परिभूर् अग्निम् परिभूर् इन्द्रम् परिभूर् विश्वान् देवान् परिभूर् माꣳ सह ब्रह्मवर्चसेन स नः पवस्व शं गवे शं जनाय शम् अर्वते शꣳ राजन्न् ओषधीभ्यो ऽछिन्नस्य ते रयिपते सुवीर्यस्य रायस् पोषस्य ददितारः स्याम । तस्य मे रास्व तस्य ते भक्षीय तस्य त इदम् उन् मृजे ॥ प्राणाय मे वर्चोदा वर्चसे पवस्व । अपानाय व्यानाय वाचे दक्षक्रतुभ्याम् । चक्षुर्भ्याम् मे वर्चोदौ वर्चसे पवेथाम् । श्रोत्राय । आत्मने । अङ्गेभ्यः । आयुषे वीर्याय विष्णोः । इन्द्रस्य विश्वेषां देवानां जठरम् असि वर्चोदा मे वर्चसे पवस्व को ऽसि को नाम कस्मै त्वा काय त्वा यं त्वा सोमेनातीतृपं यं त्वा सोमेनामीमदꣳ सुप्रजाः प्रजया भूयासꣳ सुवीरो वीरैः सुवर्चा वर्चसा सुपोषः पोषैर् विश्वेभ्यो मे रूपेभ्यो वर्चोदाः वर्चसे पवस्व तस्य मे रास्व तस्य ते भक्षीय तस्य त इदम् उन् मृजे ॥ बुभूषन्न् अवेक्षेतैष वै पात्रियः प्रजापतिर् यज्ञः प्रजापतिस् तम् एव तर्पयति स एनं तृप्तो भूत्याभिपवते ब्रह्मवर्चसकामो ऽवेक्षेतैष वै पात्रियः प्रजापतिर् यज्ञः प्रजापतिस् तम् एव तर्पयति स एनं तृप्तो ब्रह्मवर्चसेनाभि पवत आमयावी अवेक्षेतैष वै पात्रियः प्रजापतिर् यज्ञः प्रजापतिस् तम् एव तर्पयति स एनं तृप्त आयुषाभि पवते । अभिचरन्न् अवेक्षेतैष वै पात्रियः प्रजापतिर् यज्ञः प्रजापतिस् तम् एव तर्पयति स एनं तृप्तः प्राणापानाभ्यां वाचो दक्षक्रतुभ्यां चक्षुर्भ्याꣳ श्रोत्राभ्याम् आत्मनो ऽङ्गेभ्य आयुषो ऽन्तर् एति ताजक् प्र धन्वति ॥
paribhūr agnim paribhūr indram paribhūr viśvān devān paribhūr mām̐ saha brahmavarcasena sa naḥ pavasva śaṃ gave śaṃ janāya śam arvate śam̐ rājann oṣadhībhyo 'chinnasya te rayipate suvīryasya rāyas poṣasya daditāraḥ syāma | tasya me rāsva tasya te bhakṣīya tasya ta idam un mṛje || prāṇāya me varcodā varcase pavasva | apānāya vyānāya vāce dakṣakratubhyām | cakṣurbhyām me varcodau varcase pavethām | śrotrāya | ātmane | aṅgebhyaḥ | āyuṣe vīryāya viṣṇoḥ | indrasya viśveṣāṃ devānāṃ jaṭharam asi varcodā me varcase pavasva ko 'si ko nāma kasmai tvā kāya tvā yaṃ tvā somenātītṛpaṃ yaṃ tvā somenāmīmadam̐ suprajāḥ prajayā bhūyāsam̐ suvīro vīraiḥ suvarcā varcasā supoṣaḥ poṣair viśvebhyo me rūpebhyo varcodāḥ varcase pavasva tasya me rāsva tasya te bhakṣīya tasya ta idam un mṛje || bubhūṣann avekṣetaiṣa vai pātriyaḥ prajāpatir yajñaḥ prajāpatis tam eva tarpayati sa enaṃ tṛpto bhūtyābhipavate brahmavarcasakāmo 'vekṣetaiṣa vai pātriyaḥ prajāpatir yajñaḥ prajāpatis tam eva tarpayati sa enaṃ tṛpto brahmavarcasenābhi pavata āmayāvī avekṣetaiṣa vai pātriyaḥ prajāpatir yajñaḥ prajāpatis tam eva tarpayati sa enaṃ tṛpta āyuṣābhi pavate | abhicarann avekṣetaiṣa vai pātriyaḥ prajāpatir yajñaḥ prajāpatis tam eva tarpayati sa enaṃ tṛptaḥ prāṇāpānābhyāṃ vāco dakṣakratubhyāṃ cakṣurbhyām̐ śrotrābhyām ātmano 'ṅgebhya āyuṣo 'ntar eti tājak pra dhanvati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.