अप वा एतस्मात्प्राणाः क्रामन्ति । योऽश्वमेधेन यजते । प्राणाय स्वाहा व्यानाय स्वाहेति संज्ञप्यमान आहुतीर्जुहोति । प्राणानेवास्मिन्दधाति । नास्मात्प्राणा अपक्रामन्ति । अवन्तीः स्थावन्तीस्त्वावन्तु । प्रियं त्वा प्रियाणाम् । वर्षिष्ठमाप्यानाम् । निधीनां त्वा निधिपतिꣳ हवामहे वसो ममेत्याह । अपैवास्मै तद्ध्नुवते १ अथो धुवन्त्येवैनम् । अथो न्येवास्मै ह्नुवते । त्रिः परियन्ति त्रय इमे लोकाः । एभ्य एवैनं लोकेभ्यो धुवते । त्रिः पुनः परियन्ति । षट्संपद्यन्ते । षड्वा ऋतवः । ऋतुभिरेवैनं धुवते । अप वा एतेभ्यः प्राणाः क्रामन्ति २ ये यज्ञे धुवनं तन्वते । नवकृत्वः परियन्ति । नव वै पूरुषे प्राणाः । प्राणानेवात्मन्दधते । नैभ्यः प्राणा अपक्रामन्ति । अम्बे अम्बाल्यम्बिक इति पत्नीमुदानयति । अह्वतैवैनाम् । सुभगे काम्पीलवासिनीत्याह । तप एवैनामुपनयति । सुवर्गे लोके सं प्रोर्ण्वाथामित्याह ३ सुवर्गमेवैनां लोकं गमयति । आहमजानि गर्भधमा त्वमजासि गर्भधमित्याह । प्रजा वै पशवो गर्भः । प्रजामेव पशूनात्मन्धत्ते । देवा वा अश्वमेधे पवमाने । सुवर्गं लोकं न प्राजानन् । तमश्वः प्राजानात् । यत्सूचीभिरसिपथान्कल्पयन्ति । सुवर्गस्य लोकस्य प्रज्ञात्यै । गायत्री त्रिष्टुब्जगतीत्याह ४ यथायजुरेवैतत् । त्रय्यः सूच्यो भवन्ति । अयस्मय्यो रजता हरिण्यः । अस्य वै लोकस्य रूपमयस्मय्यः । अन्तरिक्षस्य रजताः । दिवो हरिण्यः । दिशो वा अयस्मय्यः । अवान्तरदिशा रजताः । ऊर्ध्वा हरिण्यः । दिश एवास्मै कल्पयति । कस्त्वा छ्यति कस्त्वा विशास्तीत्याहाहिꣳसायै ५
apa vā etasmātprāṇāḥ krāmanti | yo'śvamedhena yajate | prāṇāya svāhā vyānāya svāheti saṃjñapyamāna āhutīrjuhoti | prāṇānevāsmindadhāti | nāsmātprāṇā apakrāmanti | avantīḥ sthāvantīstvāvantu | priyaṃ tvā priyāṇām | varṣiṣṭhamāpyānām | nidhīnāṃ tvā nidhipatim̐ havāmahe vaso mametyāha | apaivāsmai taddhnuvate 1 atho dhuvantyevainam | atho nyevāsmai hnuvate | triḥ pariyanti traya ime lokāḥ | ebhya evainaṃ lokebhyo dhuvate | triḥ punaḥ pariyanti | ṣaṭsaṃpadyante | ṣaḍvā ṛtavaḥ | ṛtubhirevainaṃ dhuvate | apa vā etebhyaḥ prāṇāḥ krāmanti 2 ye yajñe dhuvanaṃ tanvate | navakṛtvaḥ pariyanti | nava vai pūruṣe prāṇāḥ | prāṇānevātmandadhate | naibhyaḥ prāṇā apakrāmanti | ambe ambālyambika iti patnīmudānayati | ahvataivainām | subhage kāmpīlavāsinītyāha | tapa evaināmupanayati | suvarge loke saṃ prorṇvāthāmityāha 3 suvargamevaināṃ lokaṃ gamayati | āhamajāni garbhadhamā tvamajāsi garbhadhamityāha | prajā vai paśavo garbhaḥ | prajāmeva paśūnātmandhatte | devā vā aśvamedhe pavamāne | suvargaṃ lokaṃ na prājānan | tamaśvaḥ prājānāt | yatsūcībhirasipathānkalpayanti | suvargasya lokasya prajñātyai | gāyatrī triṣṭubjagatītyāha 4 yathāyajurevaitat | trayyaḥ sūcyo bhavanti | ayasmayyo rajatā hariṇyaḥ | asya vai lokasya rūpamayasmayyaḥ | antarikṣasya rajatāḥ | divo hariṇyaḥ | diśo vā ayasmayyaḥ | avāntaradiśā rajatāḥ | ūrdhvā hariṇyaḥ | diśa evāsmai kalpayati | kastvā chyati kastvā viśāstītyāhāhim̐sāyai 5
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.