युञ्जन्ति ब्रध्नमित्याह । असौ वा आदित्यो ब्रध्नः । आदित्यमेवास्मै युनक्ति । अरुषमित्याह । अग्निर्वा अरुषः । अग्निमेवास्मै युनक्ति । चरन्तमित्याह । वायुर्वै चरन् । वायुमेवास्मै युनक्ति । परितस्थुष इत्याह १ इमे वै लोकाः परितस्थुषः । इमनेवास्मै लोकान्युनक्ति । रोचन्ते रोचना दिवीत्याह । नक्षत्राणि वै रोचना दिवि । नक्षत्राण्येवास्मै रोचयति । युञ्जन्त्यस्य काम्येत्याह । कामानेवास्मै युनक्ति । हरी विपक्षसेत्याह । इमे वै हरी विपक्षसा । इमे एवास्मै युनक्ति २ शोणा धृष्णू नृवाहसेत्याह । अहोरात्रे वै नृवाहसा । अहोरात्रे एवास्मै युनक्ति । एता एवास्मै देवता युनक्ति । सुवर्गस्य लोकस्य समष्ट्यै । केतुं कृण्वन्नकेतव इति ध्वजं प्रतिमुञ्चति । यश एवैनꣳ राज्ञां गमयति । जीमूतस्येव भवति प्रतीकमित्याह । यथायजुरेवैतत् । ये ते पन्थानः सवितः पूर्व्यास इत्यध्वर्युर्यजमानं वाचयत्यभिजित्यै ३ परा वा एतस्य यज्ञ एति । यस्य पशुरुपाकृतोऽन्यत्र वेद्या एति । एतꣳ स्तोतरेतेन पथा पुनरश्वमावर्तयासि न इत्याह । वायुर्वै स्तोता । वायुमेवास्य परस्ताद्दधात्यावृत्त्यै । यथा वै हविषो गृहीतस्य स्कन्दति । एवं वा एतदश्वस्य स्कन्दति । यदस्योपाकृतस्य लोमानि शीयन्ते । यद्वालेषु काचानावयन्ति । लोमान्येवास्य तत्संभरन्ति ४ भूर्भुवः सुवरिति प्राजापत्याभिरावयन्ति । प्राजापत्यो वा अश्वः । स्वयैवैनं देवतया समर्धयन्ति । भूरिति महिषी ।भुव इति वावाता । सुवरिति परिवृक्ती ।एषां लोकानामभिजित्यै । हिरण्ययाः काचा भवन्ति । ज्योतिर्वै हिरण्यम् । राष्ट्रमश्वमेधः ५ ज्योतिश्चैवास्मै राष्ट्रं च समीची दधाति । सहस्रं भवन्ति । सहस्रसंमितः सुवर्गो लोकः । सुवर्गस्य लोकस्याभिजित्यै । अप वा एतस्मात्तेज इन्द्रियं पशवः श्रीः क्रामन्ति । योऽश्वमेधेन यजते । वसवस्त्वाञ्जन्तु गायत्रेण छन्दसेति महिष्यभ्यनक्ति । तेजो वा आज्यम् । तेजो गायत्री ।तेजसैवास्मै तेजोऽवरुन्धे ६ रुद्रास्त्वाञ्जन्तु त्रैष्टुभेन छन्दसेति वावाता । तेजो वा आज्यम् । इन्द्रियं त्रिष्टुप् । तेजसैवास्मा इन्द्रियमवरुन्धे । आदित्यास्त्वाञ्जन्तु जागतेन छन्दसेति परिवृक्ती । तेजो वा आज्यम् । पशवो जगती । तेजसैवास्मै पशूनवरुन्धे । पत्नयोऽभ्यञ्जन्ति । श्रिया वा एतद्रूपम् ७ यत्पत्नयः । श्रियमेवास्मिन्तद्दधति । नास्मात्तेज इन्द्रियं पशवः श्रीरपकामन्ति । लाजी३ञ्शाची३न्यशो ममा३ꣳ! इत्यतिरिक्तमन्नमश्वायोपाहरन्ति । प्रजामेवान्नादीं कुर्वते । एतद्देवा अन्नमत्तैतदन्नमद्धि प्रजापत इत्याह । प्रजा-यामेवान्नाद्यं दधते । यदि नावजिघ्रेत् । अग्निः पशुरासीदित्यवघ्रापयेत् । अव हैव जिघ्रति । आक्रान्वाजी क्रमैरत्यक्रमीद्वाजी द्यौस्ते पृष्ठं पृथिवी सधस्थमित्यश्वमनुमन्त्रयते । एषां लोकानामभिजित्यै । समिद्धो अञ्जन्कृदरं मतीनामित्यश्वस्याप्रियो भवन्ति सरूपत्वाय ८
