अग्नये कामाय पुरोडाशम् अष्टाकपालं निर् वपेद् यं कामो नोपनमेत् । अग्निम् एव कामꣳ स्वेन भागधेयेनोप धावति स एवैनं कामेन सम् अर्धयति । उपैनं कामो नमति । अग्नये यविष्ठाय पुरोडाशम् अष्टाकपालं निर् वपेत् स्पर्धमानः क्षेत्रे वा सजातेषु वा । अग्निम् एव यविष्ठꣳ स्वेन भागधेयेनोप धावति तेनैवेन्द्रियं वीर्यम् भ्रातृव्यस्य युवते । वि पाप्मना भ्रातृव्येण जयते । अग्नये यविष्ठाय पुरोडाशम् अष्टाकपालं निर् वपेद् अभिचर्यमाणः । अग्निम् एव यविष्ठꣳ स्वेन भागधेयेनोप धावति स एवास्माद् रक्षाꣳसि यवयति नैनम् अभिचरन्त् स्तृणुते । अग्नय आयुष्मते पुरोडाशम् अष्टाकपालं निर् वपेद् यः कामयेत सर्वम् आयुर् इयाम् इति । अग्निम् एवायुष्मन्तꣳ स्वेन भागधेयेनोप धावति स एवास्मिन् आयुर् दधाति । सर्वम् आयुर् एति । अग्नये जातवेदसे पुरोडाशम् अष्टाकपालं निर् वपेद् भूतिकामः । अग्निम् एव जातवेदसꣳ स्वेन भागधेयेनोप धावति स एवैनम् भूतिं गमयति भवत्य् एव । अग्नये रुक्मते पुरोडाशम् अष्टाकपालं निर् वपेद् रुक्कामः । अग्निम् एव रुक्मन्तꣳ स्वेन भागधेयेनोप धावति स एवास्मिन् रुचं दधाति रोचत एव । अग्नये तेजस्वते पुरोडाशम् अष्टाकपालं निर् वपेत् तेजस्कामः । अग्निम् एव तेजस्वन्तꣳ स्वेन भागधेयेनोप धावति स एवास्मिन् तेजो दधाति तेजस्व्य् एव भवति । अग्नये साहन्त्याय पुरोडाशम् अष्टाकपालं निर् वपेत् सीक्षमाणः । अग्निम् एव साहन्त्यꣳ स्वेन भागधेयेनोप धावति तेनैव सहते यꣳ सीक्षते ॥
agnaye kāmāya puroḍāśam aṣṭākapālaṃ nir vaped yaṃ kāmo nopanamet | agnim eva kāmam̐ svena bhāgadheyenopa dhāvati sa evainaṃ kāmena sam ardhayati | upainaṃ kāmo namati | agnaye yaviṣṭhāya puroḍāśam aṣṭākapālaṃ nir vapet spardhamānaḥ kṣetre vā sajāteṣu vā | agnim eva yaviṣṭham̐ svena bhāgadheyenopa dhāvati tenaivendriyaṃ vīryam bhrātṛvyasya yuvate | vi pāpmanā bhrātṛvyeṇa jayate | agnaye yaviṣṭhāya puroḍāśam aṣṭākapālaṃ nir vaped abhicaryamāṇaḥ | agnim eva yaviṣṭham̐ svena bhāgadheyenopa dhāvati sa evāsmād rakṣām̐si yavayati nainam abhicarant stṛṇute | agnaya āyuṣmate puroḍāśam aṣṭākapālaṃ nir vaped yaḥ kāmayeta sarvam āyur iyām iti | agnim evāyuṣmantam̐ svena bhāgadheyenopa dhāvati sa evāsmin āyur dadhāti | sarvam āyur eti | agnaye jātavedase puroḍāśam aṣṭākapālaṃ nir vaped bhūtikāmaḥ | agnim eva jātavedasam̐ svena bhāgadheyenopa dhāvati sa evainam bhūtiṃ gamayati bhavaty eva | agnaye rukmate puroḍāśam aṣṭākapālaṃ nir vaped rukkāmaḥ | agnim eva rukmantam̐ svena bhāgadheyenopa dhāvati sa evāsmin rucaṃ dadhāti rocata eva | agnaye tejasvate puroḍāśam aṣṭākapālaṃ nir vapet tejaskāmaḥ | agnim eva tejasvantam̐ svena bhāgadheyenopa dhāvati sa evāsmin tejo dadhāti tejasvy eva bhavati | agnaye sāhantyāya puroḍāśam aṣṭākapālaṃ nir vapet sīkṣamāṇaḥ | agnim eva sāhantyam̐ svena bhāgadheyenopa dhāvati tenaiva sahate yam̐ sīkṣate ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.