अग्नये पथिकृते पुरोडाशम् अष्टाकपालं निर् वपेद् यो दर्शपूर्णमासयाजी सन्न् अमावास्यां वा पौर्णमासीं वातिपादयेत् पथो वा एषो ऽध्य् अपथेनैति यो दर्शपूर्णमासयाजी सन्न् अमावास्यां वा पौर्णमासीं वातिपादयति । अग्निम् एव पथिकृतꣳ स्वेन भागधेयेनोप धावति स एवैनम् अपथात् पन्थाम् अपि नयति । अनड्वान् दक्षिणा वही ह्य् { एष ^ एषस् } समृद्ध्यै । अग्नये व्रतपतये पुरोडाशम् अष्टाकपालं निर् वपेद् य आहिताग्निः सन्न् अव्रत्यम् इव चरेत् । अग्निम् एव व्रतपतिꣳ स्वेन भागधेयेनोप धावति स एवैनं व्रतम् आ लम्भयति व्रत्यो भवति । अग्नये रक्षोघ्ने पुरोडाशम् अष्टाकपालं निर् वपति यꣳ रक्षाꣳसि सचेरन् । अग्निम् एव रक्षोहणꣳ स्वेन भागधेयेनोप धावति स एवास्माद् रक्षाꣳस्य् अप हन्ति । निशितायां निर् वपेत् । निशितायाꣳ हि रक्षाꣳसि प्रेरते । सम्प्रेर्णान्य् एवैनानि हन्ति । परिश्रिते याजयेद् रक्षसाम् अनन्ववचाराय रक्षोघ्नी याज्यानुवाक्ये भवतो रक्षसाꣳ स्तृत्यै । अग्नये रुद्रवते पुरोडाशम् अष्टाकपालं निर् वपेद् अभिचरन् । एषा वा अस्य घोरा तनूर् यद् रुद्रस् तस्मा एवैनम् आ वृश्चति ताजग् आर्तिम् आर्छति । अग्नये सुरभिमते पुरोडाशम् अष्टाकपालं निर् वपेद् यस्य गावो वा पुरुषाः वा प्रमीयेरन् यो वा बिभीयात् । एषा वा अस्य भेषज्या तनूर् यत् सुरभिमती तयैवास्मै भेषजं करोति सुरभिमते भवति पूतीगन्धस्यापहत्यै । अग्नये क्षामवते पुरोडाशम् अष्टाकपालं निर् वपेत् संग्रामे संयत्ते भागधेयेनैवैनꣳ शमयित्वा परान् अभि निर् दिशति यम् अवरेषां विध्यन्ति जीवति स यम् परेषाम् प्र स मीयते जयति तꣳ संग्रामम् । अभि वा एष एतान् उच्यति येषाम् पूर्वापरा अन्वञ्चः प्रमीयन्ते पुरुषाहुतिर् ह्य् अस्य प्रियतमाग्नये क्षामवते पुरोडाशम् अष्टाकपालं निर् वपेत् । भागधेयेनैवैनꣳ शमयति नैषाम् पुराऽऽयुषोऽपरः प्र मीयते । अभि वा एष एतस्य गृहान् उच्यति यस्य गृहान् दहति । अग्नये क्षामवते पुरोडाशम् अष्टाकपालं निर् वपेत् । भागधेयेनैवैनꣳ शमयति नास्यापरं गृहान् दहति ॥
agnaye pathikṛte puroḍāśam aṣṭākapālaṃ nir vaped yo darśapūrṇamāsayājī sann amāvāsyāṃ vā paurṇamāsīṃ vātipādayet patho vā eṣo 'dhy apathenaiti yo darśapūrṇamāsayājī sann amāvāsyāṃ vā paurṇamāsīṃ vātipādayati | agnim eva pathikṛtam̐ svena bhāgadheyenopa dhāvati sa evainam apathāt panthām api nayati | anaḍvān dakṣiṇā vahī hy { eṣa ^ eṣas } samṛddhyai | agnaye vratapataye puroḍāśam aṣṭākapālaṃ nir vaped ya āhitāgniḥ sann avratyam iva caret | agnim eva vratapatim̐ svena bhāgadheyenopa dhāvati sa evainaṃ vratam ā lambhayati vratyo bhavati | agnaye rakṣoghne puroḍāśam aṣṭākapālaṃ nir vapati yam̐ rakṣām̐si saceran | agnim eva rakṣohaṇam̐ svena bhāgadheyenopa dhāvati sa evāsmād rakṣām̐sy apa hanti | niśitāyāṃ nir vapet | niśitāyām̐ hi rakṣām̐si prerate | samprerṇāny evaināni hanti | pariśrite yājayed rakṣasām ananvavacārāya rakṣoghnī yājyānuvākye bhavato rakṣasām̐ stṛtyai | agnaye rudravate puroḍāśam aṣṭākapālaṃ nir vaped abhicaran | eṣā vā asya ghorā tanūr yad rudras tasmā evainam ā vṛścati tājag ārtim ārchati | agnaye surabhimate puroḍāśam aṣṭākapālaṃ nir vaped yasya gāvo vā puruṣāḥ vā pramīyeran yo vā bibhīyāt | eṣā vā asya bheṣajyā tanūr yat surabhimatī tayaivāsmai bheṣajaṃ karoti surabhimate bhavati pūtīgandhasyāpahatyai | agnaye kṣāmavate puroḍāśam aṣṭākapālaṃ nir vapet saṃgrāme saṃyatte bhāgadheyenaivainam̐ śamayitvā parān abhi nir diśati yam avareṣāṃ vidhyanti jīvati sa yam pareṣām pra sa mīyate jayati tam̐ saṃgrāmam | abhi vā eṣa etān ucyati yeṣām pūrvāparā anvañcaḥ pramīyante puruṣāhutir hy asya priyatamāgnaye kṣāmavate puroḍāśam aṣṭākapālaṃ nir vapet | bhāgadheyenaivainam̐ śamayati naiṣām purā''yuṣo'paraḥ pra mīyate | abhi vā eṣa etasya gṛhān ucyati yasya gṛhān dahati | agnaye kṣāmavate puroḍāśam aṣṭākapālaṃ nir vapet | bhāgadheyenaivainam̐ śamayati nāsyāparaṃ gṛhān dahati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.