प्रजापतिं वा एष ईप्सतीत्याहुः । योऽश्वमेधेन यजत इति । अथो आहुः । सर्वाणि भूतानीति । एकस्मै स्वाहेत्याह । प्रजापतिर्वा एकः । तमेवाप्नोति । एकस्मै स्वाहा द्वाभ्याꣳ स्वाहेत्यभिपूर्वमाहुतीर्जुहोति । अभिपूर्वमेव सुवर्गं लोकमेति । एकोत्तरं जुहोति १ एकवदेव सुवर्गं लोकमेति । संततं जुहोति । सुवर्गस्य लोकस्य संतत्यै । शताय स्वाहेत्याह । शतायुर्वै पुरुषः शतवीर्यः । आयुरेव वीर्यमवरुन्धे । सहस्राय स्वाहेत्याह । आयुर्वै सहस्रम् । आयुरेवावरुन्धे । अयुताय स्वाहा नियुताय स्वाहा प्रयुताय स्वाहेत्याह २ त्रय इमे लोकाः । इमानेव लोकानवरुन्धे । अर्बुदाय स्वाहेत्याह । वाग्वा अर्बुदम् । वाचमेवावरुन्धे । न्यर्बुदाय स्वाहेत्याह । यो वै वाचो भूमा । तन्न्यर्बुदम् । वाच एव भूमानमवरुन्धे । समुद्रा य स्वाहेत्याह ३ समुद्र मेवाप्नोति । मध्याय स्वाहेत्याह । मध्यमेवाप्नोति । अन्ताय स्वाहेत्याह । अन्तमेवाप्नोति । परार्धाय स्वाहेत्याह । परार्धमेवाप्नोति । उषसे स्वाहा व्युष्ट्यै स्वाहेत्याह । रातिर्वा उषाः । अहर्व्युष्टिः । अहोरात्रे एवावरुन्धे । अथो अहोरात्रयोरेव प्रतितिष्ठति । ता यदुभयीर्दिवा वा नक्तं वा जुहुयात् । अहोरात्रे मोहयेत् । उषसे स्वाहा व्युष्ट्यै स्वाहोदेष्यते स्वाहोद्यते स्वाहेत्यनुदिते जुहोति । उदिताय स्वाहा सुवर्गाय स्वाहा लोकाय स्वाहेत्युदिते जुहोति । अहोरात्रयोरव्यतिमोहाय ४
prajāpatiṃ vā eṣa īpsatītyāhuḥ | yo'śvamedhena yajata iti | atho āhuḥ | sarvāṇi bhūtānīti | ekasmai svāhetyāha | prajāpatirvā ekaḥ | tamevāpnoti | ekasmai svāhā dvābhyām̐ svāhetyabhipūrvamāhutīrjuhoti | abhipūrvameva suvargaṃ lokameti | ekottaraṃ juhoti 1 ekavadeva suvargaṃ lokameti | saṃtataṃ juhoti | suvargasya lokasya saṃtatyai | śatāya svāhetyāha | śatāyurvai puruṣaḥ śatavīryaḥ | āyureva vīryamavarundhe | sahasrāya svāhetyāha | āyurvai sahasram | āyurevāvarundhe | ayutāya svāhā niyutāya svāhā prayutāya svāhetyāha 2 traya ime lokāḥ | imāneva lokānavarundhe | arbudāya svāhetyāha | vāgvā arbudam | vācamevāvarundhe | nyarbudāya svāhetyāha | yo vai vāco bhūmā | tannyarbudam | vāca eva bhūmānamavarundhe | samudrā ya svāhetyāha 3 samudra mevāpnoti | madhyāya svāhetyāha | madhyamevāpnoti | antāya svāhetyāha | antamevāpnoti | parārdhāya svāhetyāha | parārdhamevāpnoti | uṣase svāhā vyuṣṭyai svāhetyāha | rātirvā uṣāḥ | aharvyuṣṭiḥ | ahorātre evāvarundhe | atho ahorātrayoreva pratitiṣṭhati | tā yadubhayīrdivā vā naktaṃ vā juhuyāt | ahorātre mohayet | uṣase svāhā vyuṣṭyai svāhodeṣyate svāhodyate svāhetyanudite juhoti | uditāya svāhā suvargāya svāhā lokāya svāhetyudite juhoti | ahorātrayoravyatimohāya 4
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.