देवा वा अश्वमेधे पवमाने । सुवर्गं लोकं न प्राजानन् । तमश्वः प्राजानात् । यदश्वमेधेऽश्वेन मेध्येनोदञ्चो बहिष्पवमानꣳ सर्पन्ति । सुवर्गस्य लोकस्य प्रज्ञात्यै । न वै मनुष्यः सुवर्गं लोकमञ्जसा वेद । अश्वो वै सुवर्गं लोकमञ्जसा वेद । यदुद्गातोद्गायेत् । यथाक्षेत्रज्ञोऽन्येन पथा प्रतिपादयेत् । तादृक्तत् १ उद्गातारमपरुद्ध्य । अश्वमुद्गीथाय वृणीते । यथा क्षेत्रज्ञोऽञ्जसा नयति । एवमेवैनमश्वः सुवर्गं लोकमञ्जसा नयति । पुच्छमन्वारभन्ते । सुवर्गस्य लोकस्य समष्ट्यै । हिं करोति । सामैवाकः । हिं करोति । उद्गीथ एवास्य सः २ वडबा उपरुन्धन्ति । मिथुनत्वाय प्रजात्यै । अथो यथोपगातार उपगायन्ति । तादृगेव तत् । उदगासीदश्वो मेध्य इत्याह । प्राजापत्यो वा अश्वः । प्रजापतिरुद्गीथः । उद्गीथमेवावरुन्धे । अथो ऋक्सामयोरेव प्रतितिष्ठति । हिरण्येनोपाकरोति । ज्योतिर्वै हिरण्यम् । ज्योतिरेव मुखतो दधाति । यजमाने च प्रजासु च । अथो हिरण्यज्योतिरेव यजमानः सुवर्गं लोकमेति ३
devā vā aśvamedhe pavamāne | suvargaṃ lokaṃ na prājānan | tamaśvaḥ prājānāt | yadaśvamedhe'śvena medhyenodañco bahiṣpavamānam̐ sarpanti | suvargasya lokasya prajñātyai | na vai manuṣyaḥ suvargaṃ lokamañjasā veda | aśvo vai suvargaṃ lokamañjasā veda | yadudgātodgāyet | yathākṣetrajño'nyena pathā pratipādayet | tādṛktat 1 udgātāramaparuddhya | aśvamudgīthāya vṛṇīte | yathā kṣetrajño'ñjasā nayati | evamevainamaśvaḥ suvargaṃ lokamañjasā nayati | pucchamanvārabhante | suvargasya lokasya samaṣṭyai | hiṃ karoti | sāmaivākaḥ | hiṃ karoti | udgītha evāsya saḥ 2 vaḍabā uparundhanti | mithunatvāya prajātyai | atho yathopagātāra upagāyanti | tādṛgeva tat | udagāsīdaśvo medhya ityāha | prājāpatyo vā aśvaḥ | prajāpatirudgīthaḥ | udgīthamevāvarundhe | atho ṛksāmayoreva pratitiṣṭhati | hiraṇyenopākaroti | jyotirvai hiraṇyam | jyotireva mukhato dadhāti | yajamāne ca prajāsu ca | atho hiraṇyajyotireva yajamānaḥ suvargaṃ lokameti 3
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.