देवा वै सत्त्रम् आसत ऋद्धिपरिमितं यशस्कामास् तेषाꣳ सोमꣳ राजानं यश आर्छत् स गिरिम् उद् ऐत् तम् अग्निर् अनूद् ऐत् ताव् अग्नीषोमौ सम् अभवताम् । ताव् इन्द्रो यज्ञविभ्रष्टो ऽनु परैत् ताव् अब्रवीत् । याजयतम् मेति तस्मा एताम् इष्टिं निर् अवपताम् आग्नेयम् अष्टाकपालम् ऐन्द्रम् एकादशकपालꣳ सौम्यं चरुम् । तयैवास्मिन् तेजः इन्द्रियम् ब्रह्मवर्चसम् अधत्त्ताम् । यो यज्ञविभ्रष्टः स्यात् तस्मा एताम् इष्टिं निर् वपेत् । आग्नेयम् अष्टाकपालम् ऐन्द्रम् एकादशकपालꣳ सौम्यं चरुम् । यद् आग्नेयो भवति तेज एवास्मिन् तेन दधाति यद् ऐन्द्रो भवतीन्द्रियम् एवास्मिन् तेन दधाति यत् सौम्यो ब्रह्मवर्चसं तेन । आग्नेयस्य च सौम्यस्य चैन्द्रे समाश्लेषयेत् तेजश् चैवास्मिन् ब्रह्मवर्चसं च समीची दधाति । अग्नीषोमीयम् एकादशकपालं निर् वपेद् यं कामो नोपनमेत् । आग्नेयो वै ब्राह्मणः स सोमम् पिबति स्वाम् एव देवताꣳ स्वेन भागधेयेनोप धावति सैवैनं कामेन सम् अर्धयति । उपैनं कामो नमति । अग्नीषोमीयम् अष्टाकपालं निर् वपेद् ब्रह्मवर्चसकामः । अग्नीषोमाव् एव स्वेन भागधेयेनोप धावति ताव् एवास्मिन् ब्रह्मवर्चसं धत्तः । ब्रह्मवर्चस्य् एव भवति यद् अष्टाकपालस् तेनाग्नेयश् । यच् छ्यामाकस् तेन सौम्यः समृद्ध्यै सोमाय वाजिने श्यामाकं चरुं निर् वपेद् यः क्लैब्याद् बिभीयात् । रेतो हि वा एतस्माद् वाजिनम् अपक्रामत्य् अथैष क्लैब्याद् बिभाय सोमम् एव वाजिनꣳ स्वेन भागधेयेनोप धावति स एवास्मिन् रेतो वाजिनं दधाति न क्लीबो भवति ब्राह्मणस्पत्यम् एकादशकपालं निर् वपेद् ग्रामकामः ब्रह्मणस् पतिम् एव स्वेन भागधेयेनोप धावति स एवास्मै सजातान् प्र यच्छति ग्राम्य् एव भवति गणवती याज्यानुवाक्ये भवतः सजातैर् एवैनं गणवन्तं करोति । एताम् एव निर् वपेद् यः कामयेत ब्रह्मन् विशं वि नाशयेयम् इति मारुती याज्यानुवाक्ये कुर्यात् । ब्रह्मन्न् एव विशं वि नाशयति ॥
devā vai sattram āsata ṛddhiparimitaṃ yaśaskāmās teṣām̐ somam̐ rājānaṃ yaśa ārchat sa girim ud ait tam agnir anūd ait tāv agnīṣomau sam abhavatām | tāv indro yajñavibhraṣṭo 'nu parait tāv abravīt | yājayatam meti tasmā etām iṣṭiṃ nir avapatām āgneyam aṣṭākapālam aindram ekādaśakapālam̐ saumyaṃ carum | tayaivāsmin tejaḥ indriyam brahmavarcasam adhatttām | yo yajñavibhraṣṭaḥ syāt tasmā etām iṣṭiṃ nir vapet | āgneyam aṣṭākapālam aindram ekādaśakapālam̐ saumyaṃ carum | yad āgneyo bhavati teja evāsmin tena dadhāti yad aindro bhavatīndriyam evāsmin tena dadhāti yat saumyo brahmavarcasaṃ tena | āgneyasya ca saumyasya caindre samāśleṣayet tejaś caivāsmin brahmavarcasaṃ ca samīcī dadhāti | agnīṣomīyam ekādaśakapālaṃ nir vaped yaṃ kāmo nopanamet | āgneyo vai brāhmaṇaḥ sa somam pibati svām eva devatām̐ svena bhāgadheyenopa dhāvati saivainaṃ kāmena sam ardhayati | upainaṃ kāmo namati | agnīṣomīyam aṣṭākapālaṃ nir vaped brahmavarcasakāmaḥ | agnīṣomāv eva svena bhāgadheyenopa dhāvati tāv evāsmin brahmavarcasaṃ dhattaḥ | brahmavarcasy eva bhavati yad aṣṭākapālas tenāgneyaś | yac chyāmākas tena saumyaḥ samṛddhyai somāya vājine śyāmākaṃ caruṃ nir vaped yaḥ klaibyād bibhīyāt | reto hi vā etasmād vājinam apakrāmaty athaiṣa klaibyād bibhāya somam eva vājinam̐ svena bhāgadheyenopa dhāvati sa evāsmin reto vājinaṃ dadhāti na klībo bhavati brāhmaṇaspatyam ekādaśakapālaṃ nir vaped grāmakāmaḥ brahmaṇas patim eva svena bhāgadheyenopa dhāvati sa evāsmai sajātān pra yacchati grāmy eva bhavati gaṇavatī yājyānuvākye bhavataḥ sajātair evainaṃ gaṇavantaṃ karoti | etām eva nir vaped yaḥ kāmayeta brahman viśaṃ vi nāśayeyam iti mārutī yājyānuvākye kuryāt | brahmann eva viśaṃ vi nāśayati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.