yuñjanti bradhnamityāha | asau vā ādityo bradhnaḥ | ādityamevāsmai yunakti | aruṣamityāha | agnirvā aruṣaḥ | agnimevāsmai yunakti | carantamityāha | vāyurvai caran | vāyumevāsmai yunakti | paritasthuṣa ityāha 1 ime vai lokāḥ paritasthuṣaḥ | imanevāsmai lokānyunakti | rocante rocanā divītyāha | nakṣatrāṇi vai rocanā divi | nakṣatrāṇyevāsmai rocayati | yuñjantyasya kāmyetyāha | kāmānevāsmai yunakti | harī vipakṣasetyāha | ime vai harī vipakṣasā | ime evāsmai yunakti 2 śoṇā dhṛṣṇū nṛvāhasetyāha | ahorātre vai nṛvāhasā | ahorātre evāsmai yunakti | etā evāsmai devatā yunakti | suvargasya lokasya samaṣṭyai | ketuṃ kṛṇvannaketava iti dhvajaṃ pratimuñcati | yaśa evainam̐ rājñāṃ gamayati | jīmūtasyeva bhavati pratīkamityāha | yathāyajurevaitat | ye te panthānaḥ savitaḥ pūrvyāsa ityadhvaryuryajamānaṃ vācayatyabhijityai 3 parā vā etasya yajña eti | yasya paśurupākṛto'nyatra vedyā eti | etam̐ stotaretena pathā punaraśvamāvartayāsi na ityāha | vāyurvai stotā | vāyumevāsya parastāddadhātyāvṛttyai | yathā vai haviṣo gṛhītasya skandati | evaṃ vā etadaśvasya skandati | yadasyopākṛtasya lomāni śīyante | yadvāleṣu kācānāvayanti | lomānyevāsya tatsaṃbharanti 4 bhūrbhuvaḥ suvariti prājāpatyābhirāvayanti | prājāpatyo vā aśvaḥ | svayaivainaṃ devatayā samardhayanti | bhūriti mahiṣī |bhuva iti vāvātā | suvariti parivṛktī |eṣāṃ lokānāmabhijityai | hiraṇyayāḥ kācā bhavanti | jyotirvai hiraṇyam | rāṣṭramaśvamedhaḥ 5 jyotiścaivāsmai rāṣṭraṃ ca samīcī dadhāti | sahasraṃ bhavanti | sahasrasaṃmitaḥ suvargo lokaḥ | suvargasya lokasyābhijityai | apa vā etasmātteja indriyaṃ paśavaḥ śrīḥ krāmanti | yo'śvamedhena yajate | vasavastvāñjantu gāyatreṇa chandaseti mahiṣyabhyanakti | tejo vā ājyam | tejo gāyatrī |tejasaivāsmai tejo'varundhe 6 rudrāstvāñjantu traiṣṭubhena chandaseti vāvātā | tejo vā ājyam | indriyaṃ triṣṭup | tejasaivāsmā indriyamavarundhe | ādityāstvāñjantu jāgatena chandaseti parivṛktī | tejo vā ājyam | paśavo jagatī | tejasaivāsmai paśūnavarundhe | patnayo'bhyañjanti | śriyā vā etadrūpam 7 yatpatnayaḥ | śriyamevāsmintaddadhati | nāsmātteja indriyaṃ paśavaḥ śrīrapakāmanti | lājī3ñśācī3nyaśo mamā3m̐! ityatiriktamannamaśvāyopāharanti | prajāmevānnādīṃ kurvate | etaddevā annamattaitadannamaddhi prajāpata ityāha | prajā-yāmevānnādyaṃ dadhate | yadi nāvajighret | agniḥ paśurāsīdityavaghrāpayet | ava haiva jighrati | ākrānvājī kramairatyakramīdvājī dyauste pṛṣṭhaṃ pṛthivī sadhasthamityaśvamanumantrayate | eṣāṃ lokānāmabhijityai | samiddho añjankṛdaraṃ matīnāmityaśvasyāpriyo bhavanti sarūpatvāya 8
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.