आकूतिम् अग्निम् प्रयुजꣳ स्वाहा मनो मेधाम् अग्निम् प्रयुजꣳ स्वाहा चित्तं विज्ञातम् अग्निम् प्रयुजꣳ स्वाहा वाचो विधृतिम् अग्निम् प्रयुजꣳ स्वाहा प्रजापतये मनवे स्वाहाग्नये वैश्वानराय स्वाहा विश्वे देवस्य नेतुर् मर्तो वृणीत सख्यं विश्वे राय इषुध्यसि द्युम्नं वृणीत पुष्यसे स्वाहा मा सु भित्था मा सु रिषो दृꣳहस्व वीडयस्व सु । अम्ब धृष्णु वीरयस्वा ग्निश् चेदं करिष्यथः ॥ दृꣳहस्व देवि पृथिवि स्वस्तय आसुरी माया स्वधया कृतासि । जुष्टं देवानां इदम् अस्तु हव्यम् अरिष्टा त्वम् उद् इहि यज्ञे अस्मिन् ॥ मित्रैताम् उखां तपैषा मा भेदि । एताम् ते परि ददाम्य् अभित्त्यै । द्र्वन्नः सर्पिरासुतिः प्रत्नो होता वरेण्यः । सहसस् पुत्रो अद्भुतः ॥ परस्या अधि संवतो ऽवराꣳ अभ्य् आ तर । यत्राहम् अस्मि ताꣳ अव ॥ परमस्याः परावतो रोहिदश्व इहा गहि । पुरीष्यः पुरुप्रियो ऽग्ने त्वं तरा मृधः ॥ सीद त्वम् मातुर् अस्या उपस्थे विश्वान्य् अग्ने वयुनानि विद्वान् । मैनाम् अर्चिषा मा तपसाऽभि शूशुचो ऽन्तर् अस्याꣳ शुक्रज्योतिर् वि भाहि ॥ अन्तर् अग्ने रुचा त्वम् उखायै सदने स्वे । तस्यास् त्वꣳ हरसा तपञ् जातवेदः शिवो भव ॥ शिवो भूत्वा मह्यम् अग्ने ऽथो सीद शिवस् त्वम् । शिवाः कृत्वा दिशः सर्वाः स्वां योनिम् इहासदः ॥
ākūtim agnim prayujam̐ svāhā mano medhām agnim prayujam̐ svāhā cittaṃ vijñātam agnim prayujam̐ svāhā vāco vidhṛtim agnim prayujam̐ svāhā prajāpataye manave svāhāgnaye vaiśvānarāya svāhā viśve devasya netur marto vṛṇīta sakhyaṃ viśve rāya iṣudhyasi dyumnaṃ vṛṇīta puṣyase svāhā mā su bhitthā mā su riṣo dṛm̐hasva vīḍayasva su | amba dhṛṣṇu vīrayasvā gniś cedaṃ kariṣyathaḥ || dṛm̐hasva devi pṛthivi svastaya āsurī māyā svadhayā kṛtāsi | juṣṭaṃ devānāṃ idam astu havyam ariṣṭā tvam ud ihi yajñe asmin || mitraitām ukhāṃ tapaiṣā mā bhedi | etām te pari dadāmy abhittyai | drvannaḥ sarpirāsutiḥ pratno hotā vareṇyaḥ | sahasas putro adbhutaḥ || parasyā adhi saṃvato 'varām̐ abhy ā tara | yatrāham asmi tām̐ ava || paramasyāḥ parāvato rohidaśva ihā gahi | purīṣyaḥ purupriyo 'gne tvaṃ tarā mṛdhaḥ || sīda tvam mātur asyā upasthe viśvāny agne vayunāni vidvān | mainām arciṣā mā tapasā'bhi śūśuco 'ntar asyām̐ śukrajyotir vi bhāhi || antar agne rucā tvam ukhāyai sadane sve | tasyās tvam̐ harasā tapañ jātavedaḥ śivo bhava || śivo bhūtvā mahyam agne 'tho sīda śivas tvam | śivāḥ kṛtvā diśaḥ sarvāḥ svāṃ yonim ihāsadaḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.