स्फ्यः स्वस्तिर् विघनः स्वस्तिः पर्शुर् वेदिः परशुर् नः स्वस्तिः । यज्ञिया यज्ञकृत स्थ ते मास्मिन् यज्ञ उप ह्वयध्वम् उप मा द्यावापृथिवी ह्वयेताम् उपाऽऽस्तावः कलशः सोमो अग्निर् उप देवा उप यज्ञ उप मा होत्रा उपहवे ह्वयन्ताम् नमो ऽग्नये मखघ्ने मखस्य मा यशो ऽर्यात् । इत्य् आहवनीयम् उप तिष्ठते यज्ञो वै मखः ॥ यज्ञं वाव स तद् अहन् तस्मा एव नमस्कृत्य सदः प्र सर्पत्य् आत्मनो ऽनार्त्यै नमो रुद्राय मखघ्ने नमस्कृत्या मा पाहि । इत्य् आग्नीध्रं तस्मा एव नमस्कृत्य सदः प्र सर्पत्य् आत्मनो ऽनार्त्यै नम इन्द्राय मखघ्न इन्द्रियम् मे वीर्यम् मा निर् वधीः । इति होत्रीयम् आशिषम् एवैताम् आ शास्त इन्द्रियस्य वीर्यस्यानिर्घाताय या वै देवताः सदस्य् आर्तिम् आऽर्पयन्ति यस् ता विद्वान् प्रसर्पति न सदस्य् आर्तिम् आर्छति नमो ऽग्नये मखघ्ने । इत्य् आहैता वै देवताः सदस्य् आर्तिमाऽर्पयन्ति ता य एवं विद्वान् प्रसर्पति न सदस्यामार्तिम् आर्छति दृधे स्थः शिथिरे समीची माऽꣳहसस् पातम् । सूर्यो मा देवो दिव्याद् अꣳहसस् पातु वायुर् अन्तरिक्षात् अग्निः पृथिव्या यमः पितृभ्यः सरस्वती मनुष्येभ्यः । देवी द्वारौ मा मा सं ताप्तम् नमः सदसे नमः सदसस् पतये नमः सखीनां पुरोगाणां चक्षुषे नमो दिवे नमः पृथिव्यै । अहे दैधिषव्योद् अतस् तिष्ठान्यस्य सदने सीद यो ऽस्मत् पाकतरः । उन् निवत उद् उद्वतश् च गेषम् पातम् मा द्यावापृथिवी अद्याह्नः सदो वै प्रसर्पन्तम् पितरो ऽनु प्र सर्पन्ति त एनम् ईश्वरा हिꣳसितोः सदः प्रसृप्य दक्षिणार्धम् परेक्षेत । आगन्त पितरः पितृमान् अहं युष्माभिर् भूयासꣳ सुप्रजसो मया यूयम् भूयास्त । इति तेभ्य एव नमस्कृत्य सदः प्र सर्पत्य् आत्मनो ऽनार्त्यै ॥
sphyaḥ svastir vighanaḥ svastiḥ parśur vediḥ paraśur naḥ svastiḥ | yajñiyā yajñakṛta stha te māsmin yajña upa hvayadhvam upa mā dyāvāpṛthivī hvayetām upā''stāvaḥ kalaśaḥ somo agnir upa devā upa yajña upa mā hotrā upahave hvayantām namo 'gnaye makhaghne makhasya mā yaśo 'ryāt | ity āhavanīyam upa tiṣṭhate yajño vai makhaḥ || yajñaṃ vāva sa tad ahan tasmā eva namaskṛtya sadaḥ pra sarpaty ātmano 'nārtyai namo rudrāya makhaghne namaskṛtyā mā pāhi | ity āgnīdhraṃ tasmā eva namaskṛtya sadaḥ pra sarpaty ātmano 'nārtyai nama indrāya makhaghna indriyam me vīryam mā nir vadhīḥ | iti hotrīyam āśiṣam evaitām ā śāsta indriyasya vīryasyānirghātāya yā vai devatāḥ sadasy ārtim ā'rpayanti yas tā vidvān prasarpati na sadasy ārtim ārchati namo 'gnaye makhaghne | ity āhaitā vai devatāḥ sadasy ārtimā'rpayanti tā ya evaṃ vidvān prasarpati na sadasyāmārtim ārchati dṛdhe sthaḥ śithire samīcī mā'm̐hasas pātam | sūryo mā devo divyād am̐hasas pātu vāyur antarikṣāt agniḥ pṛthivyā yamaḥ pitṛbhyaḥ sarasvatī manuṣyebhyaḥ | devī dvārau mā mā saṃ tāptam namaḥ sadase namaḥ sadasas pataye namaḥ sakhīnāṃ purogāṇāṃ cakṣuṣe namo dive namaḥ pṛthivyai | ahe daidhiṣavyod atas tiṣṭhānyasya sadane sīda yo 'smat pākataraḥ | un nivata ud udvataś ca geṣam pātam mā dyāvāpṛthivī adyāhnaḥ sado vai prasarpantam pitaro 'nu pra sarpanti ta enam īśvarā him̐sitoḥ sadaḥ prasṛpya dakṣiṇārdham parekṣeta | āganta pitaraḥ pitṛmān ahaṃ yuṣmābhir bhūyāsam̐ suprajaso mayā yūyam bhūyāsta | iti tebhya eva namaskṛtya sadaḥ pra sarpaty ātmano 'nārtyai ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.