सावित्रमष्टाकपालं प्रातर्निर्वपति । अष्टाक्षरा गायत्री ।गायत्रं प्रातःसवनम् । प्रातःसवनादेवैनं गायत्रियाश्छन्दसोऽधि निर्मिमीते । अथो प्रातःसवनमेव तेनाप्नोति । गायत्रीं छन्दः । सवित्रे प्रसवित्र एकादशकपालं मध्यंदिने । एकादशाक्षरा त्रिष्टुप् । त्रैष्टुभं माध्यंदिनꣳ सवनम् । माध्यंदिनादेवैनꣳ सवनात्त्रिष्टुभश्छन्दसोऽधि निर्मिमीते ३ अथो माध्यंदिनमेव सवनं तेनाप्नोति । त्रिष्टुभं छन्दः । सवित्र आसवित्रे द्वादशकपालमपराह्णे । द्वादशाक्षरा जगती ।जागतं तृतीयसवनम् । तृतीयसवनादेवैनं जगत्याश्छन्दसोऽधि निर्मिमीते । अथो तृतीयसवनमेव तेनाप्नोति । जगतीं छन्दः । ईश्वरो वा अश्वः प्रमुक्तः परां परावतं गन्तोः । इह धृतिः स्वाहेह विधृतिः स्वाहेह रन्तिः स्वाहेह रन्तिः स्वाहेति चतस्र आहुतीर्जुहोति ४ चतस्रो दिशः । दिग्भिरेवैनं परिगृह्णाति । आश्वत्थो व्रजो भवति । प्रजापतिर्देवेभ्यो निलायत । अश्वो रूपं कृत्वा । सोऽश्वत्थे संवत्सरमतिष्ठत् । तदश्वत्थस्याश्वत्थत्वम् । यदाश्वत्थो व्रजो भवति । स्व एवैनं योनौ प्रतिष्ठापयति ५
sāvitramaṣṭākapālaṃ prātarnirvapati | aṣṭākṣarā gāyatrī |gāyatraṃ prātaḥsavanam | prātaḥsavanādevainaṃ gāyatriyāśchandaso'dhi nirmimīte | atho prātaḥsavanameva tenāpnoti | gāyatrīṃ chandaḥ | savitre prasavitra ekādaśakapālaṃ madhyaṃdine | ekādaśākṣarā triṣṭup | traiṣṭubhaṃ mādhyaṃdinam̐ savanam | mādhyaṃdinādevainam̐ savanāttriṣṭubhaśchandaso'dhi nirmimīte 3 atho mādhyaṃdinameva savanaṃ tenāpnoti | triṣṭubhaṃ chandaḥ | savitra āsavitre dvādaśakapālamaparāhṇe | dvādaśākṣarā jagatī |jāgataṃ tṛtīyasavanam | tṛtīyasavanādevainaṃ jagatyāśchandaso'dhi nirmimīte | atho tṛtīyasavanameva tenāpnoti | jagatīṃ chandaḥ | īśvaro vā aśvaḥ pramuktaḥ parāṃ parāvataṃ gantoḥ | iha dhṛtiḥ svāheha vidhṛtiḥ svāheha rantiḥ svāheha rantiḥ svāheti catasra āhutīrjuhoti 4 catasro diśaḥ | digbhirevainaṃ parigṛhṇāti | āśvattho vrajo bhavati | prajāpatirdevebhyo nilāyata | aśvo rūpaṃ kṛtvā | so'śvatthe saṃvatsaramatiṣṭhat | tadaśvatthasyāśvatthatvam | yadāśvattho vrajo bhavati | sva evainaṃ yonau pratiṣṭhāpayati 5
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.