आ ब्रह्मन्ब्राह्मणो ब्रह्मवर्चसी जायतामित्याह । ब्राह्मण एव ब्रह्मवर्चसं दधाति । तस्मात्पुरा ब्राह्मणो ब्रह्मवर्चस्यजायत । आस्मिन्राष्ट्रे राजन्य इषव्यः शूरो महारथो जायतामित्याह । राजन्य एव शौर्यं महिमानं दधाति । तस्मात्पुरा राजन्य इषव्यः शूरो महारथोऽजायत । दोग्ध्री धेनुरित्याह । धेन्वामेव पयो दधाति । तस्मात्पुरा दोग्ध्री धेनुरजायत । वोढानड्वानियाह १ अनडुह्येव वीर्यं दधाति । तस्मात्पुरा वोढानड्वानजायत । आशुः सप्तिरित्याह । अश्व एव जवं दधाति । तस्मात्पुराशुरश्वोऽजायत । पुरंधिर्योषेत्याह । योषित्येव रूपं दधाति । तस्मात्स्त्री युवतिः प्रिया भावुका । जिष्णू रथेष्ठा इत्याह । आ ह वै तत्र जिष्णू रथेष्ठा जायते २ यत्रैतेन यज्ञेन यजन्ते । सभेयो युवेत्याह । यो वै पूर्ववयसी ।स सभेयो युवा । तस्माद्युवा पुमान्प्रियो भावुकः । आस्य यजमानस्य वीरो जायतामित्याह । आ ह वै तत्र यजमानस्य वीरो जायते । यत्रैतेन यज्ञेन यजन्ते । निकामेनिकामे नः पर्जन्यो वर्षत्वित्याह । निकामेनिकामे ह वै तत्र पर्जन्यो वर्षति । यत्रैतेन यज्ञेन यजन्ते । फलिन्यो न ओषधयः पच्यन्तामित्याह । फलिन्यो ह वै तत्रौषधयः पच्यन्ते । यत्रैतेन यज्ञेन यजन्ते । योगक्षेमो नः कल्पतामित्याह । कल्पते ह वै तत्र प्रजाभ्यो योगक्षेमः । यत्रैतेन यज्ञेन यजन्ते ३
ā brahmanbrāhmaṇo brahmavarcasī jāyatāmityāha | brāhmaṇa eva brahmavarcasaṃ dadhāti | tasmātpurā brāhmaṇo brahmavarcasyajāyata | āsminrāṣṭre rājanya iṣavyaḥ śūro mahāratho jāyatāmityāha | rājanya eva śauryaṃ mahimānaṃ dadhāti | tasmātpurā rājanya iṣavyaḥ śūro mahāratho'jāyata | dogdhrī dhenurityāha | dhenvāmeva payo dadhāti | tasmātpurā dogdhrī dhenurajāyata | voḍhānaḍvāniyāha 1 anaḍuhyeva vīryaṃ dadhāti | tasmātpurā voḍhānaḍvānajāyata | āśuḥ saptirityāha | aśva eva javaṃ dadhāti | tasmātpurāśuraśvo'jāyata | puraṃdhiryoṣetyāha | yoṣityeva rūpaṃ dadhāti | tasmātstrī yuvatiḥ priyā bhāvukā | jiṣṇū ratheṣṭhā ityāha | ā ha vai tatra jiṣṇū ratheṣṭhā jāyate 2 yatraitena yajñena yajante | sabheyo yuvetyāha | yo vai pūrvavayasī |sa sabheyo yuvā | tasmādyuvā pumānpriyo bhāvukaḥ | āsya yajamānasya vīro jāyatāmityāha | ā ha vai tatra yajamānasya vīro jāyate | yatraitena yajñena yajante | nikāmenikāme naḥ parjanyo varṣatvityāha | nikāmenikāme ha vai tatra parjanyo varṣati | yatraitena yajñena yajante | phalinyo na oṣadhayaḥ pacyantāmityāha | phalinyo ha vai tatrauṣadhayaḥ pacyante | yatraitena yajñena yajante | yogakṣemo naḥ kalpatāmityāha | kalpate ha vai tatra prajābhyo yogakṣemaḥ | yatraitena yajñena yajante 3
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.