अर्यम्णे चरुं निर् वपेत् सुवर्गकामः । असौ वा आदित्यो ऽर्यमा । अर्यमणम् एव स्वेन भागधेयेनोप धावति स एवैनꣳ सुवर्गं लोकं गमयति । अर्यम्णे चरुं निर् वपेद् यः कामयेत दानकामा मे प्रजाः स्युर् इति । असौ वा आदित्यो ऽर्यमा यः खलु वै ददाति सो ऽर्यमा । अर्यमणम् एव स्वेन भागधेयेनोप धावति स एव अस्मै दानकामाः प्रजाः करोति दानकामा अस्मै प्रजा भवन्ति । अर्यम्णे चरुं निर् वपेद् यः कामयेत स्वस्ति जनताम् इयाम् इति । असौ वा आदित्यो ऽर्यमा । अर्यमणम् एव स्वेन भागधेयेनोप धावति स एवैनं तद् गमयति यत्र जिगमिषति । इन्द्रो वै देवानाम् आनुजावर आसीत् स प्रजापतिम् उपाधावत् तस्मा एतम् ऐन्द्रम् आनुषूकम् एकादशकपालं निः अवपत् तेनैवैनम् अग्रं देवतानाम् पर्यणयत् । बुध्नवती अग्रवती याज्यानुवाक्ये अकरोद् बुध्नाद् एवैनम् अग्रम् पर्यणयत् । यो राजन्य आनुजावरः स्यात् तस्मा एतम् ऐन्द्रम् आनुषूकम् एकादशकपालं निर् वपेत् । इन्द्रम् एव स्वेन भागधेयेनोप धावति स एवैनम् अग्रꣳ समानानाम् परि णयति बुध्नवती अग्रवती याज्यानुवाक्ये भवतो बुध्नाद् एवैनम् अग्रम् परि णयति । आनुषूको भवत्य् एषा ह्य् एतस्य देवता य आनुजावरः समृद्ध्यै यो ब्राह्मण आनुजावरः स्यात् तस्मा एतम् बार्हस्पत्यम् आनुषूकं चरुं निर् वपेत् । बृहस्पतिम् एव स्वेन भागधेयेनोप धावति स एवैनम् अग्रꣳ समानानाम् परि णयति बुध्नवती अग्रवती याज्यानुवाक्ये भवतो बुध्नाद् एवैनम् अग्रम् परि णयति । आनुषूको भवत्य् एषा ह्य् एतस्य देवता य आनुजावरः समृद्ध्यै ॥
aryamṇe caruṃ nir vapet suvargakāmaḥ | asau vā ādityo 'ryamā | aryamaṇam eva svena bhāgadheyenopa dhāvati sa evainam̐ suvargaṃ lokaṃ gamayati | aryamṇe caruṃ nir vaped yaḥ kāmayeta dānakāmā me prajāḥ syur iti | asau vā ādityo 'ryamā yaḥ khalu vai dadāti so 'ryamā | aryamaṇam eva svena bhāgadheyenopa dhāvati sa eva asmai dānakāmāḥ prajāḥ karoti dānakāmā asmai prajā bhavanti | aryamṇe caruṃ nir vaped yaḥ kāmayeta svasti janatām iyām iti | asau vā ādityo 'ryamā | aryamaṇam eva svena bhāgadheyenopa dhāvati sa evainaṃ tad gamayati yatra jigamiṣati | indro vai devānām ānujāvara āsīt sa prajāpatim upādhāvat tasmā etam aindram ānuṣūkam ekādaśakapālaṃ niḥ avapat tenaivainam agraṃ devatānām paryaṇayat | budhnavatī agravatī yājyānuvākye akarod budhnād evainam agram paryaṇayat | yo rājanya ānujāvaraḥ syāt tasmā etam aindram ānuṣūkam ekādaśakapālaṃ nir vapet | indram eva svena bhāgadheyenopa dhāvati sa evainam agram̐ samānānām pari ṇayati budhnavatī agravatī yājyānuvākye bhavato budhnād evainam agram pari ṇayati | ānuṣūko bhavaty eṣā hy etasya devatā ya ānujāvaraḥ samṛddhyai yo brāhmaṇa ānujāvaraḥ syāt tasmā etam bārhaspatyam ānuṣūkaṃ caruṃ nir vapet | bṛhaspatim eva svena bhāgadheyenopa dhāvati sa evainam agram̐ samānānām pari ṇayati budhnavatī agravatī yājyānuvākye bhavato budhnād evainam agram pari ṇayati | ānuṣūko bhavaty eṣā hy etasya devatā ya ānujāvaraḥ samṛddhyai ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.