugdhīndrā ya devebhyaḥ | havyamāpyāyatāṃ punaḥ 16 vatsebhyo manuṣyebhyaḥ | punardohāya kalpatām | yajñasya saṃtatirasi | yajñasya tvā saṃtatimanu saṃtanomi | adastamasi viṣṇave tvā | yajñāyāpidadhāmyaham | adbhirariktena pātreṇa | yāḥ pūtāḥ pariśerate | ayaṃ payaḥ somaṃ kṛtvā | svāṃ yonimapigacchatu 17 parṇavalkaḥ pavitram | saumyaḥ somāddhi nirmitaḥ | imau parṇaṃ ca darbhaṃ ca | devānām̐ havyaśodhanau | prātarveṣāya gopāya viṣṇo havyam̐ hi rakṣasi | ubhāvagnī upastṛṇate | devatā upavasantu me | ahaṃ grāmyānupavasāmi | mahyaṃ gopataye paśūn 18
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.