देव सवितर् एतत् ते प्राह तत् प्र च सुव प्र च यज बृहस्पतिर् ब्रह्मा । आयुष्मत्या ऋचो मागात तनूपात् साम्नः सत्या व आशिषः सन्तु सत्या आकूतयः । ऋतं च सत्यं च वदत स्तुत देवस्य सवितुः प्रसवे स्तुतस्य स्तुतम् अस्य् ऊर्जम् मह्यꣳ स्तुतं दुहाम् आ मा स्तुतस्य स्तुतं गम्यात् । शस्त्रस्य शस्त्रम् अस्य् ऊर्जम् मह्यꣳ शस्त्रं दुहाम् आ मा शस्त्रस्य शस्त्रं गम्यात् । इन्द्रियावन्तो वनामहे धुक्षीमहि प्रजाम् इषम् । सा मे सत्याशीर् देवेषु भूयात् । ब्रह्मवर्चसम् मागम्यात् ॥ यज्ञो बभूव स आ बभूव स प्र जज्ञे स वावृधे । स देवानाम् अधिपतिर् बभूव सो अस्माꣳ अधिपतीन् करोतु वयꣳ स्याम पतयो रयीणाम् ॥ यज्ञो वा वै यज्ञपतिं दुहे यज्ञपतिर् वा यज्ञं दुहे स य स्तुतशस्त्रयोर् दोहम् अविद्वान् यजते तं यज्ञो दुहे स इष्ट्वा पापीयान् भवति य एनयोर् दोहं विद्वान् यजते स यज्ञं दुहे स इष्ट्वा वसीयान् भवति स्तुतस्य स्तुतम् अस्य् ऊर्जम् मह्यꣳ स्तुतं दुहाम् आ मा स्तुतस्य स्तुतं गम्याच् छस्त्रस्य शस्त्रम् अस्य् ऊर्जम् मह्यꣳ शस्त्रं दुहाम् आ मा शस्त्रस्य शस्त्रं गम्याद् इत्य् आहैष वै स्तुतशस्त्रयो दोहस् तं य एवं विद्वान् यजते दुह एव यज्ञम् इष्ट्वा वसीयान् भवति ॥
deva savitar etat te prāha tat pra ca suva pra ca yaja bṛhaspatir brahmā | āyuṣmatyā ṛco māgāta tanūpāt sāmnaḥ satyā va āśiṣaḥ santu satyā ākūtayaḥ | ṛtaṃ ca satyaṃ ca vadata stuta devasya savituḥ prasave stutasya stutam asy ūrjam mahyam̐ stutaṃ duhām ā mā stutasya stutaṃ gamyāt | śastrasya śastram asy ūrjam mahyam̐ śastraṃ duhām ā mā śastrasya śastraṃ gamyāt | indriyāvanto vanāmahe dhukṣīmahi prajām iṣam | sā me satyāśīr deveṣu bhūyāt | brahmavarcasam māgamyāt || yajño babhūva sa ā babhūva sa pra jajñe sa vāvṛdhe | sa devānām adhipatir babhūva so asmām̐ adhipatīn karotu vayam̐ syāma patayo rayīṇām || yajño vā vai yajñapatiṃ duhe yajñapatir vā yajñaṃ duhe sa ya stutaśastrayor doham avidvān yajate taṃ yajño duhe sa iṣṭvā pāpīyān bhavati ya enayor dohaṃ vidvān yajate sa yajñaṃ duhe sa iṣṭvā vasīyān bhavati stutasya stutam asy ūrjam mahyam̐ stutaṃ duhām ā mā stutasya stutaṃ gamyāc chastrasya śastram asy ūrjam mahyam̐ śastraṃ duhām ā mā śastrasya śastraṃ gamyād ity āhaiṣa vai stutaśastrayo dohas taṃ ya evaṃ vidvān yajate duha eva yajñam iṣṭvā vasīyān bhavati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.