ऐन्द्रम् एकादशकपालं निर् वपेन् मारुतꣳ सप्तकपालं ग्रामकामः । इन्द्रं चैव मरुतश् च स्वेन भागधेयेनोप धावति त एवास्मै सजातान् प्र यच्छन्ति ग्राम्य् एव भवति । आहवनीय ऐन्द्रम् अधि श्रयति गार्हपत्ये मारुतम् पापवस्यसस्य विधृत्यै सप्तकपालो मारुतो भवति सप्तगणा वै मरुतः । गणश एवास्मै सजातान् अव रुन्द्धे । अनूच्यमान आ सादयति विशम् एव अस्मा अनुवर्त्मानं करोति । एताम् एव निर् वपेद् यः कामयेत क्षत्राय च विशे च समदं दध्याम् इति । ऐन्द्रस्यावद्यन् ब्रूयात् । इन्द्रायानु ब्रूहीत्य् आश्राव्य ब्रूयात् । मरुतो यजेति मारुतस्यावद्यन् ब्रूयात् । मरुद्भ्यो ऽनु ब्रूहीत्य् आश्राव्य ब्रूयात् । इन्द्रं यजेति स्व एवैभ्यो भागधेये समदं दधाति वितृꣳहाणास् तिष्ठन्ति । एताम् एव निर् वपेद् यः कामयेत कल्पेरन्न् इति यथादेवतम् अवदाय यथादेवतं यजेत् । भागधेयेनैवैनान् यथायथं कल्पयति कल्पन्त एव । ऐन्द्रम् एकादशकपालं निर् वपेद् वैश्वदेवं द्वादशकपालं ग्रामकामः । इन्द्रं चैव विश्वाꣳश् च देवान्त् स्वेन भागधेयेनोप धावति त एवास्मै सजातान् प्र यच्छन्ति ग्राम्य् एव भवति । ऐन्द्रस्यावदाय वैश्वदेवस्याव द्येद् अथैन्द्रस्य उपरिष्टात् । इन्द्रियेणैवास्मा उभयतः सजातान् परि गृह्णाति । उपाधाय्यपूर्वयं वासो दक्षिणा सजातानाम् उपहित्यै पृश्नियै दुग्धे प्रैयंगवं चरुं निर् वपेन् मरुद्भ्यो ग्रामकामः पृश्नियै वै पयसो मरुतो जाताः पृश्नियै प्रियंगवः । मारुताः खलु वै देवतया सजाताः । मरुत एव स्वेन भागधेयेनोप धावति त एवास्मै सजातान् प्र यच्छन्ति ग्राम्य् एव भवति प्रियवती याज्यानुवाक्ये भवतः प्रियम् एवैनꣳ समानानां करोति द्विपदा पुरोऽनुवाक्या भवति द्विपद एवाव रुन्द्धे चतुष्पदा याज्या चतुष्पद एव पशून् अव रुन्द्धे देवासुराः संयत्ता आसन् ते देवा मिथो विप्रिया आसन् ते ऽन्योऽन्यस्मै ज्यैष्ठ्यायातिष्ठमानाश् चतुर्धा व्यक्रामन्न् अग्निर् वसुभिः सोमो रुद्रैर् इन्द्रो मरुद्भिर् वरुण आदित्यैः स इन्द्रः प्रजापतिम् उपाधावत् तम् एतया संज्ञान्याऽयाजयत् । अग्नये वसुमते पुरोडाशम् अष्टाकपालं निर् अवपत् सोमाय रुद्रवते चरुम् इन्द्राय मरुत्वते पुरोडाशम् एकादशकपालं वरुणायादित्यवते चरुम् । ततो वा इन्द्रं देवा ज्यैष्ठ्यायाभि सम् अजानत यः समानैर् मिथो विप्रियः स्यात् तम् एतया संज्ञान्या याजयेत् । अग्नये वसुमते पुरोडाशम् अष्टाकपालं निर् वपेत् सोमाय रुद्रवते चरुम् इन्द्राय मरुत्वते पुरोडाशम् एकादशकपालं वरुणायादित्यवते चरुम् इन्द्रम् एवैनम् भूतं ज्यैष्ठ्याय समाना अभि सं जानते वसिष्ठः समानानाम् भवति ॥
