गायत्रेण पुरस्ताद् उप तिष्ठते प्राणम् एवास्मिन् दधाति बृहद्रथंतराभ्याम् पक्षाव् ओज एवास्मिन् दधाति । ऋतुस्था यज्ञायज्ञियेन पुच्छम् ऋतुष्व् एव प्रति तिष्ठति पृष्ठैर् उप तिष्ठते तेजो वै पृष्ठानि तेज एवास्मिन् दधाति प्रजापतिर् अग्निम् असृजत सो ऽस्मात् सृष्टः पराङ् ऐत् तं वारवन्तीयेनावारयत तद् वारवन्तीयस्य वारवन्तीयत्वम् । श्यैतेन श्येती अकुरुत तच् छ्यैतस्य श्यैतत्वम् ॥ यद् वारवन्तीयेनोपतिष्ठते वारयत एवैनम् । श्यैतेन श्येती कुरुते प्रजापतेर् हृदयेनापिपक्षम् प्रत्य् उप तिष्ठते प्रेमाणम् एवास्य गच्छति प्राच्या त्वा दिशा सादयामि गायत्रेण छन्दसाग्निना देवतयाग्नेः शीर्ष्णाग्नेः शिर उप दधामि दक्षिणया त्वा दिशा सादयामि त्रैष्टुभेन छन्दसेन्द्रेण देवतयाग्नेः पक्षेणाग्नेः पक्षम् उप दधामि प्रतीच्या त्वा दिशा सादयामि ॥ जागतेन छन्दसा सवित्रा देवतयाग्नेः पुच्छेनाग्नेः पुच्छम् उप दधामि । उदीच्या त्वा दिशा सादयाम्य् आनुष्टुभेन छन्दसा मित्रावरुणाभ्यां देवतयाग्नेः पक्षेणाग्नेः पक्षम् उप दधामि । ऊर्ध्वया त्वा दिशा सादयामि पाङ्क्तेन छन्दसा बृहस्पतिना देवतयाग्नेः पृष्ठेनाग्नेः पृष्ठम् उप दधामि यो वा अपात्मानम् अग्निं चिनुते ऽपात्मामुष्मिँल्लोके भवति यः सात्मानं चिनुते सात्मामुष्मिँल्लोके भवति । आत्मेष्टका उप दधाति । एष वा अग्नेर् आत्मा सात्मानम् एवाग्निं चिनुते सात्मामुष्मिँल्लोके भवति य एवं वेद ॥
gāyatreṇa purastād upa tiṣṭhate prāṇam evāsmin dadhāti bṛhadrathaṃtarābhyām pakṣāv oja evāsmin dadhāti | ṛtusthā yajñāyajñiyena puccham ṛtuṣv eva prati tiṣṭhati pṛṣṭhair upa tiṣṭhate tejo vai pṛṣṭhāni teja evāsmin dadhāti prajāpatir agnim asṛjata so 'smāt sṛṣṭaḥ parāṅ ait taṃ vāravantīyenāvārayata tad vāravantīyasya vāravantīyatvam | śyaitena śyetī akuruta tac chyaitasya śyaitatvam || yad vāravantīyenopatiṣṭhate vārayata evainam | śyaitena śyetī kurute prajāpater hṛdayenāpipakṣam praty upa tiṣṭhate premāṇam evāsya gacchati prācyā tvā diśā sādayāmi gāyatreṇa chandasāgninā devatayāgneḥ śīrṣṇāgneḥ śira upa dadhāmi dakṣiṇayā tvā diśā sādayāmi traiṣṭubhena chandasendreṇa devatayāgneḥ pakṣeṇāgneḥ pakṣam upa dadhāmi pratīcyā tvā diśā sādayāmi || jāgatena chandasā savitrā devatayāgneḥ pucchenāgneḥ puccham upa dadhāmi | udīcyā tvā diśā sādayāmy ānuṣṭubhena chandasā mitrāvaruṇābhyāṃ devatayāgneḥ pakṣeṇāgneḥ pakṣam upa dadhāmi | ūrdhvayā tvā diśā sādayāmi pāṅktena chandasā bṛhaspatinā devatayāgneḥ pṛṣṭhenāgneḥ pṛṣṭham upa dadhāmi yo vā apātmānam agniṃ cinute 'pātmāmuṣmi~lloke bhavati yaḥ sātmānaṃ cinute sātmāmuṣmi~lloke bhavati | ātmeṣṭakā upa dadhāti | eṣa vā agner ātmā sātmānam evāgniṃ cinute sātmāmuṣmi~lloke bhavati ya evaṃ veda ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.