महीनाम् पयो ऽसि विश्वेषां देवानां तनूर् ऋध्यासम् अद्य पृषतीनां ग्रहम् पृषतीनां ग्रहो ऽसि विष्णोर् हृदयम् अस्य् एकम् इष विष्णुस् त्वाऽनु वि चक्रमे भूतिर् दध्ना घृतेन वर्धतां तस्य मेष्टस्य वीतस्य द्रविणम् आ गम्याज् ज्योतिर् असि वैश्वानरम् पृश्नियै दुग्धम् । यावती द्यावापृथिवी महित्वा यावच् च सप्त सिन्धवो वितस्थुः । तावन्तम् इन्द्र ते ग्रहꣳ सहोर्जा गृह्णाम्य् अस्तृतम् ॥ यत् कृष्णशकुनः पृषदाज्यम् अवपृशेच् छूद्रा अस्य प्रमायुकाः स्युर् यच् छ्वावमृशेच् चतुष्पादो ऽस्य पशवः प्रमायुकाः स्युर् यत् स्कन्देद् यजमानः प्रमायुकः स्यात् पशवो वै पृषदाज्यम् पशवो वा एतस्य स्कन्दन्ति यस्य पृषदाज्यꣳ स्कन्दति यत् पृषदाज्यम् पुनर् गृह्णाति पशून् एवास्मै पुनर् गृह्णाति प्राणो वै पृषदाज्यम् प्राणो वै एतस्य स्कन्दति यस्य पृषदाज्यꣳ स्कन्दति यत् पृषदाज्यम् पुनर् गृह्णाति प्राणम् एवास्मै पुनर् गृह्णाति हिरण्यम् अवधाय गृह्णात्य् अमृतं वै हिरण्यम् प्राणः पृषदाज्यम् अमृतम् एवास्य प्राणे दधाति शतमानम् भवति शतायुः पुरुषः शतेन्द्रिय आयुष्य् एवेन्द्रिये प्रति तिष्ठति । अश्वम् अव घ्रापयति प्राजापत्यो वा अश्वः प्राजापत्यः प्राणः स्वाद् एवास्मै योनेः प्राणं निर् मिमीते वि वा एतस्य यज्ञश् छिद्यते यस्य पृषदाज्यꣳ स्कन्दति वैष्णव्यर्चा पुनर् गृह्णाति यज्ञो वै विष्णुर् यज्ञेनैव यज्ञꣳ सं तनोति ॥
mahīnām payo 'si viśveṣāṃ devānāṃ tanūr ṛdhyāsam adya pṛṣatīnāṃ graham pṛṣatīnāṃ graho 'si viṣṇor hṛdayam asy ekam iṣa viṣṇus tvā'nu vi cakrame bhūtir dadhnā ghṛtena vardhatāṃ tasya meṣṭasya vītasya draviṇam ā gamyāj jyotir asi vaiśvānaram pṛśniyai dugdham | yāvatī dyāvāpṛthivī mahitvā yāvac ca sapta sindhavo vitasthuḥ | tāvantam indra te graham̐ sahorjā gṛhṇāmy astṛtam || yat kṛṣṇaśakunaḥ pṛṣadājyam avapṛśec chūdrā asya pramāyukāḥ syur yac chvāvamṛśec catuṣpādo 'sya paśavaḥ pramāyukāḥ syur yat skanded yajamānaḥ pramāyukaḥ syāt paśavo vai pṛṣadājyam paśavo vā etasya skandanti yasya pṛṣadājyam̐ skandati yat pṛṣadājyam punar gṛhṇāti paśūn evāsmai punar gṛhṇāti prāṇo vai pṛṣadājyam prāṇo vai etasya skandati yasya pṛṣadājyam̐ skandati yat pṛṣadājyam punar gṛhṇāti prāṇam evāsmai punar gṛhṇāti hiraṇyam avadhāya gṛhṇāty amṛtaṃ vai hiraṇyam prāṇaḥ pṛṣadājyam amṛtam evāsya prāṇe dadhāti śatamānam bhavati śatāyuḥ puruṣaḥ śatendriya āyuṣy evendriye prati tiṣṭhati | aśvam ava ghrāpayati prājāpatyo vā aśvaḥ prājāpatyaḥ prāṇaḥ svād evāsmai yoneḥ prāṇaṃ nir mimīte vi vā etasya yajñaś chidyate yasya pṛṣadājyam̐ skandati vaiṣṇavyarcā punar gṛhṇāti yajño vai viṣṇur yajñenaiva yajñam̐ saṃ tanoti ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.