प्रजापतिरश्वमेधमसृजत । तꣳ सृष्टं न किं चनोदयच्छत् । तं वैश्वदेवान्येवोदयच्छन् । यद्वैश्वदेवानि जुहोति । यज्ञस्योद्यत्यै । स्वाहाधिमाधीताय स्वाहा । स्वाहाधीतं मनसे स्वाहा । स्वाहा मनः प्रजापतये स्वाहा । काय स्वाह कस्मै स्वाहा कतमस्मै स्वाहेति प्राजापत्ये मुख्ये भवतः । प्रजापतिमुखाभिरेवैनं देवताभिरुद्यच्छते १ अदित्यै स्वाहादित्यै मह्यै स्वाहादित्यै सुमृडीकायै स्वाहेत्याह । इयं वा अदितिः । अस्या एवैनं प्रतिष्ठायोद्यच्छते । सरस्वत्यै स्वाहा सरस्वत्यै बृहत्यै स्वाहा सरस्वत्यै पावकायै स्वाहेत्याह । वाग्वै सरस्वती ।वाचैवैनमुद्यच्छते । पूष्णे स्वाहा पूष्णे प्रपथ्याय स्वाहा पूष्णे नरंधिषाय स्वहेत्याह । पशवो वै पूषा । पशुभिरेवैनमुद्यच्छते । त्वष्ट्रे स्वाहा त्वष्ट्रे तुरीपाय स्वाहा त्वष्ट्रे पुरुरूपाय स्वाहेत्याह । त्वष्टा वै पशूनां मिथुनानाꣳ रूपकृत् । रूपमेव पशुषु दधाति । अथो रूपैरेवैनमुद्यच्छते । विष्णवे स्वाहा विष्णवे निखुर्यपाय स्वहा विष्णवे निभूयपाय स्वाहेत्याह । यज्ञो वै विष्णुः । यज्ञायैवैनमुद्यच्छते । पूर्णाहुतिमुत्तमां जुहोति । प्रत्युत्तब्ध्यै सयत्वाय २
prajāpatiraśvamedhamasṛjata | tam̐ sṛṣṭaṃ na kiṃ canodayacchat | taṃ vaiśvadevānyevodayacchan | yadvaiśvadevāni juhoti | yajñasyodyatyai | svāhādhimādhītāya svāhā | svāhādhītaṃ manase svāhā | svāhā manaḥ prajāpataye svāhā | kāya svāha kasmai svāhā katamasmai svāheti prājāpatye mukhye bhavataḥ | prajāpatimukhābhirevainaṃ devatābhirudyacchate 1 adityai svāhādityai mahyai svāhādityai sumṛḍīkāyai svāhetyāha | iyaṃ vā aditiḥ | asyā evainaṃ pratiṣṭhāyodyacchate | sarasvatyai svāhā sarasvatyai bṛhatyai svāhā sarasvatyai pāvakāyai svāhetyāha | vāgvai sarasvatī |vācaivainamudyacchate | pūṣṇe svāhā pūṣṇe prapathyāya svāhā pūṣṇe naraṃdhiṣāya svahetyāha | paśavo vai pūṣā | paśubhirevainamudyacchate | tvaṣṭre svāhā tvaṣṭre turīpāya svāhā tvaṣṭre pururūpāya svāhetyāha | tvaṣṭā vai paśūnāṃ mithunānām̐ rūpakṛt | rūpameva paśuṣu dadhāti | atho rūpairevainamudyacchate | viṣṇave svāhā viṣṇave nikhuryapāya svahā viṣṇave nibhūyapāya svāhetyāha | yajño vai viṣṇuḥ | yajñāyaivainamudyacchate | pūrṇāhutimuttamāṃ juhoti | pratyuttabdhyai sayatvāya 2
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.