वारुणो वा अग्निर् उपनद्धः । वि पाजसेति वि स्रꣳसयति सवितृप्रसूत एवास्य विषूचीं वरुणमेनिं वि सृजति । अप उप सृजति । आपो वै शान्ताः शान्ताभिर् एवास्य शुचꣳ शमयति तिसृभिर् उप सृजति त्रिवृद् वा अग्निः । यावान् एवाग्निस् तस्य शुचꣳ शमयति मित्रः सꣳसृज्य पृथिवीम् इत्य् आह मित्रो वै शिवो देवानाम् । तेनैव एनꣳ सꣳ सृजति शान्त्यै यद् ग्राम्याणाम् पात्राणां कपालैः सꣳसृजेद् ग्राम्याणि पात्राणि शुचार्पयेत् । अर्मकपालैः सꣳ सृजति । एतानि वा अनुपजीवनीयानि तान्य् एव शुचार्पयति शर्कराभिः सꣳ सृजति धृत्यै । अथो शंत्वाय । अजलोमैः सꣳ सृजति । एषा वा अग्नेः प्रिया तनूर् यद् अजा प्रिययैवैनं तनुवा सꣳ सृजत्य् अथो तेजसा कृष्णाजिनस्य लोमभिः सम् सृजति यज्ञो वै कृष्णाजिनम् । यज्ञेनैव यज्ञꣳ सꣳ सृजति रुद्राः सम्भृत्य पृथिवीम् इत्य् आह । एता वा एतं देवता अग्रे सम् अभरन् ताभिर् एवैनꣳ सम् भरति मखस्य शिरो ऽसीत्य् आह यज्ञो वै मखः तस्यैतच् छिरो यद् उखा तस्माद् एवम् आह यज्ञस्य पदे स्थ इत्य् आह यज्ञस्य ह्य् एते पदे अथो प्रतिष्ठित्यै प्रान्याभिर् यच्छत्य् अन्व् अन्यैर् मन्त्रयते मिथुनत्वाय त्र्युद्धिं करोति त्रय इमे लोका एषां लोकानाम् आप्त्यै छन्दोभिः करोति वीर्यं वै छन्दाꣳसि वीर्येणैवैनां करोति यजुषा बिलं करोति व्यावृत्त्यै । इयतीं करोति प्रजापतिना यज्ञमुखेन सम्मिताम् । द्विस्तनां करोति द्यावापृथिव्योर् दोहाय चतुस्तनां करोति पशूनां दोहाय । अष्टास्तनां करोति छन्दसां दोहाय नवाश्रिम् अभिचरतः कुर्यात् त्रिवृतम् एव वज्रꣳ सम्भृत्य भ्रातृव्याय प्र हरति स्तृत्यै कृत्वाय स महीम् उखाम् इति नि दधाति देवतास्व् एवैनाम् प्रति ष्ठापयति ॥
vāruṇo vā agnir upanaddhaḥ | vi pājaseti vi sram̐sayati savitṛprasūta evāsya viṣūcīṃ varuṇameniṃ vi sṛjati | apa upa sṛjati | āpo vai śāntāḥ śāntābhir evāsya śucam̐ śamayati tisṛbhir upa sṛjati trivṛd vā agniḥ | yāvān evāgnis tasya śucam̐ śamayati mitraḥ sam̐sṛjya pṛthivīm ity āha mitro vai śivo devānām | tenaiva enam̐ sam̐ sṛjati śāntyai yad grāmyāṇām pātrāṇāṃ kapālaiḥ sam̐sṛjed grāmyāṇi pātrāṇi śucārpayet | armakapālaiḥ sam̐ sṛjati | etāni vā anupajīvanīyāni tāny eva śucārpayati śarkarābhiḥ sam̐ sṛjati dhṛtyai | atho śaṃtvāya | ajalomaiḥ sam̐ sṛjati | eṣā vā agneḥ priyā tanūr yad ajā priyayaivainaṃ tanuvā sam̐ sṛjaty atho tejasā kṛṣṇājinasya lomabhiḥ sam sṛjati yajño vai kṛṣṇājinam | yajñenaiva yajñam̐ sam̐ sṛjati rudrāḥ sambhṛtya pṛthivīm ity āha | etā vā etaṃ devatā agre sam abharan tābhir evainam̐ sam bharati makhasya śiro 'sīty āha yajño vai makhaḥ tasyaitac chiro yad ukhā tasmād evam āha yajñasya pade stha ity āha yajñasya hy ete pade atho pratiṣṭhityai prānyābhir yacchaty anv anyair mantrayate mithunatvāya tryuddhiṃ karoti traya ime lokā eṣāṃ lokānām āptyai chandobhiḥ karoti vīryaṃ vai chandām̐si vīryeṇaivaināṃ karoti yajuṣā bilaṃ karoti vyāvṛttyai | iyatīṃ karoti prajāpatinā yajñamukhena sammitām | dvistanāṃ karoti dyāvāpṛthivyor dohāya catustanāṃ karoti paśūnāṃ dohāya | aṣṭāstanāṃ karoti chandasāṃ dohāya navāśrim abhicarataḥ kuryāt trivṛtam eva vajram̐ sambhṛtya bhrātṛvyāya pra harati stṛtyai kṛtvāya sa mahīm ukhām iti ni dadhāti devatāsv evainām prati ṣṭhāpayati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.