अग्न उदधे या त इषुर् युवा नाम तया नो मृड तस्यास् ते नमस् तस्यास् त उप जीवन्तो भूयास्म । अग्ने दुध्र गह्य किꣳशिल वन्य या त इषुर् युवा नाम तया नो मृड तस्यास् ते नमस् तस्यास् त उप जीवन्तो भूयास्म पञ्च वा एते ऽग्नयो यच् चितय उदधिर् एव नाम प्रथमो दुध्रः द्वितीयो गह्यस् तृतीयः किꣳशिलश् चतुर्थो वन्यः पञ्चमस् तेभ्यो यद् आहुतीर् न जुहुयाद् अध्वर्युं च यजमानं च प्र दहेयुर् यद् एता आहुतीर् जुहोति भागधेयेनैवैनाञ् छमयति नार्तिम् आर्छत्य् अध्वर्युर् न यजमानः । वाङ् म आसन् नसोः प्राणो ऽक्ष्योश् चक्षुः कर्णयोः श्रोत्रम् बाहुवोर् बलमूरुवोर् ओजो ऽरिष्टा विश्वान्य् अङ्गानि तनूः तनुवा मे सह नमस् ते अस्तु मा मा हिꣳसीः । अप वा एतस्मात् प्राणाः क्रामन्ति यो ऽग्निं चिन्वन्न् अधिक्रामति वाङ् म आसन् नसोः प्राणः । इत्य् आह प्राणान् एवात्मन् धत्ते यो रुद्रो अग्नौ यो अप्सु य ओषधीषु यो रुद्रो विश्वा भुवनाऽऽविवेश तस्मै रुद्राय नमो अस्तु । आहुतिभागा वा अन्ये रुद्रा हविर्भागाः अन्ये शतरुद्रीयꣳ हुत्वा गावीधुकं चरुम् एतेन यजुषा चरमायाम् इष्टकायां नि दध्याद् भागधेयेनैवैनꣳ शमयति तस्य त्वै शतरुद्रीयꣳ हुतम् इत्य् आहुर् यस्यैतद् अग्नौ क्रियत इति। वसवस् त्वा रुद्रैः पुरस्तात् पान्तु पितरस् त्वा यमराजानः पितृभिर् दक्षिणतः पान्त्व् आदित्यास् त्वा विश्वैर् देवैः पश्चात् पान्तु द्युतानस् त्वा मारुतो मरुद्भिर् उत्तरतः पातु । देवास् त्वेन्द्रज्येष्ठा वरुणराजानो ऽधस्ताच् चोपरिष्टाच् च पान्तु। न वा एतेन पूतो न मेध्यो न प्रोक्षितो यद् एनम् अतः प्राचीनम् प्रोक्षति यत् संचितम् आज्येन प्रोक्षति तेन पूतस् तेन मेध्यस् तेन प्रोक्षितः ॥
agna udadhe yā ta iṣur yuvā nāma tayā no mṛḍa tasyās te namas tasyās ta upa jīvanto bhūyāsma | agne dudhra gahya kim̐śila vanya yā ta iṣur yuvā nāma tayā no mṛḍa tasyās te namas tasyās ta upa jīvanto bhūyāsma pañca vā ete 'gnayo yac citaya udadhir eva nāma prathamo dudhraḥ dvitīyo gahyas tṛtīyaḥ kim̐śilaś caturtho vanyaḥ pañcamas tebhyo yad āhutīr na juhuyād adhvaryuṃ ca yajamānaṃ ca pra daheyur yad etā āhutīr juhoti bhāgadheyenaivaināñ chamayati nārtim ārchaty adhvaryur na yajamānaḥ | vāṅ ma āsan nasoḥ prāṇo 'kṣyoś cakṣuḥ karṇayoḥ śrotram bāhuvor balamūruvor ojo 'riṣṭā viśvāny aṅgāni tanūḥ tanuvā me saha namas te astu mā mā him̐sīḥ | apa vā etasmāt prāṇāḥ krāmanti yo 'gniṃ cinvann adhikrāmati vāṅ ma āsan nasoḥ prāṇaḥ | ity āha prāṇān evātman dhatte yo rudro agnau yo apsu ya oṣadhīṣu yo rudro viśvā bhuvanā''viveśa tasmai rudrāya namo astu | āhutibhāgā vā anye rudrā havirbhāgāḥ anye śatarudrīyam̐ hutvā gāvīdhukaṃ carum etena yajuṣā caramāyām iṣṭakāyāṃ ni dadhyād bhāgadheyenaivainam̐ śamayati tasya tvai śatarudrīyam̐ hutam ity āhur yasyaitad agnau kriyata iti| vasavas tvā rudraiḥ purastāt pāntu pitaras tvā yamarājānaḥ pitṛbhir dakṣiṇataḥ pāntv ādityās tvā viśvair devaiḥ paścāt pāntu dyutānas tvā māruto marudbhir uttarataḥ pātu | devās tvendrajyeṣṭhā varuṇarājāno 'dhastāc copariṣṭāc ca pāntu| na vā etena pūto na medhyo na prokṣito yad enam ataḥ prācīnam prokṣati yat saṃcitam ājyena prokṣati tena pūtas tena medhyas tena prokṣitaḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.