aindram ekādaśakapālaṃ nir vapen mārutam̐ saptakapālaṃ grāmakāmaḥ | indraṃ caiva marutaś ca svena bhāgadheyenopa dhāvati ta evāsmai sajātān pra yacchanti grāmy eva bhavati | āhavanīya aindram adhi śrayati gārhapatye mārutam pāpavasyasasya vidhṛtyai saptakapālo māruto bhavati saptagaṇā vai marutaḥ | gaṇaśa evāsmai sajātān ava runddhe | anūcyamāna ā sādayati viśam eva asmā anuvartmānaṃ karoti | etām eva nir vaped yaḥ kāmayeta kṣatrāya ca viśe ca samadaṃ dadhyām iti | aindrasyāvadyan brūyāt | indrāyānu brūhīty āśrāvya brūyāt | maruto yajeti mārutasyāvadyan brūyāt | marudbhyo 'nu brūhīty āśrāvya brūyāt | indraṃ yajeti sva evaibhyo bhāgadheye samadaṃ dadhāti vitṛm̐hāṇās tiṣṭhanti | etām eva nir vaped yaḥ kāmayeta kalperann iti yathādevatam avadāya yathādevataṃ yajet | bhāgadheyenaivainān yathāyathaṃ kalpayati kalpanta eva | aindram ekādaśakapālaṃ nir vaped vaiśvadevaṃ dvādaśakapālaṃ grāmakāmaḥ | indraṃ caiva viśvām̐ś ca devānt svena bhāgadheyenopa dhāvati ta evāsmai sajātān pra yacchanti grāmy eva bhavati | aindrasyāvadāya vaiśvadevasyāva dyed athaindrasya upariṣṭāt | indriyeṇaivāsmā ubhayataḥ sajātān pari gṛhṇāti | upādhāyyapūrvayaṃ vāso dakṣiṇā sajātānām upahityai pṛśniyai dugdhe praiyaṃgavaṃ caruṃ nir vapen marudbhyo grāmakāmaḥ pṛśniyai vai payaso maruto jātāḥ pṛśniyai priyaṃgavaḥ | mārutāḥ khalu vai devatayā sajātāḥ | maruta eva svena bhāgadheyenopa dhāvati ta evāsmai sajātān pra yacchanti grāmy eva bhavati priyavatī yājyānuvākye bhavataḥ priyam evainam̐ samānānāṃ karoti dvipadā puro'nuvākyā bhavati dvipada evāva runddhe catuṣpadā yājyā catuṣpada eva paśūn ava runddhe devāsurāḥ saṃyattā āsan te devā mitho vipriyā āsan te 'nyo'nyasmai jyaiṣṭhyāyātiṣṭhamānāś caturdhā vyakrāmann agnir vasubhiḥ somo rudrair indro marudbhir varuṇa ādityaiḥ sa indraḥ prajāpatim upādhāvat tam etayā saṃjñānyā'yājayat | agnaye vasumate puroḍāśam aṣṭākapālaṃ nir avapat somāya rudravate carum indrāya marutvate puroḍāśam ekādaśakapālaṃ varuṇāyādityavate carum | tato vā indraṃ devā jyaiṣṭhyāyābhi sam ajānata yaḥ samānair mitho vipriyaḥ syāt tam etayā saṃjñānyā yājayet | agnaye vasumate puroḍāśam aṣṭākapālaṃ nir vapet somāya rudravate carum indrāya marutvate puroḍāśam ekādaśakapālaṃ varuṇāyādityavate carum indram evainam bhūtaṃ jyaiṣṭhyāya samānā abhi saṃ jānate vasiṣṭhaḥ samānānām bhavati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.